2 Korinteǁîn 11
11
Paulub tsî ǂhumi apostelgu*
1ǂGao ta ra ǂkharirose du nî taniǀnam te, gârese ta ga tanisen ǃnubai ǃkhaisa. Ā taniǀnamxaba te du re! 2Sado ta ra tau Elosi tauxasib ǀkha amaga ta ge sado ǀgui aob, Xristub* ǀkha nî ǃgame ǃanu oaxaese ra mîmâiba. 3#Gen. 3:4Xawe ta ra ǃao, sadu ǂâidi nî Xristub ǃnâ du ūhâ ǂgomsa xu ǂgaeǂhapuhe ǃkhaisa, ǀaob ge Evasa gāxaǃnâsib âb ǀkha ǂgaeǂhapu khami. 4ǀNî-i ga hā tsî ǀnî Jesub sige aoǁnâ tamaba aoǁnâ, ǀkhara Gagab tsî ǀkhara ǃGâiǂhôas tsîra, hō tsî du ge ǃkhōǃoa tama hâ ira, o du ge ǁîn ǃnâ ra māsen.
5ǁNā apostelgu, hoan xa kaigu ǃgâ-ai ta ǂkhari tama ti ta ge ra ǂâi. 6ǁKhāǁkhāsa tama ǃhoa-aota ka, xawe ta ge tare-e ta ra ǃhoa ǃkhaisa a ǂan. Nēsa ta ge sado mâ ǀgaus hoas ai ǃgāsase gere mîǃāba.
7ǃGamǃgamsen tsî ta ge sado ǀgapiǀgapis ǃaroma, marioǃnâse Elob di ǃGâiǂhôasa aoǁnâ ǃkhais ǀkha ta kha ge ǁore? 8Nau kerkhega xu ta ge mataresa gere ǃkhōǃoa sado ta nî ǃoabase. 9#Fil. 4:15Sadu tawa ta ge hâ i, o ta ge ǂhâsina ta ge ūhâ i, xawe khoe-i xare-e ǃgomsib ase ge ība tama hâ i, ti ǃgâsagu, Masedoniaba xu ge hāgu ge ti ǂhâsigu ǃnâ dīǀoaǀoa xui-ao. Hoan ǃnâ ta ge sado ǃgomsib ase ge ība tama hâ i tsî ta ge ǃaruǀî ǁnāti nî tanisen. 10Xristub di amab tita ǃnâ hâs ǁkhās khamis ge nē koasensa Axajab di ǀkharigu ǃnâ tita ūǀhanahe tide. 11Tare-i ǃaroma? Sado ta ǀnam tama amagasa? Elob ge sado ta ǀnam ǃkhaisa a ǂan.
12Nēsi ta ra dī-e ta ge ǃaruǀî nî dī, ǁîgu koasens di ǀapede ta nî ǃkhomǃnâ tsî gu ǃgaoǃgao-i, sige sîsenni ǁîgu dib ǀkha a ǀguitikō ti gu nî mî-e ūhâ tidese. 13ǁNāti ī khoegu, Xristub di apostelgu ase ra ǀkharaǀkharasengu ge ǂkhaba apostel tsî a gāxaǃnâ ǃoaba-ao. 14Tsî ǁnās ge buruxa tama hâ, Satanni* ǂûb kom ǃnâb di ǀhomǃgāse ra ǀkharaǀkharaseno, 15o i kom kai xū tamao, ǁîb ǃoaba-aogu tsîn ga ǂhanu-aisib di ǃoaba-aose ǀkharaǀkharaseno. ǁÎgu ǀams ge ǁîgu di sîsengu khami nî ī.
Paulub ge ǃGâiǂhôas ǃaroma ra tsâ
16ǁKhawa ta ra mî, a i tā khoe-e tita, gârekhoeta a ti ǂâi, xawe ti du ga ǂâi, o gârekhoese ǃkhōǃoa te, î ta ǁkhāti ǂkharirose koasen ǁkhā. 17Ti gâre ǂgomǃgâsens nēsi ta ra ǃhoa-ūs ge ǃKhūba xu hâ tama hâ, xawe koasens ǀguisa ī. 18ǂGuin khoesi ǀgaub ǃoa ra koasen amaga ta ge tita ǁkhāti nî koasen. 19Sadu ge ǁnātikōse a gā-ai, xawe du ge gâre khoena ra tani. 20Khoe-i ga sado khobodī, gāxaǃnâ, ūǀhana, ǃgôaǁnâ tamas ka io ais ǃnâ ǁapu, o du kom ra tanio. 21Ti taosib ǃoa ta ge ǁîsa ra mî, sige ge ǁnā xūna dīs ǃaroma kaise ǂkhabusa i amaga.
Nēsi ta ge gâre khoe-i khami ra ǃhoa. Khoe-i ga xū-i xa koaseno, o ta ge tita tsîna ǁnāsa a dī ǁkhā. 22Hebreǁîga? Tita tsîn. Israelǁîga? Tita tsîn. Abrahammi suriga? Tita tsîn. 23#ǃNǃkh. 16:23; 2Kor. 6:5Xristub ǃoaba-aoga? Nēsisa ta ge ǃkhau hâ khoe-i khami ra ǃhoa. Tita ge ǁîgu xa ǃnāsase a ǃoaba-ao. ǁÎgu xa ǃnāsase sîsen, ǃnāsa ǃnāde ǃkhōsis ǃnâ hâ, ǃnāsase ǂnauhe tsî ǃnāsa ǃnāde ǁōb di ǃaorosasib ǃnâ ge hâ i. 24#Deu. 25:3Koro ǃnādi kōse ta ge ǁnaetisa ǃnonadisikhoeseǀa ǂnauǃnabaga Jodeǁîna xu ge ǃkhōǃoa. 25#ǃNǃkh. 16:22; 14:19ǃNona ǃnāde haigu ǀkha ǂnauhe, ǀgui ǃnāsa ǀuiǁhomhe tsî ta ge ǃnona ǃnāde doe-ommi tsūǃgâb ǃnâ ge hâ i, ǁîdi di ǀguisa ta ge tsēs tsî tsuxuba ǃgam hurib ǃnâ ge hâ i. 26#ǃNǃkh. 9:23; 14:5ǃNāsase ta ge daob ai, ǁkhōsib dâu ra ǃāgu dib, ǁkhâuǁnâ-aon, ti khoen Jodeǁîn tsî Jodeǁî taman* ǁaegu, ǃādi tsî ǃgaroǃhūb ǃnâ, hurib ai tsî ǂkhaba ǃgâsagu ǁaegu, 27ǃgom sîsenni, ǀhupub tsî ǃnāsa ǃnāde ǁom tamase hâs ǃnâ, ǃâs tsî ǁgâs, ǂgui ǃnādi ǁaeba ǂû-i ose hâs, ǃkhaib tsî ǀōǀkhāsib tsî ǃaorosasigu ǃnâ ge hâ i. 28Nē xūn hoan xōǀkhās ge kerkhegu hoagu xa ta ūhâ ǂhansensa tsēkorobe ge hâ i. 29Khoe-i ga ǂkhabusa, o ta ge tita tsîna ǂkhabusase ra tsâ. Khoe-i ga ǁore, o ta ge tita tsîna ǃnākhoesib ǃnâ ra ǂhubi.
30Koasen ta ka, o ta ge ti ǂkhabusasiga ra ǁgauǂui xūn xa nî koasen. 31Elob ǁGûb, ǃKhūb Jesub Xristub dib, hoa ǀamosib kōse ǀkhaehe hâb ge ǂhumi tama ta hâ ǃkhaisa a ǂan. 32Gao-aob, Aretasi di gowoniab ge Damaskusa ǁnāpa ta ge hâ i ǁaeb ai ge ǃûi kai, titab nî ǃkhōse. 33Xawe ta ge ǂnubiǂgoab ǃnâ ge hâ i mûǂuidaosa-ū ǀharu-i ǃnâ ǁgôa kaihe tsî ǁnā ǀgaus ai ǁîba xu ge ǃkhoeni.
Currently Selected:
2 Korinteǁîn 11: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.