Abd 1
1
Ra chalk re sa' xb'een laj Edom
1A'an a'in li kiril sa' moy u laj Abdías. A'in li raatin li Qaawa' kixye chirix laj Edom:
Xqab'i jun esilal xchalk chaq rik'in li Qaawa';
jun aj yehol esil xtaqlaak sa' chixjunileb' li tenamit
re xyeeb'al reheb':
“Wakliiqo ut yo'qeb' chi yalok rik'ineb' laj Edom”.#1-14 Is 34,5-17; 63,1-6; Jr 49,7-22; Ez 25,12-14; 35,1-15; Am 1,11-12; Mal 1,2-5.
Li Qaawa' kixye re laj Edom:
2“Ch'ina tenamit xatinkanab' wi' sa' xyanqeb' li jalanil tenamit,
ut q'axal tz'eqtaananb'ilat.
3Li xq'etq'etil laach'ool xatxb'alaq'i.
Wankat sa' xyanqeb' li saqoonak
ut chiru tzuul nakayiib' laamuheb'aal;
jo'kan naq xaye sa' laach'ool:
«Ani tkutuq we chi ch'och'?», chankat.
4Ab'anan, us ta jwal najt tattaqe'q jo' li t'iw
ut taayiib' ta laasuk sa' xyanqeb' li chahim,
toj aran tatinkub'si chaq”, chan li Qaawa'.
Li Qaawa' kixye chi jo'ka'in:
5“Wi ta te'wulaq eb' laj elq' sa' laawochoch chiru q'oqyink,
ink'a' raj te'xk'am chixjunil.
Ut wi ta te'chalq eb' laj q'olonel,
ma ink'a' raj te'xkanab' kach'inaq cho'q aawe?
6Ab'anan k'ajo' naq xe'xpoqle xsa' laawochoch, a Esaú!
Xe'relq'a ut xe'xk'am chixjunil laab'ihomal!
7Chixjunileb' li neke'okenk chawix
xate'xb'alaq'i ut xate'risi sa' laana'aj.
Eb' li nakawotz wi' laatzekemq,
xik' aj chik nakate'ril ut xe'xk'e aara'lenkil:
«Laj Edom maak'a' chik xna'leb'!», chankeb'”.
8Li Qaawa' kixye ajwi':
“Sa' li kutan naq tink'e sa' tojb'amaak laj Edom,
tinsach ruheb' li wankeb' xna'leb' aran:
maajun li wank xseeb'al xk'a'uxl tkanaaq, sa' xteepal Esaú.
9K'ajo' xxiweb' li kaweb' rib' chi yalok sa' li tenamit Temán,
ut maajun junaq tkanaaq chi yo'yo
sa'atqeb' li k'iche' sa' xteepal Esaú.
Eb' li xmaak laj Edom
10“Sa' xk'ab'a' xrahob'tesinkil ut xkamsinkil laawiitz'in laj Jakob,#10 Jl 3,19.
tatkanaaq sa' xutaan ut tat-oso'q chi junwaakaj.
11Sa' li kutan naq eb' li xik' neke'ilok re li tenamit xe'xchap chixjunil
ut eb' li jalaneb' xtenamit xe'xjuk' li rokeb'aal Jerusalén ut xe'xb'uuli rix,
laa'at ajwi' jun sa' xyanqeb':
maak'a' xab'aanu re xtenq'ankileb' laakomon.
12Ink'a' raj xsaho'k laach'ool chirix li xrahilal laawiitz'in.
Ink'a' ajwi' xsaho'k raj laawaanm chirix li roso'jik laj Judá,
chi moko xase'e raj sa' xkutankil li raaxiik'.#12 Sal 137,7; Lm 4,21.
13Ink'a' raj xat-ok sa' lintenamit sa' xkutankil li xrahilal,
chi moko xsaho'k raj laach'ool xb'aan li xrahilal sa' xq'ehil li raaxiik';
ink'a' raj xawelq'a li xb'ihomal naq xk'ul li rahilal.
14Ink'a' raj xaxaqab' aawib' sa'atqeb' li xaalib'e re xkamsinkileb' li xe'elelik,
chi moko xaq'axtesiheb' raj li xe'kole'k sa' xkutankil li raaxiik'.
15Xb'aan naq yo chaq chi nach'ok li xkutankil li Qaawa'
cho'q reheb' chixjunil li tenamit.
Jo' xab'aanu laa'at reheb' li junch'ol chik,
jo'kan ajwi' naq taa'uxmanq aawe:
taachalq sa' aab'een laak'ulub' xk'ulb'al.
Li xkutankil li Qaawa'
16“Jo' naq xereek'a laa'ex xk'ahil li rahob'tesiik sa' linloq'laj tzuul,
jo'kan ajwi' eb' li jalanil tenamit
te'ruk' xsa' li xsek'ul linjosq'il chi kok'aq xsa'
toj reetal te'oso'q chi junajwa.
17Ab'anan li tzuul Sión a'anaq li santil na'ajej
b'arwi' te'xik chi muqlek eb' li xe'elelik.
Eb' li ralal xk'ajol laj Jakob te'reechani wi' chik li xch'och'eb'.
18Li xjunkab'al laj Jakob a'anaq li ru xam,
li xjunkab'al laj José a'anaq li raq' xam,
ut li xjunkab'al laj Esaú taak'atmanq chi junajwa jo' li k'im:
maajun taakole'q sa' xyanqeb' li ralal xk'ajol laj Esaú”, chan li Qaawa'.
Li ak' Israel
19Eb' laj Israel li wankeb' Nejeb
te'reechaniheb' li tzuul sa' xteepal Edom;
ut eb' li wankeb' chiru taq'a,
te'reechani li xtenamiteb' laj Filistea.
Te'reechani ajwi' li xteepaleb' laj Efraín ut aj Samaria;
ut eb' laj Benjamín, a'aneb' li te'eechaninq re li na'ajej Galahad.
20Jo'k'ihaleb' laj Israel li ke'isiik sa' li xtenamiteb'
te'kanaaq Kanahán toj Sarepta;
ut eb' laj Jerusalén li tz'aptz'ookeb' Sefarad,
te'reechaniheb' li tenamit sa' xteepal Nejeb.
21Te'numtaaq sa' xb'eeneb' ut te'taqsinq aran Sión
re raqok aatin sa' xb'eeneb' li xtzuululeb' laj Esaú,
ut a' chik li Qaawa' taa'awab'ejinq.
Currently Selected:
Abd 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.