Romanos 2
2
Diósï sési útatspesïndi
1Indeni jimbori, t'u nónemani úaka arhinharhikuni, ne uéjkikari, jimbokari máteru nemani arhinharhikutini jandiojku uekajpekorhexaka, jimbokari ísï jámani májkueni niátaxaka eskaksï ima na niátani jaka. 2Mítetixakachi eska Diósï jurhimbitkueska ka eska no jukari arhinharhikuasïnga ísï niatatichani. 3¿Andi t'u, engari máteruechani arhinharhikuani jaka, eratsexaki eskakini Diósï t'úngeni no arhinharhikuaka? 4¿Ándi t'u ísku ambeni exexaki imeri kóntperatani ka tekantskuani ka engakini no ikiachejka? ¿Andi nóri kurhangusïnki eskari Diósïri kóntperata jimbo móantaaka? 5K'óru engari mintsita chuperaka ka nóri uékani móantani, ikimekuari andakorhexaka, jiáni enga Diósï terujkani anhaxurhitini sési útatspentaaka, 6enga mándani arhini maiamuantauaka ambe enga xáni andakorhenhaka: 7Imechani méntkisï tsípekua íntsauati engaksï jángorhentaka sési ambe úni, kéri ambe jirinhakuekani, kéri ambeuatiksï ka méntkisïksï irekaati. 8Ka nósani p'amojkuauati ikimeni imechani engaksï inchajtsïmantajka no uékani sési jámani ka sánderuksï ikiakorheni, 9No sési niátatichaksï mískorheati ka kómuksï nitamani, judiouecha uénani ka ístu no judiouecha, 10ka sési ambe úrichani t'íntskua ka kaxumbekua ka sési jakua íntsauati, judiouechani uénani ka ístu no judiouechani. 11Jimboka Diósï nónema jinguni sánderu k'uetsapesïnga.
Néna arhinharhikpesïnki Moisesiri juramukua
12Jimboka ima engaksï k'amanharhintajka juramukuani no míteparini, nóksï jánhaskatini uarhiaati; ka ima engaksï k'amanharhintajkateru juramukuani mítetinia, juramukua arhinharhikuauati; 13jimboka Diósï imechanisï sési xéajka engaksï juramukuani kurhandirakujka, no imechani engaksï ísku kurhajka. 14Engaksï no judiouecha, juramukuani no mítetini, juramukeri arhistatsperakuani úrajka, indeksï juramukuani kángorhexatiia, nájkirukaksï no míteka, 15juramukuanksï mintsitarhu kámaxati, indeksï míakorheatia ambeksï sési úxaki o ambeksï nósesi úxaki 16ima jurhiatekua enga Diósï xarhatatspeaka enga xáni ambe patsanhetini jatsinhaka, eska Jesukristueri ambakiti aiangperakua na arhijka, ima engani ji jurhetpejka.
Judiouecha engaksï Juramukuani jupikorhejka
17T'u engari judio úkorhejka, ka juramukuaniri jupikorheni ka k'éramakorheniri engari Diósïni mítetika, 18míteskari ambe enga Diósï uéjka, kurhangusïngari ambesï sánderu sési, jimbokari juramukuani jurhendanhatixakaia, 19ka sésiri xékorhexaka imechani urherukukuani engaksï pájpakandu jámani jaka, 20ka no jánhaskatichani arhistakuani, ka sapichani jurhendaani, jimbokari mítetixaka, eska juramukua mímixekueska, ka eska jurhimbekueska. 21Ka engari máteruni jurhendani jakaia ¿Andi nóri úpirini sáni t'újku arhistakorheni? ¿Andirisï arhijtskpejki eska no sïpatsperanhaaka, ka jiniri t'u sïpani jarhani? 22Ekari uandajka eska no jánhaaka ísku jándinhani ¿Andirisï ísku jándi? Ekari ikiajka diósï eratakatechani exeani ¿Andirisï inchakuajki diósï eratakatechani ambe sïpakuani? 23T'u engari juramukua jinguni sési xékorhejka, Diósïniri nósesi pakataxaka engari juramukuani no kurhandirakujka. 24Chári jimbosï karakatarhu arhijti: “Diósï nósesi arhinhani máteru iretecharhu enga no judiouenhaka.”
25Ts'iuekuani sïkuiri p'ikujtsïkuni sési jimbo marhuasïndi, ekari juramukuani kurhandirakuska; ískuri mínda jatsikunhaka ekari juramukuani no kurhandirakuska. 26Eka no mínda jukari ma, juramukuani kurhandirakuaka ¿Andi ima no mínda jukarini exenhaa? ¿Nájkiruka no jukaka mínda? 27Ka jamberikini inde no mínda jukari enga juramukuani kurhandirakujka, índekini jámberi úati t'úngeni arhinharhikuni, engari juramukuani míteka ka míndari jukarini; ka jiniri juramukuani no kurhandirakuni. 28No tájtsïkuntkusï judiouenhajti, ka nójtu ts'iuekuarhusï mínda jukanhajti; 29ambakiti judioueni jinisï p'ikuarhenhenhajti, mínda mintsitarhusï kánhajti, no karakata jimboesti, espiritu jimboesti; k'uiripu no xétspesïndi i k'éri ambeni, Diósïsï xétspejti.
Currently Selected:
Romanos 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.