San Juan 18
18
Jesusinksï jupikastia
1Enga na indeni ambe uandapkia, Jesusi imeri jurhengorherichani jingunksï iurhekua Sedronini parhimespti, ka jurhengorheri jémbecha jingunksï echerirhu ma inchaakuspti enga jima jápka. 2Ka Júdasïjtu, ima enga intsïnharhitpeka, miuspti jima, jimboka Jesusi jurhengorheri jémbechani jinguni mémechani uéntaspka jima tángorheni. 3Júdasï jimajku niáraspti p'urhejkutichani jinguni, engaksï tátecheri urhejtsïkuticha ka fariseouecha axaapka, erajkutarakuechani jupiarini ka k'ueramu étskutini ka atajpetarakua jupikatini. 4Ka Jesusi, jimboka mítetixapka ambe enga xáni úkorhenchapiringa, kúmaaspti ka kurhamarheani:
–¿Néntsï uéksïni?
5Imaksï arhispti:
–Jesusini Nasareti anapuni.
Jesusi arhiaspti:
–Jíska.
Júdasïjtu, ima enga intsïnharhitpeka, imecha jinguni jámaxaptia. 6Enga Jesusi arhiapka: “Jíska” tátsepani ísïksï niraspti ka kuarhatserasptiksï. 7Ka ménderu uéntaspti kurhamarheani:
–¿Nénijtsï jirinhantaxamki?
Ka imaksï ménderu uandani:
–Jesusini enga Nasareti anapueka.
8Jesusi arhiaspti ménderu:
–Arhiskaksïnia eskani jíska. Ísï jimbo ekajtsïni jíndeni juka p'irani, indechani jurajkua je eskaksï níntaaka.
9Ísï úkorhespti jimboka ima uándaspka: “Eskarini xáni íntsaaka, nóma tsîtaska.” 10Jimajku Simoni Pédru tiámu atajpetarakua p'íjpaarhaspti ka táteri jántspirini t'irerkandani anapu kutsïkua kachujpandikuni. Ima jántspiri Málko arhinhasïrempti. 11Jesusi Pédruni arhispti:
–Patsantsï tiámu atajpetarakuani. ¿Andi no itsïmaa imani engarini Táte intskuka?
Jesusinksï Anasini pérakusti
(Mt 26.57-58; Mc 14.53-54; Lc 22.54)
12Ka p'urhejkutichaksï imecheri juramuti jinguni márkuksï, tiosïo kuárichani jinguni, Jesusiniksï jupikaspti ka jójkusptiksï. 13Ka urhetaksï Anasio páspti, jimboka ima Kaifasiri tarhampirispka, enga ima uéxurhini k'éri táteni jápka. 14Ima Caifasïsï arhiapti judiouechani eska sánderu sésispka eska ma ireteri jimbo ma k'uiripujku uarhipiringa.
Pédru Jesusini no míteni uandasti
(Mt 26.69-70; Mc 14.66-68; Lc 22.55-57)
15Simoni Pédru ka máteru jurhengorheri, Jesusinksï chúxapaxapti. Imani máteru jurhengorherini, k'éri táta mítespti, ka Jesusi jinguni k'éri táto ekuarhu jamberi inchaspti, 16ka Pédru uérakua jamukutini pakaraspti. Ima enga mítekatepka, uéraspti ka arhini nanakani enga incharpeni jápka eska jiáretapiringa Pédruni inchani, ka incharaspti. 17Ima nanaka enga incharpeni jápka Pédruni ahispti:
–¿Andi no t'u ima tatachiri jurhengorheri méski?
Ka Pédru uandani:
–Nómbe.
18Jántspiricha ka tiósïo kuárichaksï kurhikaspti jimboka kánekua ts'irakorhexapka, Pédrujtu imecha jinguni jurhentaxapti.
Tátecheri urhejtsïkuri Jesusini jurhengorhericheri ambe kurhamarhesti
(Mt 26.59-66; Mc 14.55-64; Lc 22.66-71)
19Tátecheri urhejtsïkuri Jesusini jurhengorheri jémbecheri ambe kurhamarhespti, kájtu kurhamarhespti ima ambesï jurhentpeni jápi. 20Jesusi arhispti:
–Ji k'amak'amasï ka iámenduechani japarini uandaska; méntkisï k'umanchekua tángorhentskuarhu ka tiósïo jurhentpeska, jima engaksï iámendu judiouecha tángorhentajka, ka nómbema táparhakuni uandaska. 21¿Andirinisï jíndeni kurhamarhejki? Imechani kurhamarhea engajtsïni kurhajchaka engani arhiaka; imaksï mítesti ji ambe engani uandaka.
22K'amaraspti ísï uandani ka tiósïo kuári ma enga jima jápka Jesusini páksanharhikuspti arhiparini:
–¿Andirisï tátecheri urhejtsïkurini ísï mókukujki?
23Jesusi uandaspti:
–Engani ambe ma nósesi uandaka, aiangpe ambe nósesi uandaski; ka ekani sési arhika, ¿Andirinisï atajki?
24Tátsekua Anasi Jesusini jójkutini Kaifasini axakuspti, imani enga k'éri tátepka.
Pédru ménderu no jiókorhesti eska Jesusini míteska
(Mt 26.71-75; Mc 14.69-72; Lc 22.58-62)
25Enga jiniani ísï úkorheni jápka, Pédru anhandetini jurhentaxapti, ka arhisptiksï:
–¿Andi no t'u inderi jurhengorheri méski?
Pédru no jiókorhespti uandaparini:
–Ji nómbe.
26Tátsekua ménderu tátecheri jántspiri ma, ima enga imani jinguni márkuepka enga Pédru kachundikupka, kurhamarhespti:
–¿Andi nókini t'úngenisï jini uéramani inde jinguni exe?
27Pédru ménderu uéntaspti no jiókorheni, ka t'arhechu jiánimendu ueraspti.
Jesusi Pilatu jinguni péranhasti
(Mt 27.1-2,11-14; Mc 15.1-5; Lc 23.1-5)
28Jesusinksï Kaifasio uératini juramukuarhu páspti. Eramarhanduesptia. Judiouechaksï no inchaspti juramukuarhu, nóksïnha járhani ka tátsekuaksïnha no úni k'uínchekua páskueri t'ireni. 29Pilatu uéraspti jima engaksï ima jápka ka arhiaspti:
–¿Íni achetintsï ambe arhiparhatasïnki?
30Imaksï uandaspti:
–Enga no nósesi ambe úripiringa, nóksïni juáchepiringa.
31Pilatu arhiaspti:
–Pántsï je ka cha arhinharhikuni je néna enga chári juramukua arhijka.
Judiouechaksï ménderu uandaspti:
–Jucha judiouecha no sésekua jatsiska némani uándikuni.
32Ka ísï jámani úkorhespti eska Jesusi na uandarini jápka néna enga uarhipiringa. 33Pilatu juramukuarhu inchantaspti ka Jesusini uandajpaspti ka kurhamarheni:
–¿Jeteru t'u judiouecheri irecheski?
34Jesusi arhispti:
–Chéti jimborinisï ísï kurhamarheni jaki, o jimbokakini máteru nema aianguska.
35Pilatu arhispti:
–¿Andi ji judioueski? Chéti ireta ka tátecheri urhejtsïkurichaksïnisï t'úngeni jíndeni intsïnharhitati. ¿Amberi niátaski andi?
36Jesusi arhispti:
–Jucheti irechekua no ixu parhakpeni anapuesti. Eka ambe jucheti irechekua ixu parhakpeni anapuepiringa, jucheti ireta uarhipepirindia eskani no judiouechani intsïnharhitanhapiringa: Enga úka, jucheti irechekua no ixu anapuesti.
37Ka Pilatu jiájkani k'óru kurhamarhespti:
–¿Ka ísï jámaniri irecheskia?
Jesusi arhispti:
Jo eskari na uandaka, Irecheska. Ji indeni únisïni andajpenuka ka indeni únisïni juka íni parhakpeni: Eskani xarhataaka ambe enga ísïka. Ne engaksï imani jingunika enga ísïka, kurhajchasïndijtsïni.
38Pilatu arhispti:
–¿Ka ambesï ísïia?
Nóksï uékaspti Jesusini jurajkuni
(Mt 27.15-31; Mc 15.6-20; Lc 23.13-25)
Enga ísï kurhamarhepka, Pilatu ménderu uéraspti judiouechani arhiani:
–Ji íni achetini nómbema nósesi xékuntasïnga. 39Eka úka, chári p'indekua jimbo, jatsiskaksïni páskua jimbo ma jupikatani jurajkucheni: ¿Uéksïntsï eskaksïni judiouecheri irechani jurajkucheaka?
40Ménderuksï uéntaspti uinhachani:
–¡Imani nómbe! ¡Barrabasini jurajku! Ka jini Barrabasi sïpajkurha mespti.
Currently Selected:
San Juan 18: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.