2 Corintios 2
2
1Ji nóteruni tekaaxapkia chánksïni nirani uandanheatani, 2nóchkani ji cha jimbosïni tsípejki andi, ka ekaksïni uandanheataska, ¿Andi ne jimboteruni tsípeni jaua? 3Ka nóchkaksïni uékaspka uandanheatani, jimboksïnisï karachepka, jíchkani cha jimbo tsípentasïnga ka sésiksïni mítetixaka eska niárantsïni sési exeni jarhani, chájtujtsï sési p'ikuarherantasïnga. 4Kánekuaksïni mískorheparini karachespka ka uandanheaparini, no jimbokaksïni uékapiringa nósesi p'ikuastani, jinisïni uéjka eskajtsï iámenduecha míteaka na engaksïni kánekua xénhchajka.
Páblu k'amanharhintspiri máni púakuntasti
5Nóchi jukari arhiaka íni ambe, inde engarini nósesi p'ikuastaka, chánksïntu pájtamaxati nósesi p'ikuastani, 6sésku jati engajtsï cha arhikia, 7k'óru sánderu sési jauati ekajtsï púakuntaska ka sési arhintani, jimboka tsîncheni jámaka xáni mískorheni. 8Kómarhixakachkaksïni eskajtsï sési arhintaaka. 9Exekuekaxapka náxantsïni kurhajchasïnki jimboksïnisï karachepka. 10Ka néni engajtsï cha púakuntaaka, jíjtuni púakuntaaka, eka púatani uétarhini jaka. Jíjtuni Jesukristuni jimbo púatspentaaka ekajtsï cha púatspentaska, 11ásïchkajtsïni Nóambakiti terungute, jimbokachi mítetixaka néna enga terungutpejka.
Páblueri uandanheata Troasi iretarhu
12Engani Troasi niárapka Jesukristueri ambakiti aiangperakuani uandantani, sóntku tángorhenhantaspti Acheri ambe kurhakuekanhani, 13k'óruni ji sóntku uéakuntaspka ka Masedonia niraspka jimbokani nósesi p'ikuarhenhexapka jucheti jarhojpiri Títuni no xéntatini. 14Jíchkani Diósïni diósïmaiamu arhixaka, engajtsïni Krístuni jimbo pájka nani engachi sési uéranchaaka, ka juchantsïni jimbo imeri jurhentperakua etsakorhepaxati. 15Jimbokajtsïni Diósï, Krístueri p'untsumekua jimbosï mítentajka, p'ímutantskatechani ka tsînchekatechani. 16Máruksï uarhirini jájkundini jarhasïndi, ka máteruksï p'untsup'untsujkundini jarhasïndi. Ka ¿Nésï ua íni ambe kurhanguni? 17Jimboka jucha no tumina andakuekaxamka Diósïri aiangperakuani uandantani, ísï eskaksï uánekua na jámani jaka. Jucha sési jimbo Diósïriska, ka Diósïni japarini Krístueri ambechisï uandantajka.
Currently Selected:
2 Corintios 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.