Jon 1
1
Laj Jonás ki'elelik chiru li Yos
1Li Qaawa' kiraatina laj Jonás,#1,1 2 R 14,25. ralal laj Amitay, ut kixye re: 2“Kawresi aawib' ut ayu Nínive, li xnimal ru tenamit, ut ye reheb' naq chalk re li tojb'amaak sa' xb'eeneb', xb'aan naq toj wik'in xwulak resil li xmaa'usilaleb'”.#1,2 Nah 1,1; 3,1-19.
3Ab'anan laj Jonás kixkawresi rib' re elelik chiru li Qaawa' ut koho Jope, ut aran kixtaw jun li jukub' xik xik re Tarsis. Kixtoj li xxikik ut ki'ok chisa' re wulak Tarsis, najt rik'in li Qaawa'.
4Ab'an li Qaawa' kixwaklesi jun kawil iq' chiru li palaw, ut kiwakliik jun kaqsut-iq' li kach'in chik maa kixjuk' li jukub'. 5K'ajo' naq kichalk xxiweb' laj b'eresinel re li jukub', ut li junjunq ki'ok chi tijok chiru li xyos. Chirix chik a'an ke'xkuti chi ha' li k'a'aq re ru reheb' re xseeb'ob'resinkil li riiq li jukub'. Ab'an laj Jonás kox'okaq sa' xyanqeb' li iiq, taq'a, sa' li jukub', ut sa xwara aran.
6Toja' naq laj eechal re li jukub' kinach'ok wan wi' laj Jonás ut kixye re: “K'a'ut naq yookat chi wark arin? Waklin ut tijon chiru laaYos. Mare anchal taaruxtaana qu ut ink'a' tooxkanab' chi oso'k”. 7Chirix chik a'an eb' laj b'eresinel jukub' ke'xye chirib'ileb' rib': “Qilaq anaqwan ani tana wank xmaak naq xqak'ul li rahilal a'in”, chankeb'. Ke'xb'uulu rix ut ke'xtaw naq a' laj Jonás.
8Toja' naq ke'xpatz' re laj Jonás: “Ye qe k'a'ut naq yooko xk'ulb'al li rahilal a'in? Ma xb'aan yakok naq wankat arin? B'ar xatchalk chaq? B'ar laatenamit? Aj b'ar laawiyajil?”, chankeb' re.
9Kichaq'ok laj Jonás ut kixye: “Laa'in aj Hebreo, ut ninloq'oni ru li Qaawa', li xYos li choxa, laj Yoob'tesihom re li palaw ut li ruuchich'och'”, chan.
10-11Laj Jonás kixye ajwi' naq elelik yo chiru li Qaawa'. Ut naq eb' laj b'eresinel jukub' ke'ril naq li palaw q'axal chik yo chi kawuuk roq, k'ajo' naq ke'xiwak ut ke'xpatz' re: “K'a'ut naq xab'aanu a'in? K'aru tqab'aanu aawe re naq taach'anaaq ru li ha'?”, chankeb' re.
12“Kutumaqin sa' li palaw ut taach'anaaq ru li ha'. Ch'olch'o chiwu naq laa'in wank inmaak naq xchalk li rahilal a'in sa' eeb'een”, chan laj Jonás naq kichaq'ok.
13Eb' laj b'eresinel jukub' ke'xyal xq'e chi xk'amb'al li jukub' chi ch'och'el, ab'an ink'a' ke'ruhank xb'aan naq k'ajo' xkawil roq li palaw. 14Toja' naq ke'tijok chiru li Qaawa' ut ke'xye: “At Qaawa', moohaakanab' chi kamk xb'aan li winq a'in. Ut wi maak'a' xmaak, maak'e li xkamik sa' qab'een, xb'aan naq laa'at, at Qaawa', nakatraqok aatin jo' naxk'ul laach'ool”.
15Chirix a'an ke'xchap laj Jonás ut ke'xkut sa' li palaw, ut ch'anaamil li xkaw oq li palaw. 16Ut eb' li winq a'an naq ke'ril li xk'ulmank, ke'xpaab' li Qaawa' chi anchaleb' xch'ool, ke'mayejak chiru ut wank k'a'aq chik ru ke'xyeechi'i re.
17Li Qaawa' ak xkawresihom jun nimla kar re tixnuq' laj Jonás, ut a'in kiwank sa' xsa' li nimla kar chiru oxib' kutan ut oxib' q'oqyink.#1,17 Mt 12,40.
Currently Selected:
Jon 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.