Nm 36
36
Li reechanihomeb' li sumsuukil ixq
1Sa' jun kutan li xjolomileb' li junqkab'al reheb' laj Galahad, ralal laj Makir, ralal laj Manasés, (a'an jun reheb' li xch'uutaleb' li ralal xk'ajol laj José) ke'wulak rik'in laj Moisés, ut chiruheb' li xjolomileb' laj Israel ke'xye: 2“At Moisés, li Qaawa' xye aawe naq chi b'uulinb'il taajek'i li ch'och' te'reechani eb' laj Israel. Laa'at xak'ul ajwi' laachaq'rab'inkil a'in xb'aan li Qaawa': li na'ajej taatz'aq raj laj Selofjad li qakomon, tento taak'e reheb' li xrab'in.#36,2 Nm 27,7. 3Ab'anan wi eb' li ixq a'an te'sumlaaq rik'in winq aj Israel li jalan xteepaleb', taamaq'manq sa' qayanq li xch'och'eb' li ixq a'an ut toxyu' ru li xna'ajeb' li winq te'sumlaaq wi' ut taak'osq ru li qe laa'o. 4Ut naq taawulaq li xchihab'il li Nimla Sahil Ch'oolejil#36,4 A'an li xchihab'il li Jubileo, li naninq'ehimank rajlal lajeeb' roxk'aal chihab'. Cf. Lv 25,8-16. cho'q reheb' laj Israel, li xch'och'eb' a'an taak'eemanq chi junajwa re li jun teep chik ut ink'a' chik taawanq cho'q reechanihomeb' li qana' qayuwa'”.
5Toja' naq laj Moisés kixye reheb' laj Israel, jo' chanru li xchaq'rab'inkil xb'aan li Qaawa': “Yaal li xe'xye li xteepalileb' li ralal xk'ajol laj José. 6Jo'ka'in xyehom li Qaawa' chirixeb' li xrab'in laj Selofjad: Naru te'sumlaaq rik'in li ani te'raj; a' loq' b'an naq te'sumlaaq rik'in li xkomoneb' sa' xteepalil li xna' xyuwa'. 7Chi jo'kan li xch'och'eb' laj Israel ink'a' taa'elq sa' junaq teep re taaxik sa' jalan chik. Xb'aan naq li junjunq aj Israel tento tixk'uula li reechanihom li xk'ulum rik'ineb' li xna' xyuwa'. 8Ut chixjunil li rab'inej li wank reechanihom sa' junaq xteepal aj Israel, tento taasumlaaq rik'in jun li winq xkomoneb' li xch'uutal li xteepal li xyuwa' re naq li junjunq aj Israel tixkol rix li reechanihom li xyuwa', 9ut li ch'och' ink'a' taa'elq sa' jun teepal re q'axonk sa' jalan chik teepal. Li junjunq teep aj Israel tento tixk'uula li xna'aj reechanihom”, chan laj Moisés.
10Toja' naq eb' li xrab'in laj Selofjad ke'xb'aanu jo' chanru yeeb'il re laj Moisés xb'aan li Qaawa'. 11Lix Majlá, xTirsá, xJoklá, xMilká ut lix Nohá, xrab'ineb' laj Selofjad, ke'sumlaak rik'ineb' li ralal li rikaneb'. 12Ke'sumlaak rik'ineb' li xkomoneb' sa' xch'uuteb' li ralaleb' laj Manasés, li ralal laj José. Chi jo'kan li xch'och'eb' kikanaak sa' xteepalil li xna' xyuwa'eb'.
13A'aneb' a'in li chaq'rab' ut li aatin kixk'e li Qaawa' cho'q reheb' laj Israel, chi xtz'uumal re laj Moisés, sa' xtaq'ahil Mohab, chire li nima' Jordán, sa' xjayal Jerikó.
Currently Selected:
Nm 36: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.