Colosenses 4
4
1Aꞌnaquëmaꞌ patronquëmaꞌ ninamasoꞌ. Piyapinëmapita nosoroatomaꞌ, noꞌtëquën pahuërëcoꞌ. Ama topinan quëran anaꞌintocosohuëꞌ. Canpitantaꞌ huaꞌanëmaꞌ yaꞌhuëtërinquëmaꞌ. Yosë inápaquë yaꞌhuaponahuëꞌ, yaꞌipinpoaꞌ huaꞌanëntërinpoaꞌ.
Piquëran huarëꞌ pënëntërinsoꞌ
2Nani tahuëri Yosë nontocoꞌ. Ama amiatomahuëꞌ, nontácoꞌ. Ama topinan nontocosohuëꞌ. Yaꞌipi cancanëma quëran huarëꞌ noya yonquiatomaꞌ, nontocoꞌ. “Yosparinquën Sinioro,” itocoꞌ. 3Quiya marëntaꞌ Yosë nontocoꞌ. Paꞌsápato, Quisocristo nanamën aꞌchinpirahuëꞌ. Ina marëꞌ tashinan pëiquë poꞌmorinaco. Naꞌa piyapiꞌsaꞌ co nanamën nitochátërapihuëꞌ. Inahuantaꞌ nitochinaꞌ. Napoaton Yosë nontohuatamaꞌ, quiya marëntaꞌ nontocoꞌ catahuaincoi aꞌchintohuatoira, Yosë nanamën nohuanchinaꞌ. 4Yosë nontocoꞌ noya aꞌchinchi noꞌtëquën nitotacaiso marëꞌ. Ina pochin aꞌchinaꞌhuasoꞌ yaꞌhuërin.
5Co imarinsopitasohuëꞌ huëꞌpachinaꞌ, noya nontocoꞌ. Ama tapanatomahuëꞌ, noya aꞌchintocoꞌ. Onpopiontaꞌ noya nanan shaꞌhuitocoꞌ. 6Noya yonquiatomaꞌ, sanoanan quëran pënëntocoꞌ noya natainënquëmaꞌ. Yashin yashin nontocoꞌ. Aꞌnaya aꞌnaya natanpachinquëmaꞌ, noyasha aꞌpanicoꞌ. Ina pochin nontacaso marëꞌ naꞌcon yonquicoꞌ.
Nipayarinsopita napopisoꞌ
7Iya Tiquico aꞌpataranquëmaꞌ. Inasoꞌ nóya niꞌnahuë. Iyahuë pochachin nosororahuë. Noya catahuarinco. Inantaꞌ Sinioro natëton, noya nanan aꞌchinarin. Onpopinsona yaꞌhuërahuësoꞌ shaꞌhuitarinquëmaꞌ. 8Canpitantaꞌ onporaisona nitotacamaso marëꞌ aꞌpataranquëmaꞌ. Achinicancainquëmaso marëntaꞌ aꞌpataranquëmaꞌ. 9Iya Onisimontaꞌ paꞌsarin, canpitataquë yaꞌhuërinsoꞌ. Inantaꞌ iyahuë pochin nosororahuë. Yosë natëton, noya imarin. Inapita canconpachinaꞌ, yaꞌipi isëquë yaꞌhuëraisopita maꞌsona onporaisoꞌ shaꞌhuitarinënquëmaꞌ.
10Aristarcontaꞌ isëquë yaꞌhuërarin. Quisocristo imarinso marëꞌ tashinan pëiquë poꞌmopi antaꞌ. Inantaꞌ yonquiarinquëmaꞌ, saludos aꞌpatarinquëmaꞌ. Marcontaꞌ saludos aꞌpatarinquëmaꞌ. Inasoꞌ Pirnapi quëmopinën. Canpitataquë paꞌpachin, noya nontatomaꞌ, catahuacoꞌ tënahuë. Nani ina shaꞌhuitëranquëmaꞌ. 11Quisoso Costo itopisontaꞌ yonquiatënquëmaꞌ, saludos aꞌpatarinquëmaꞌ. Inapitasoꞌ cotio piyapiꞌsaꞌ niponaraihuëꞌ, Quisocristo imasapi. Ca pochin aꞌchinapi aꞌnapitantaꞌ Yosë huaꞌanëntërinquë yaꞌconacaiso marëꞌ. Ina marëꞌ nóya cancantërahuë. Inapitasoꞌ achinicancaninaco. Aꞌnapita cotioroꞌsaso nipirinhuëꞌ co catahuarinacohuëꞌ. 12Ipapërasëntaꞌ canpitataquë yaꞌhuërinsoꞌ saludos aꞌpatarinquëmaꞌ. Inantaꞌ Quisocristo natëton, noya nanan aꞌchinarin. Nani tahuëri canpita marëꞌ Yosë nontárin. “Catahuaquëꞌ Sinioro yaꞌipi nohuantëransoꞌ nitochinaꞌ. Noya nitotatonaꞌ imamiachinën,” itárin. 13Naꞌcon yonquirinquëmaꞌ. Co chirorinhuëꞌ Yosë nontacasoꞌ. Naotisiaquë, Iraporisëquë inaquëpita yaꞌhuëpisopitantaꞌ yonquiaton, Yosë nontárin. Noya Yosë marëꞌ sacatarin. Cari niꞌnahuë. 14Nocasëntaꞌ saludos aꞌpatarinquëmaꞌ. Inasoꞌ notoro. Inantaꞌ iyahuë pochin nosororahuë. Timasëntaꞌ inapochachin yonquirinquëmaꞌ.
15Imapisopita Naotisiaquë yaꞌhuëpisopitantaꞌ saludos aꞌpatarahuë. Ninpantaꞌ yonquirahuë. Ina pëinënquë Quisocristo imapisopita niyontonpi. Inapitantaꞌ saludos aꞌpatarahuë. 16Iso quirica nontocoꞌ yaꞌipi imapisopita natainaꞌ. Nani nontohuatamaꞌ, Naotisiaquë aꞌpatocoꞌ imapisopita nonchinaꞌ. Inapitantaꞌ nisha ninshitato, aꞌpatërahuë. Ina quiricantaꞌ canpitari nontocoꞌ. 17Arquipo shaꞌhuitocoꞌ: “Ama chirotonhuëꞌ, yaꞌipi Sinioro camairinquënsoꞌ natëquëꞌ,” itocoꞌ.
18Ca Paonoco naꞌcon yonquiatënquëmaꞌ, saludos aꞌpataranquëmaꞌ. Caora imirahuë quëran isoíchin ninshitaranquëmaꞌ. Tashinan pëiquë yaꞌhuarahuë. Ama naniantocosohuëꞌ. Yosë inaora nohuanton, noya catahuainquëmaꞌ. Nani ninshitëranquëma huachi.
Paono
Currently Selected:
Colosenses 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.