SAMUYEL MUCUW NAŊ Ɓi madiɗa madiɗa ngi raˀa
Ɓi madiɗa madiɗa ngi raˀa
Ɗerewol hana ati mudumbuŋ i slra mupurla zleˀe angi zli virzi naŋ. I misina avu slimiɗ ngi mbur madiɗa mudumbuŋ muslufaka ɓi naŋ anga na, mijiviɗ Samuyel. Ar wuɗuk naŋ dana na, ɗerewol 2 Samuyele, a sluf di i ɓi ngi zumabuy ngi Davit, buy mudumbuŋ, yo buy madiɗa mufuna buy Israyeley gar. Mingiɓi ngi raˀa, a zli ti ɓi ngi Davit mutuwa vagay ngi Sawul ati ngi mangal naŋ Zonataŋ, yo ara slufa ndra ɓi ngi Davit micifi i buy mudumbuŋ ngi sukwi ngi Zuda vay ruwuyoy (sap 1-4). Isebaˀal, mangal ngi Sawul muzum buy ngi hin neˀkini ar sukwi vay muŋhoy. A dirba Isebaˀal mumuco, sukwi tayna a jumom ng’avi Davit, a wunakaŋ i buy taŋ madiɗa. A dirba nah, Davit a sa zum buy ar sukwi mukuru’ nga cuwo gar (sap 5-20). Sapitr 21-24 na, a cikila hirnga ngi ɓihey wal wal migam angi zumabuy ngi Davite, amma ɓi tayna t’anta angi sapiter mudumbuŋhoyo ta. Davite, ɓi miɓam ndra di vurˀe gar na, i ngi cira hiri tewle ta. Ɗerewol 2 Samuyele, ara biga ndra Davit i madiɗa, naŋ gidaŋ, amma ɗumo ndra ɓi ngi hĩhĩy naŋ ta, yo ɓi mukuyta wãˀ mihirya cifi ngi mizli ngi hay naŋhay na, a pula teˀ ta. Ɗerewol Samuyel a biga ndra Davite, i mbur misi ti jijir ngi mbur titira a hinga naŋ, yo naŋ i mbur madiɗa gisiŋ misina malambaˀ naŋ, waɗ macufuɗ wereke avu Buymisemuŋ vur mungra naŋ. Nga mbuŋ a dirba nah, ti hin ngi maguzuvuraka Israyeley na, Dazvit a tiri avu Israyeleye i buy mezle milaha mizli, Buymisemuŋ miɓa ɗaˀ le ngi slino di da mizli naŋhay. Naŋ kine, Buymisemuŋ miɓa Davit ɗaˀ le, mijiviɗ Nataŋ misa ɓaŋ di na, Israyeley a sa wulkaka keŋ: a dirba ɗike, i dideˀ ɗik ndrehhe masa cifi i buyo (sap. 7). Yesu milaha vu, Buymisemuŋ mislino di na, ar li numuŋ angi Jumoˀay Nawaya, a zilaka «Mangal ngi Davit» (Pura Mat 20.2 9-34; 21.9 ).
Currently Selected:
SAMUYEL MUCUW NAŊ Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.