2 Tesalonicenses 3
3
Uandamukukorhekua kurhajkorhekua
1K'amarhuni jámani, erachicha, sáni juchantsïni jimbojtu uandamukukorhe je, ka eska ísï jámani Acheri Uandakua sánderu etsakurhiaka ka eska sánderu k'érikuarhu niáraaka, ísï eskaksïni chánksïni na niáracheka, 2ka eskajtsïni kuájpeaka, nójtsïni ísku jándicha ka nósesi ambe niátaticha ambema úcheni; jimboka jakajkukua no iámenduecheriska. 3Acha no méni jurajkpiristi; imajtsïni uinhaperaati ka exentsïni jarhani eskajtsïni Nóambakiti nómbema úcheaka. 4Juchaksïni chánksïni nósani chéjkusïnga eskajtsï ísï jámka, ka eskaterujtsï ísï jámaaka eskaksïni na juramucheni jaka. 5Eska Acha urhekupaaka chári p'ikuarhenhekua Diósïri xénhchperatani andarherani ka Krístueri tekaantskua jurhengorheni.
K'uanisïndi ánchekorheni
6Erachicha, Acha Jesukristueri juramukua jimboksïni arhixaka eskajtsï jarhareauaka imechani engaksï nónanimaru irekorheni jaka, ka engaksï no ísï irekani jaka eskajtsï cha juchantsïni jinguni na jurhengorheka. 7Míteskajtsïa néna enga uétarhejka eskajtsïni eranhekua p'itacheni jauaka, jimboka, jucha, engachi cha jinguni jámani jápka, nóksïni méni xépekua xarhatacheska, 8ka nójtuchi méni némani ambe euamukuska, sánderu sánichi chúrekua ka jurhiakua no kuatantaska ánchekorheni ka ísï jámanichi nónemani chánksïni ójkutaska. 9No jimbokachi no andakorhetini jatsipka, sánderu sániksïni, chánksïni exeranisï ísï jámapka, eska chájtu ísï jámaaka. 10Ka támu, jiájkani engachi cha jinguni jámani jápka juramuchespkaksïni eska, enga ambe nema no uéjka ánchekorheni, ásï t'ire. 11Jimbokachi aiangunhaska eskaksï máru, jimini nónanimaru irekaxaka, eskaksï no ánchekorhesïnga, sánderuksïnha arhisïndi máteruechani inchaakukuani. 12Imechanichi, Acha Jesukristuni jimbo arhiaxaka eskaksï jángorheaka ánchekorheni, ka táchani ísï t'irekua andakorhenhe.
13Iáchka je erachicha, ásï jáma je kuatantani sési ambe niátani. 14Eka nema no kurhandirajka eskaksïni na juramucheni jaka íni karakatarhu, k'uratseta je, ka ísku xe je, jurajku k'uratsetakorheni. 15K'óru ásï juchari ikiatspirini exe je; sánderu sáni ísï xuka je eska juchari erachi nemeni.
Uandanuntskua
16Eskaksïni Acha sési jakueri, íntskuaka méntkisï ka iápuru ísï sési jakua. Eska Acha cha jinguni jauaka. 17Uandajperataksïni jucheti jájki jimbosï axacheni jaka, ji Páblu. Iámendu karakatecharhu engani axaajka ísï ts'ïrimerasïnga. 18Ka eskaksïni Acha Jesukristu kóndeni jauaka.
Currently Selected:
2 Tesalonicenses 3: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.