Romanos 1
1
Uandajperata
1Chári sésekua jimbo Roma anapuecha, Ji Páblusïni karani jaka, Jesukristueri uandakua páriska, Diósïrini erakusti imeri ambakiti aiangperakuani uandantani jámani, 2eska na aiatspetini jápka ka engaksï imeri uandakua páricha na karantapka, 3eska Dabiri sïrukueska jimboka ísï kángorhenhaspka eska parhakpeni anapu ma na kángorhenhajka, 4ka eskajtu Diósï Uájpeska, jimboka Espiritu pímbinhasïri uinhapekua jimbo tsítanhantaska. Juchari Acha Jesukristu.
5Imeri jakangurhikua jimbo jucha míndanhaska iámu parhakpeni uandantani jámani eska ima kurhajchanhaaka ka mintsikanhani. 6Ka iámendu chájtu engajtsï Roma irekani jaka, Jesukristuni jingunijtsï eranhaxaka, 7Diósïksïni erakusti ka kánekuaksïni xénhchasïndi. Juchari Diósï Táte, ka Acha Jesukristuksïni úchakuare ka sési jakuaksïni kóndeni.
Páblu Róma nikuekaxapti
8Urheta Diósïni diósmaiamukua arhixaka, Jesukristuni jimbo, jimboka iápuru isï mítekorhepaxaka eskajtsï cha imani mintsikaxaka. 9Ji Diósïni jimbo uandaxaka, jimbokani ima Uájperi ambakiti aiangperakuanisïni uandantani jámka, imanisïni mintsita jinguni marhuakujka, ka exexatirini eskaksïni kómarhijpecheni jarhasïnga, 10ka eskani kurhakuni jarhasïnga, eskarini sésekua íntskuaka niranksïni p'urhembeni, 11jimbokaksïni exentskuekaxaka ka aiangunksïni úekaxaka máru espiritueri jurhengorhekuechani engajtsï jinguni uinhapentaaka, 12eska ísï jámani chájtu úaka méntkueni mintsikani ka jarhojperani.
13Míte je k'óru, erachicha, eskaksïni ióni p'urhembekuekaskia, ka méntkisïrini ambe ma p'íngusti. Uéksïnga cha jinguni jarhani ka jíjtuni p'ikuarherani na engajtsï xáni újchakurakata jaka, ísï eskani máteru iretecharhu na p'ikuarheraka. 14Íni ambe aiangukuekaxaka grieguechani ka ístu iauani isï anapuechani ka k'éri jurhendichani ka no jurhendichantu ísï. 15Jimbosïni xáni ninhejchani jaka chánksïni jinguni engajtsï Roma jaka, ka pájtamaakaksïni ambakiti aiangperakua aianguntani.
Ambakiti aiangperakua uinhapekuesti
16Sési jimbo no k'uratsesïnga ambakiti aiangperakuani aiangpeni, jimboka Diósïri uinhapekueska, enga p'ímutantajka imechani ne enga jakajkujka, judiouechani uénani ka grieguechantu ísï, 17jimboka ísïsï xarharajka ambe enga Diósï uékajka, eska sánderu jakajkupanhaaka ísï eska karakata na arhijka: “Kaxumbiti, jakajkukua jimbosï sési irekaati.”
Iámenduechachi k'amanharhintstiska
18Diósïri ikimperata xarharastia auandarhu, eska ikiakusïnga k'uiripuni enga no p'amojkpejka ka no xénhchpeni, ka engaksï nósesi jámaparini no uéjka eska mítekorheaka ambe enga ísïka, 19jimbokaksï jánhaskatixaka ambe enga Diósïrika, Diósï xarhatakuasti. 20Nájkirukachi Diósïni no exejka, parhakpeni kueraakuarhutki uératini xarharaxati imani ambe jimbo enga xáni újka: Enga imeri uinhapekua nómeni k'amarhujka, ka enga Diósïka, jimbo, iámu parhakpeni anapuecha nóteru ambema jimbo úati ónharhini; 21ka náuejkiksï mítepkia Diósïni, nóksï k'éri ambe arhisti, ka nójtuksï diósmaiamukua arhisti, sánderuksï mímixeti jurhendi p'ikuarheraparini, iámuksï tandojtsïsti ka mintsïtaksï pájpakasï ka chérhekueni jásï ma kámsïndi, 22Xánksï jurhendi arhikorhetini, iámuksï tandonhaskasti, 23ka Diósïri pimbinhaxiti tíntskuaniksï jurajkusti, enga no terejka; ka k'uiripueni járhatiksï úkorheasti ka kuínini járhatiksï úkorheasti ka ch'anchakini jarhatiksï úkorheasti ka akuitseni jarhatiksï úkorheasti engaksï ísku terejka.
24Jimbosï Diósï jurajkuaati eskaksï jurajkutakorhentaaka ísku jánhchani, ka eskaksï imani úaka ambe engaksï mintsitarhu nósesi jásï ambe tsitini jaka, ka jamberiksï jimajku úndasti p'árhperani 25ima engaksï Diósïri jurhimbitkuekuani chkuándirakua jinguni mójtakuka, ka engaksï imani ambe jakajkujka ka marhuakuni enga Diósï úka ka nóksï Diósï Kuerajpirini jakajkuni, imani enga méntkisï k'éri arhinhajka. Ka ísïsti.
26Jimbosï Diósï jurajkuati eskaksï méntku k'uratsekua tsîtatini irekaaka; ka indecheri uarhitichaksï jamberi nóteru tatakaecha jingunderku p'árhperasïndia, iásïksï máteru nanakecha jinguni ísï kámperasïndia, náuejki nóteru ísïjkia. 27Ka tatakechajtuksï témbechani mirikurhiastia ka máteru tatakechanksï jinguni k'uratsekua ambe niátaxati, jandiojkuksï p'íntaxati ambe engaksï andakorhetini jaka ísïksï no kurhandirarini.
28Ka jimbokaksï no jiókorheka Diósïni, Diósï jurajkuasti eskaksï eratsekua tsîtaaka ka eskaksï imani ambe niátaaka enga nómbema jimbo sésika. 29Eskaksï nombema sési úaka, eskaksï mintsitarhu jatanheaka nósei únhchakua, eskaksï iámu ambe piánhchaaka, eskaksï nósesi ambe únhchaaka, eskaksï kánekua epurhpeaka, eskaksï atajpenhchaaka uándipeni, eskaksï iámu ambe no jaiapenhentaaka, eskaksï tandojchpeaka, eskaksï iámendu ambe no jaiapanhentaaka, eskaksï arhinhchpiriuaka, 30eskaksï uandatsetspitiuaka, Diósíri ikiatspirinksï, nósesi uandaristiksï, imani ambeksï jamberi arhikorhesïndi engaksï no jurhenaka úni, sóntkuksï xékuntasïndi néna nósesi ambe úni, tátjembechanksï no kurhandirakuasïndi, 31inchandimestiksï, ískuksï aiatspesïndi ambe, nóksï p'ikuarherasïndi ambema nósesi útspeni, ka nóksï sáni p'amojkpesïndi. 32Imaksï mítetixati, eska Diósï uandarixaka eskaksï xásïkua uarhikueska, ka nóksï jandiójku mítesïndi indeni ambe úni, útaseruksï jaiapanhekuantaasïndi máteruechani engaksï xásï ambe niátka.
Currently Selected:
Romanos 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.