Knt 8
8
1A, wi ta laa'at li wiitz'in
tu'resinb'ilat ta xb'aan linna',
tinwutz' raj aawu naq tatink'ul sa' b'e
chi maajun taase'enq we.
2Tatink'am raj chiwix ut tatwoksi sa' rochoch linna',
ut laa'ataq chik aj tzolol we sa' li rahok.
Tatink'e raj chi uk'ak chaab'il b'iin ut xya'al granaad.
3Li xtz'e uq' wank rub'el linjolom
ut rik'in li xseeb' uq' nikinxmetzo.
4Nintz'aama cheru, ex rixqilal Jerusalén,
meerajsi ru ut meerisi xwara linrahom,
toj a'an yaal re.#8,4 Knt 2,7; 3,5.
Jwal kaw rib' li rahok jo' li kamk
Eb' laj b'ichanel
5Ani a'an li yo chaq chi taqe'k sa' li chaqich'och',
q'alq'o chaq xb'aan li winq narahok re?
Li ixq
Rub'el xche'el li mansaan xatwajsi chaq,
b'arwi' xatsiyaak xb'aan laana',
sa' li na'ajej b'arwi' xatsiyaak ut xat-alaak.
6K'ehin cho'q kaaxt chiru laach'ool,
jo' junaq kaaxt chiru laatelb',
xb'aan naq jwal kaw rib' li Rahok jo' li Kamk,
wank xwankil li Sowenak jo' li Xb'alb'a:
li xxamlel li Rahok a'an tiqwal xam,
tz'aqal xam li nachalk rik'in li Yos!
7Chixjunil li ha' wank sa' palaw ink'a' naru tixchup li Rahok,
chi moko taa'oso'q xb'aaneb' li nima'.
Wi ta junaq winq tixyeechi'i chixjunil li xb'ihomal li xjunkab'al
sa' xk'ab'a' li Rahok, yal tz'eqtaananb'ilaq raj!
Suttz'ak ut awimq uub'
Eb' laj b'ichanel
8Wank jun qanab' toj kach'in,
toj maak'a' xtu':
k'aru tqab'aanu cho'q re li qanab' a'in
sa' xkutankil li tz'aam?
9Wi ta a'an suttz'ak,
tqayiib' raj rik'in plaat junaq kab'l najt xteram sa' xb'een;
wi ta a'an okeb'aal, tqanat' raj rik'ineb' xtz'alamche'il li yaw.
Li ixq
10Laa'in jo'kin jun suttz'ak
ut eb' lintu' chanchaneb' najt xteramil kab'l.
Jo'kan naq, chiru linrahom,
laa'in jo'kin li ak xtaw xtuqtuukilal.
Eb' laj b'ichanel
11Laj Salomón xwank jun rawimq uub' aran Bahal-Amón.
Xq'axtesi li rawimq uub' sa' ruq'eb' laj k'aak'alenel,
li tento te'xk'am chaq jun mil chi tumin plaat
sa' xq'ehil li xokok uub'.
Li ixq
12Li wawimq, a'an we laa'in.
Li jun mil chi tumin, a'an aaweheb', at Salomón,
ut lajeek'aal cho'q reheb' laj k'aak'alehom re li awimq uub'.
Li winq
13Laa'at li nakathilank sa' xna'ajeb' li awimq,
eb' li qamiiw q'es xikeb' chi rab'inkil xyaab' laakux:
kanab'in ajwi' laa'in chi rab'inkil.
Li ixq
14Elelin, at inrahom,
jo'kaqat junaq kej
malaj junaq ral li yuk;
elelin sa'eb' li tzuul b'arwi' wank sununkil b'an.
Currently Selected:
Knt 8: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.