Ro 16
16
Xchaq'rab'inkileb' laj paab'anel
1Cherilaq lix Febe li qanab'; a'an aj tenq' re li Iklees li wank aran Senkreas. 2Chek'ulaq sa' xk'ab'a' li Qaawa' jo' chanru xk'ulub'eb' laj santil paab'anel, ut chetenq'aaq rik'in chixjunil li k'aru naraj wi' tenq'aak, xb'aan naq a'an ak naab'al xtenq'aheb', ut xinxtenq'a ajwi' laa'in.
3Chek'e xsahil xch'ool lix Priska ut laj Akila, aj tenq'eb' we sa' xk'ab'a' li Kristo Jesus.#16,3 Hch 18,2.18-19.26. 4Eb' a'an xe'xk'e rib' sa' li xiwxiwil re xkolb'al linyu'am. Ut moko ka'aj ta wi' laa'in ninyoxink reheb', jo'kaneb' ajwi' chixjunileb' li Iklees maawa'eb' aj Judiiy. 5Chek'e ajwi' xsahil xch'ool li Iklees li naxch'utub' rib' sa' rochoch lix Priska ut laj Akila. Chek'e xsahil xch'ool laj Epéneto raaro inb'aan, a'an li xb'een reheb' laj Asia chi xq'axtesinkil rib' re li Kriist. 6Chek'e xsahil xch'ool lix María, li q'axal xtawasi rib' chi k'anjelak sa' eek'ab'a'. 7Chek'e xsahil xch'ool laj Andróniko ut lix Junia, wech tenamituleb' ut wech preexileb', xninqaleb' ru apóstol ut xb'eeneb' ajwi' chi xpaab'ankil li Kriist chiwu laa'in.
8Chek'e xsahil xch'ool laj Ampliato, raaro inb'aan sa' xk'ab'a' li Qaawa'. 9Chek'e xsahilaleb' xch'ool laj Urbano, aj tenq' qe sa' xk'ab'a' li Kriist, ut laj Estakis, raaro inb'aan. 10Chek'e xsahil xch'ool laj Apeles, li tz'aqal xk'ut rib' cho'q aj paab'anel sa' xk'ab'a' li Kriist. Chek'e xsahilaleb' xch'ool li wankeb' sa' rochoch laj Aristóbulo. 11Chek'e xsahil xch'ool laj Herodión, li wech tenamitul. Chek'e xsahilaleb' xch'ool li wankeb' sa' rochoch laj Narciso, sa' xk'ab'a' li Qaawa'. 12Chek'e xsahil xch'ooleb' lix Trifena ut lix Trifosa, li neke'xtawasi rib' chi k'anjelak sa' xk'ab'a' li Qaawa'. Chek'e xsahil xch'ool lix Pérside raaro inb'aan, li q'axal xtawasi rib' chi k'anjelak sa' xk'ab'a' li Qaawa'. 13Chek'e xsahil xch'ool laj Rufo,#16,13 Mk 15,21. li sik'b'il ru sa' xk'ab'a' li Qaawa', jo'wi' li xna': a'an ajwi' linna' laa'in. 14Chek'e xsahil xch'ooleb' laj Asínkrito, laj Flegón, laj Hermes, laj Patrobas, laj Hermas jo'wi' eb' li qas qiitz'in wankeb' rik'ineb'. 15Chek'e xsahil xch'ooleb' laj Filólogo ut lix Julia, laj Nereo ut li ranab', jo' ajwi' laj Olimpas ut chixjunileb' laj santil paab'anel li wankeb' rik'ineb'.
16Chek'e xsahil eech'ool cherib'il eerib' rik'in santil utz'uk u. Neke'xtaqla xsahil eech'ool chixjunileb' li x'Iklees li Kriist.
17Nintz'aama cheru, ex was wiitz'in, naq chekolaq eerib' chiruheb' li neke'yoob'ank jachok ib' ut luktesink ch'oolej xb'aan xxik'b'al rilb'al leetzolb'al eek'ulum chaq. Meejunaji eerib' rik'ineb', 18xb'aan naq eb' a'an ink'a' neke'xk'anjela ru li Kriist li Qaawa', a' chik li xsa'eb' neke'xk'anjela ru, ut rik'in chaab'il q'unil aatin neke'xb'alaq'i li q'uneb' xch'ool sa' xpaab'aaleb'. 19Xsutunk yalaq b'ar resil naq nekexpaab'ank; jo'kan naq nasaho'k inch'ool cherix. Ab'anan nawaj naq seeb'aq eech'ool rik'in li us ut saqaq ru leeraanm chiru li maa'usilal. 20Chi jo'kan li Yos li nak'ehok tuqtuukil usilal tixyeq'i laj tza rub'el eeroq chi seeb'. Li rusilal li Qaawa' Jesukriist chiwanq taxaq eerik'in.
21Naxtaqla xsahil eech'ool laj Timoteo aj tenq' we, jo'wi' laj Lucio, laj Jasón ut laj Sosípatro wech tenamituleb'.#16,21 Chirix laj Timoteo: cf. Hch 16,1-3. Chirix laj Lucio: cf. Hch 13,1. Chirix laj Jasón: cf. Hch 17,5. Chirix laj Sosípatro: cf. Hch 20,4.
22Laa'in laj Tersio li xintz'iib'a li hu a'in, nintaqla xsahil eech'ool.
23Naxtaqla xsahil eech'ool laj Gayo,#16,23 Chirix laj Gayo: cf. 1 Ko 1,14; Hch 19,29. li nak'ehok wochochnaal laa'in jo'wi' re chixjunil li Iklees. 24Neke'xtaqla xsahil eech'ool laj Erasto,#16,24 Chirix laj Erasto: cf. Hch 19,22; 2 Ti 4,20. laj k'ulul tumin re li tenamit, ut laj Warto, li qas qiitz'in.
Xraqik li hu
25Chiqanima ru li Yos! A'an wank xwankil chi xk'eeb'al xkawub' eech'ool, jo' chanru li Chaab'il Esilal ninjultika ut ninpuktesi chirix li Jesukriist, jo' ajwi' chanru yo chi k'utunk xyaalal anaqwan li choxahil na'leb' tz'aptz'o ru naq kiwank chalen chaq q'e kutan, 26ab'anan k'utb'esinb'il chik anaqwan xb'aan li xtz'iib'ahomeb' li propeet sa' li Santil Hu, jo' x'alaak sa' xch'ool li junelik Yos. Li tz'aptz'ookil na'leb' a'in k'eeb'il chik chi nawe'k xb'aaneb' chixjunil li tenamit re naq te'ab'inq ut te'paab'anq.
27Li Yos, li jun chirib'il li naxnaw chixjunil, chiwanq taxaq xloq'al sa' xk'ab'a' li Jesukriist chi junelik q'e kutan! Jo'kan taxaq.
Currently Selected:
Ro 16: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.