SAMUYEL MUCUW NAŊ 1
1
Davit micina ɓi ngi muc ngi Sawul ati ngi Zonataŋ
1Ti Davit muso cifi a Sikilak, a dirba naŋ mikiɗa Amalekey na, naɓa Sawul a muc le si. Davit a cifi a diga, a gi hin cuw. 2Ngi hin mimakir naŋ na, mbur gawla a so zle ar li Sawul mipi sar a diga, a ndilawa. Zana ngi vu vuhoy i mingirahay le ngar ngar, yo hirnga, muyuŋ limbirim. Naŋ mindilo ndil a ciki Davite na, a diɗ durus, a huruk huruk a mbuŋ Davite. 3Davit a cufuɗaŋ: «Ki so ti damaka?» Gawla a mbiɗaŋ di: «I loho tir li pi sar ngi Israyeley.» 4Davit a ɓaŋ: «Ɓi a cuh mbri a diga ka? Inga slufiy di.» Gawla tuwa, a ɓaŋ: «Soje Israyeley a kilam le tir li kiɗa vu. A kiɗam le haɗi asi soje ndraˀahaya. Ko Sawul ati mangal naŋ Zonataŋ kwana, a micam le.» 5Davit a cufuɗa gawla muso faŋ ɓi nah tuwa: «Sawul ati mangal naŋ Zonataŋ a micam le na, ki si na mbri mbrike?» 6Gawla tuwa, a mbiɗaŋ di: «Ya a muwã Gilboˀa gurjik kine, keɗ na, Sawulo, naŋ dilak ti ziwit naŋ. Mesene naŋ misi mota ngi vurumoy ati misi pilisey ngasl ngasl gweˀ a cikeˀe. 7A mbuɗo hiri pulaˀ na, a puriy. A ziliy ng'avaŋ, yo yi zilaŋ mi: ‹Y'ani!› 8A ɓiy na: ‹I ka waka?› Yi mbiɗaŋ di: ‹Yi mbur Amalek.› 9A ɓiy na: ‹Gurjoho nga ciki ɗu aka. Da ki ngum na, tikiy is wãˀ si, ko da y'ada musuwun a ruŋ kwana, lesl inga ya ta wãˀa.› 10Yi girjih nga a cikeˀe so, joˀ yi tikaŋ is wãˀ, vur mike na, a tikakaŋ ˀay le, yi si na le, naŋ anta sa ndir ti siifa ta. Naŋ kanah kumani, loppol ngi hirnga naŋ ati ɓalaŋ ngi hirbazla naŋ na, yi suw t'ani.» 11Akẽh Davit a ja zana naŋhaya, a ngira taŋ. Mizli naŋhaya gar kwana, a gaka kanah ya. 12A tuwam, a gam dalyam, hã pastaˀa. Naŋ kahana taŋ mutuwaka vagay ngi Sawul, ngi Zonataŋ, ngi Israyeley waɗ ngi mizli ngi Bumbulvuŋhay mumicam ar vurumo. 13A dirba nah ma na, Davit a ɓa gawla muso faŋ ɓi ngi Sawul tuwa: «Ki so ti damaka?» Gawla a ɓaŋ: «Yi mangal ngi mbur Amalek, mbur moholoy misi ar walahay kum na.» 14Davit a ɓaŋ na: «Buymisemuŋ muwuna buyo le na, ki zuɓa haŋ mbri mbri, ki kiɗaŋ, ki zluwun ta naka?» 15Davit a zilo pal a wuzla gawla soje naŋhaya, a ɓaŋ: «Aru, kiɗa vagay.» Gawla soje ngi Davit a kiɗa mbur tuwa vagay. 16Davit a ɓa mbur Amalek tuwa: «Anja pumbus ɗik a mbiɗi nga hirnga ɗiki, asi ki ga kiita le da hirnga ɗik vuna tehhe a muŋ ti ka miɓi: ‹Buy Bumbulvuŋ muwunaŋ na, mi tikaŋ is wãˀ i ya.›»
Davit mutuwa Sawul waɗ Zonataŋ
17Akẽh na, Davit a zli dimis ngi tuwa Sawul waɗ mangal naŋ Zonataŋ. 18A zilaka «Dimis ngi lek.» I mutoho le ar ɗerewol ngi mbur mijeŋŋe. Ɓa ngi dubuna da ziri Zudahay. A zla, a ɓi anihĩ: 19Israyel, gambara ɗikey migi vurumoyo, a kiɗaka taŋ le, bugawla ɗikey a micam le ɓaˀ ɓaˀ a muwãˀ. 20Ki tilam di mi ar walahay Gata ta, ki ɓaka haɗa haɗa a jiviɗ ngi Askaloŋhoyo ta. Vur ngwas Filistihey mamulom, anja ngwas ngi manja ci mizaway, a jiɗam mececẽleŋ ta. 21Muwã Gilboˀahaya, anja wulngar malla vuŋ a gi ar kumo ta, anja guva migi gwat a sirtukum mata. Asi mbaray ngi bugawlahay a jupam le ti ndileɓ, mbaray ngi Sawul anta sa gakaŋ mala mata ndiɗaˀ wãˀ. 22A mbuŋ mesene ngi kiɗey, a mbuŋ mizli mazliram hiri ti ndra ta migidaŋhay ngi kiɗa vu, lek ngi Zonataŋ a didirik murdirba ta, maslalam ngi Sawul a mi ng'ar haya sufaˀ sufaˀ. 23Sawul ati Zonataŋ, i yemehey, ti taŋ misi ar siifa, ko ar muc gar kwana, a wuɗkam ta. Taŋ wirwir fineˀ kurom, taŋ gidaŋ fineˀ moboroy. 24Ngwas Israyeley, tuwaka Sawulo, Sawul makukum zana gagaza pilngiɗ pilngiɗ zleˀe, yo magukum gwat ngi wuyahay zleˀe, magukum gwat ngi wuya ngi ɓiri tapasl tapasl avu zana kumoy zleˀe tuwa. 25Bugawlahay a ndilam le gizliv a wuzla kiɗa vu, Zonataŋ, a muc le ɓaˀ a muwã. 26Zonataŋ, sukum ɗu, ɓi ɗik ara giriy haɗa a mevele. Yi wuɗ ka zleˀe haɗa. Gi ngama ndra ati ka na, naŋ kuy haɗa, hã a funa wuɗa ngwasa le. 27Bugawlahay a ndilam le, gwat ngi vurumoy a zizam le.
Currently Selected:
SAMUYEL MUCUW NAŊ 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.