Rut 2
2
Lix Rut ki'ok chi k'anjelak sa' xch'och' laj Bohos
1Lix Nohemí wank re jun xkomon, xkomoneb' laj Elimelek li xb'eelom. Li winq a'an b'ihom, aj Bohos xk'ab'a'.
2Sa' jun kutan lix Rut aj Mohab kixye re lix Nohemí:
—Kanab'in chi xik sa' k'aleb'aal chi xxokb'al kach'inaq linseeb'aad. Twaj tinxik b'arwi' k'ulb'ilaqin sa' xyaalal.#2,2 Lv 19,9-10; Dt 24,19.
Ut a'an kixsume:
—Ayu, at inko', chan.
3Koho lix Rut ut ki'ok chi xxokb'al ru li seb'aad chirixeb' laj k'anjel, ab'anan kox'okaq sa' jun xch'och' laj Bohos, a' li xkomon laj Elimelek. 4Sa' li honal a'an, laj Bohos yo chaq chi chalk Belén chi rilb'aleb' laj k'anjel. Kixk'e xsahilaleb' xch'ool laj sik'ol seb'aad ut kixye reheb':
—Eerik'inaq taxaq li Qaawa'.
—Li Qaawa' chi'osob'tesinq aawe, chankeb' a'an.
5Toja' naq laj Bohos kixpatz' re laj ilol reheb' laj k'anjel:
—Ani li saaj ixq a'an? chan.
6Ut laj ilol reheb' laj k'anjel kixye:
—A'an li saaj ixq aj Mohab li xchalk chirix lix Nohemí sa' li na'ajej Mohab. 7Xtz'aama usilal chiwu re naq truuq tixxok ru li seb'aad li neke'xkanab' laj k'anjel, ut chalen naq xk'ulunk eq'la yo chi k'anjelak toj anaqwan.
8Toja' naq laj Bohos kixye re lix Rut:
—Ab'i, at ch'ina ixq. Matxik chi xokok ru li seb'aad sa' jalan na'ajej chi moko tatnajto'q arin. Kanaaqat sa' li na'ajej a'in rik'ineb' linmoos. 9K'e reetal li ch'och' b'arwi' neke'xik ut ayu chirixeb'. Laa'in xeb'inchaq'rab'i naq ink'a' tate'xch'i'ch'i'i, ut wi taachaqiq aawe, ayu wan wi' xna'aj li ha' ut uk' li ha' ak xe'risi chaq linmoos.
10Naq xrab'i a'in, lix Rut kixk'utzub' rib' sa' ch'och' ut kixye re:
—K'a'ut naq xintaw usilal chawu? Yal aj ab'l tenamitin laa'in, ut laa'at sa nikinaawil.
11Kichaq'ok laj Bohos:
—Ninnaw chi us chixjunil li xab'aanu rik'in laj alib'ahom aawe chirix xkamik laab'eelom, ut ninnaw ajwi' naq xakanab' laana' laayuwa' ut li na'ajej xatyo'laak wi', ut xatchalk sa' jun tenamit ink'a' nawb'il aab'aan. 12Li Qaawa' chik'ehoq aawe reeqaj li chaab'il k'anjel xab'aanu! A' taxaq li Qaawa', xYos laj Israel, li rub'el li xwankil xulaak'e aawib' chi xmuheela, chiq'ajkamunq aawe jo' aak'ulub', chan.
13Toja' naq lix Rut kixye:
—Usilal xintaw chawu: k'ajo' naq xak'ojob' linch'ool. Us ta laa'in maawa'in xkomoneb' laamoos ixq, ab'anan laa'at xawaj xk'eeb'al xsahil li waanm.
14Naq xtaw xhonalil li wa'ak, laj Bohos kixye re:
—Jilon chaq arin ut wa'in. Tzeka jun ch'uyulaq li wa tz'ab'il sa' vinaagr.
Kik'ojlaak lix Rut sa' xyanqeb' laj sik'ol seb'aad, ut laj Bohos kixk'e jun mooch' xjoranb'il k'ux. Kiwa'ak li ixq toj reetal kik'ojlaak xch'ool, ut toj wank ki'ela'ank chiru. 15Chirix chik a'an, naq kixaqliik re ok wi' chik chi k'anjelak, laj Bohos kixye reheb' laj k'anjel:
—Kanab'omaq li ixq chi xxokb'al kach'inaq re sa' xyanq li seb'aad ak b'ak'b'o chi joob', ut meeq'us chi xb'aanunkil. 16Naru ajwi' teekanab' chi t'ane'k junqaq ru li seb'aad re naq a'an taaxokoq re, ut meech'iila.
17Ak x'ewuuk chik naq lix Rut kixkanab' xxokb'al ru li seb'aad sa' xch'och' laj Bohos. Tojo' naq kirixima jo'ch'inal jo'nimal ak xxokom, ut jun iiq tana chi seb'aad kixxok. 18Kixk'am ut kox'okaq sa' li tenamit. Kixk'ut chiru laj alib'ahom re chixjunil li kixxok, kirisi li rela' li xtzekemq ut kixk'e re lix Nohemí:
19—B'ar xatwank chaq chi xokok ru seb'aad sa' li kutan a'in? K'ajo'eb' ru li seb'aad xaxok! Osob'tesinb'il taxaq li x'ilok xtoq'ob'aal aawu! chan laj alib'ahom re.
Ut lix Rut kixseeraq'i re lix Nohemí ani aj ik'in kiwank chi k'anjelak:
—Li winq li xink'anjelak wi' anaqwan, a'an aj Bohos xk'ab'a', chan.
20Toja' naq lix Nohemí kixye re li ralib':
—Usilaatinanb'il taxaq li Qaawa' li junelik naxk'ut li xchaab'ilal rik'ineb' li yo'yookeb' ut kamenaqeb'. Li winq a'an qakomon:#2,20 Lv 25,25. sa' xb'een a'an wank qatenq'ankil.
21Kixye lix Rut re laj alib'ahom re:
—K'e reetal, kixye ajwi' naq toj tinkanaaq sa' xyanqeb' laj k'anjel chalen toj taaraqe'q li xxokb'al ru li seb'aad.
22Toja' naq lix Nohemí kixye re li ralib':
—Us, maak'a' naxye, at inko'. Kanaaqat rik'ineb' laj k'anjel; chi jo'kan ink'a' tate'xch'i'ch'i'i sa' jalan chik na'ajej.
23Chi jo'kan lix Rut kikanaak rik'ineb' laj k'anjel re laj Bohos chi k'anjelak toj reetal kiraqe'k li xokok ru li seb'aad jo'wi' li triiw. Ut toj nahilank sa' rochoch laj alib'ahom re.
Currently Selected:
Rut 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.