Koloseǁîn 1
1
1Paulub, Elob ǂâisa ǃoa a Xristub Jesub di aposteli* tsî sada ǃgâsab Timoteub hâkha xu.
2Elob di khoen Koloses ǃnâ hân tsî Xristub ǃnâ a ǂgomǂgomsa ǃgâsana ǃoa:
ǀKhommi tsî ǂkhîba sada ǁGûb Eloba xu.
Ganganǀgores
3Sikhom ge hoaǁae Elob tsî ǁGûb sada ǃKhūb Jesub Xristub diba ra gangan, sado khom ga ǀgorebao. 4Sikhom ge sadu di Xristub Jesub ǃnâ ǂgoms tsî hoa khoen Elob dina du ūba hâ ǀnammi xa ge ǁnâu, 5ǁnā ǃâubasens hîa du ǀhommi ǃnâ ūbahe hâs ǃaroma. ǁÎs hîa du ge amab di ǃGâiǂhôas ǃnâ ǀnai a ǁnâus, 6sadu tawa ge sīsa. ǃHūbaib hoaragab ǃnâs ge ǃGâiǂhôasa ǂûtani tsî ra ǀomkhâi, ǁnā tsēs hîa du ge ǁîsa ǁnâu tsî Elob di ǀkhommi a ama ǃkhaisa ǂansa xu. 7#Kol. 4:12; Flm. 23Sadu ge Epafrab, sikhom di ǀnamsa ǃoabaǁare-aob, Xristub di ǂgomǂgomsa ǃoaba-aoba xu ǁkhāǁkhāsen khami. 8ǁÎb ge ǁkhāti sadu di ǀnammi Gagab ǃnâ hâba sikhoma ge ǂhaiǂhaiba.
9ǁNā-amaga khom ge sikhom tsîna ǁnâu khom ge tsēsa xu ǀûs ose ra ǀgoreba du, sadu nî ǁîb ǂâisa ǂans ǀkha ǀoaǀoahe ǃkhaisa, hoa gā-aisib tsî gagasi ǁnâuǃāb ǃnâ. 10Î du ǃKhūba anu hâse ûi, ǁîba ǃgâiba ǀgaus hoas ai. Î du mâ ǃgâi sîsenni hoab ǃnâ ǂûtani tsî Elob di ǂans ǃnâ ǀomkhâi. 11A du hoa ǀgaib ǀkha ǀgaiǀgaihe, ǁîb ǂkhaisib di ǁkhāsiba ǃoa, hoana du nî taniǀnamxasib ǀkha mâǃkharuse. ǃGâiaǂgaob ǀkha 12ǁGûb, ǃanun ǀumis di ǃnâb ǃnâ hâsa amǃnâxasa ra ǁkhā kaiba ra ganganse. 13ǁÎb sada ǃkhaenab di ǀgaiba xu ore tsî ǁîb di ǀnamǀnamsa ǀGôab di gaosib ǃoa ge sī-ūb, 14ǁîb ǃnâ da ores, ǁoren ǀûbasa ra hōba.
Xristub di sîsenni
15Xristub, hoaraga kurus di ǂguroǃnaesab ge a Elob mûheǁoasab di ī. 16ǁÎb ǃnâ-u tsî ǁîb ǃaroman ge hoaraga xūn ǀhommi ǃnâ tsî ǃhūbaib ai hâna ge kuruhe: Mûhesan tsî mûheǁoasan, trondi tamas ka io ǀgaigu, danaǂgaeǂgui-aon tamas ka io ǁkhāsigu, ǁîn hoana. 17ǁÎb ge hoaraga xūn aiǃâ hâ tsîn ge hoaraga xūna ǁîb ǃnâ ǀguipa hâ. 18#Efe. 1:22-23ǁÎb ge a soros di dana, ǁnāb ge kerkheba; ǁîb ge a tsoatsoa, ǂguroǃnaesaba ǁō hâna xu, hoa xūn ǃnâb nî ǂgurose. 19Elob di ǀoasib hoab ge ǁîb ǃnâ ǁans ǃnâ ǃgâiǃgâibasensa ge ūhâ i. 20#Efe. 2:16Tsî ǁîb ǃnâ-u hoa xūnab nî ǁîb di ǃgâuhaib* ǀaob ǃnâ-u, ǃhūbaib ais kas, ǀhommi ǃnâs kas hoasa ǂkhîbagu kaibasense.
21ǁKhāti sadu, ǀnî ǁae-i ai ge Eloba xu ǃnū hâ i do, sadu di ǂkhaba sîsengu tsî ǂâidi tsîn ge sado ǁîb di khākhoese ge dī. 22Xawe du ge nēsi ǁîb Ôab di sorosi ǁōb ǀkha ǂkhîbagu kaihe hâ, ǃanu, ǂnao-o tsî ūoseb nî sado ǁîb aiǃâ mâi-aiǃâse. 23Tsî du ge amase ǁaposase ǃgaoǃgaosase ǂgoms ǃnâ nî hâhâ tsî ǃGâiǂhôas di ǃâubasens, ǀhommi ǃnaka hâ kurusaben hoan ra aoǁnâhes rase ǁnâus, ǁîsa xu ta ge tita, Pauluta ǃoaba-ao kaisa xu ǁnobeǁnobehe tide.
Paulub ge kerkheb di ǃoaba-aose ra sîsen
24O ta ge ti tsâgu sadu ǃaroma ta gere tsâgu ǃnâ ra ǃgâiaǂgao, tsî ti sorosi tsâgu ǀkha ta ge Xristub di tsâb ǃnâ ra tôasina ǁîb soros hîa a kerkheb ǃaroma ra ǀoaǀoa. 25ǁÎb ǃaroma ta ge a ǃoaba-ao kaib, Elob ge mā te ǃereams, ǁîb ǀoasasib âb ǃnâ ǁîb mîsa sado mās disa. 26ǁNā mîs hîa kurigu tsî ǁaeǃgâde ge sado ǂganǃgâsaba is, xawe nēsi ǁîb di ǃanuna ra ǂhaiǂhaibahesa. 27ǁÎn tawab Eloba ǁîb di ǂkhaisa ǃkhūsib di ǂganǃgâsasib Jodeǁî taman* ǁaegu hâba ra ǂanǂan ǂgao, ǁnāb ge Xristub, ǂkhaisib di ǃâubasenni, sadu ǃnâ hâba. 28Sida ge ǁîba ra aoǁnâ, mâ khoe-i hoa-e ǃkhâikhom tsî mâ-i hoa-e hoa gā-aisib ǃnâ ra ǁkhāǁkhāse, mâ khoe-i hoa-e da Xristub ǃnâ kaiǂâu-i hâse nî mâi-aiǃâse. 29ǁÎb ǃaroma ta ǁkhāti ǀgaisase ra sîsen, Xristub ra mā ǀgaib hîa tita ǃnâ ra sîsenni ǀkha.
Currently Selected:
Koloseǁîn 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.