Efesios 2
2
Diósïjtsïni uarhikuarhu p'ímutantasti
1Ka chánksïni engajtsï chári no kurhandirakua jimbo ka chári k'amanharhintskua jimbo uarhirini jápka, 2jiájkani engajtsï ísï irekani jápka eska parhakpeni na nósesi jánhka, nóambakiti enga nóambarhati espirituechani juramukuajka engaksï tarhiatarhu ísï jámka; imaksïni juramuchesïrempti, ima espiritu enga no kurhandirechani juramukuani jáka. 3Juchajtuchi iámenduecha májkueni irekaxapka, nósesi ambejku tsitiparini ka nósesi ambe eratseparini, ka Diósïjtsïni juchantsïntu jatsipirindi ikimeni. 4K'óru Diósï enga xáni tekaatspentajka, ka xáni engajtsïni xénhchajka, 5engachi jucha ísï juchari no kurhandirakua jimbo uarhirini jápka, Krístu jinguntsïni tsítantasti, ka chájtsï p'ímutanhantaska Diósïri kóntperakata jimbo, 6Diósïjtsïni Krístu jinguni tsítantasti ka Krístu jinguntsïni auandarhu uaxastasti, 7ka Diósï, ísï méntkisï xarhataati na enga xáni kánekua kóntpejka, na engajtsïni juchantsïni Krístu Jesusi jimbo xáni kóndpejka. 8Cháchkajtsï Diósïri kóntperakuani jakajkutini p'ímutantskorheska; chájtsï no jandiojku jatini p'ímutantskorheska, jinisï Diósïri kóntperata méti; 9ka nójtu chári jángua jimboesti, ísï jimbo ásïchka nema k'éramakorheni jaue. 10Acha Kuerajpirijtsïni kueraasti ka Krístu Jesusi jimbojtsïni sési jájkusti, eskachi sési jámaaka eskamendu Diósï na eratsetini jápka eskachi jámapiringa.
Iámenduechachi májkueska
11Ísï jimbochka, míantsï je eskajtsï cha no judio andajpenuska, ka eskaksïni judiuecha arhiparhatani jarhasïrempka eskajtsï cha no pasïri p'ikujtsïkumenhaska. 12Chájtsï Krístuni kánekua jarharetixapka, ka iauani jarhaspti eskajtsï Israeli anapuepiringa, ka aiatsperakatantsï no míndamenhatixapka, ka nójtsï mintsikaxapka ka Diósïntsï parhakpeni no kángorhesïrempka. 13Iásï cha engajtsï Krístuni kánekua jarharetini jápka, Krístueri iurhiri jimbojtsï cha Diósïni andarheraxakaia.
14Jimboka juchari sési jakua Krístueska: Enga tsimani iretechani májku úntaka, k'amajkusti ikiatsperata ambe, enga arhukpempka. 15Krístu imeri k'uiripekua jimbo k'amajkusti ambe enga xáni juramukua úrpempka ka uinhamarhetspeni, ka ima tsimani iretechani sési pájperakua jimbo májku úantaasti, 16ka enga krúsirhu cháparhatanhaka, tsimani iretechani Diósï jingunirantaasti ka májku anhanhatakua úntasti ka arhirperatani k'amajkusti.
17Ima jurhasti sési pájperakua ambeksïni aianguntani chánksïni engajtsï Diósïni kánekua jarharetini jápka, ka imechani engaksï no iauani jakupka. 18Jimbokachka Krístuni jimbo, iámenduechachi úsïnga májku Espirituni jimbo Táteni andarherani. 19Ísï jimbochka chájtsï nóteru uérakua anapueskia, iásïjtsï Diósïri ireta jingunintaskia, ka engajtsï Diósï uájpentakia márkujtsï irentaskia. 20Chájtsï imeri k'umanchekueska engaksï Jesusiri uandakua páricha ka Diósïri uandaricha pítsekueka, ka Krístu k'éri pítsekuesti enga k'umanchekuani p'ínguni jaka. 21Ka Krístuni jimbosï k'umanchekua sési uinhapekorhejti, ka imani jimbosï uinhapejti ka k'éni enga Acheri pímpinhasï k'umanchekua úntajka. 22Chájtu engajtsï Krístu jingunintaka, ima k'umanchekuentaxakajtsï nani enga Diósï irekaka imeri Espirituni jimbo.
Currently Selected:
Efesios 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.