1 Tesalonicenses 1
1
Imapisopita yonquiaton, nanan aꞌpatërinsoꞌ
1Ca Paonoco ninshitaranquëmaꞌ, niꞌcoꞌ. Noyanquëmaꞌ canpitantaꞌ. Noya quiyantaꞌ yaꞌhuarai. Yaꞌipi Yosë imaramasopita Tisaronicaquë yaꞌhuëramasoꞌ ninshitaranquëmaꞌ. Siripano, Timotio, inapitantaꞌ isëquë yaꞌhuapi. Inapitaroꞌcoi nanan aꞌpatarainquëmaꞌ. Canpitantaꞌ Tata Yosë chinotatomaꞌ, Sinioro Quisocristo imaramaꞌ. Inaora nohuanton, Yosë noya catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ, tënahuë.
Cancanëna quëran huarëꞌ imapisoꞌ
2-3Nani tahuëri canpita marëꞌ Yosë nontërai. Tata Yosë natëtomaꞌ, noya ninamaꞌ. Ninosoroatomaꞌ, naꞌcon nicatahuaramaꞌ. “Sinioro Quisocristo co onporontaꞌ naniantarinpoahuëꞌ. Inasáchin ninarëhuaꞌ,” taꞌtomaꞌ, chiníquën cancantëramaꞌ. Napoaton yonquiatëinquëmaꞌ, Tata Yosë nontërai: “Ma noya Tata catahuaran niꞌton, cancanëna quëran huarëꞌ imasarinënquën. Ina marëꞌ ‘Yosparinquën,’ itërainquën,” itërai Yosë nontatoi. 4Tata Yosë naꞌcon nosororinquëmaꞌ, iyaroꞌsaꞌ. Nani huayoninquëmaꞌ huëntonënquë yaꞌconacaso marëꞌ. Nani ina nitotërai. 5Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.
6Ina marëꞌ aparisitopirinacoihuëꞌ, noya cancantërai. Canpitantaꞌ Yosë nanamën noya natanamaꞌ. Imaramaso marëꞌ aparisitopirinënquëmahuëꞌ, Ispirito Santo catahuarinquëmaꞌ niꞌton, nóya cancantëramaꞌ. Quiya pochin cancantatomaꞌ, chiníquën cancantëramaꞌ. Nonanpatamacoi, Quisocristo chachin nonanaramaꞌ. 7Parisitapomarahuëꞌ, co aꞌporamahuëꞌ. Nóya imaramaꞌ niꞌton, aꞌnapita imapisopitantaꞌ natantopi. “¡Ma noyacha inapitasoꞌ imapi paya! Ina pochin Quisocristo imacasoꞌ yaꞌhuërin,” topi. Yaꞌipi Masitonia parti, Acaya parti, inaquëpita napopi. 8Noya imaramaꞌ niꞌton, yaꞌipi inaquë yaꞌhuëpisopita nicatënënquëmaꞌ, yonquipi. Naporahuaton, yaꞌipi ina parti nahuinin. Co quiyari shaꞌhuitopiraihuëꞌ, yaꞌipiya nitotopi. 9Inapita chachin canpita naporamasoꞌ shaꞌhuiantapi: “Paono niꞌquihuachincoira, noya aꞌchintërincoi. Noya natanatoi, aꞌnaroáchin natërai. Mamanshi aꞌporahuatoi, Tata Yosëíchin chinotërai. Ina imarai huachi. Yosësoꞌ nanpirárin. Inasáchin chinotacasoꞌ yaꞌhuërin. 10Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.
Currently Selected:
1 Tesalonicenses 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.