Mk 16
16
Li xwaklijik chi yo'yo li Jesus
(Mt 28,1-8; Lk 24,1-10; Jn 20,1-10)
1Naq kinume'k li sábado, lix María aj Magdala, lix María xna' laj Santiago, ut li xSalomé ke'xloq' sununkil b'an re naq toxe'xyul chirix li kamenaq. 2Toj eq'la chi us, sa' li xb'een kutan re li xamaan, ak xhik'e'k, koheb' wan wi' li muqleb'aal, 3yookeb' chi xyeeb'al chirib'ileb' rib':
—Ani xaq taatolk'osinq chiqu li pek wank chire li muqleb'aal?
4Ut naq ke'xtaqsi li rilob'aaleb', ke'xk'e reetal naq ak tolk'osinb'il chik li pek; ut a'an q'axal nim. 5Ke'ok sa' li muqleb'aal ut ke'ril jun li saaj al k'ojk'o aran sa' xnim uq'eb', tiqto rik'in saqi jut-aq'; ut ke'xiwak. 6Ut a'an kixye reheb':
—Mexxiwak. Li Jesus aj Nazaret nekesik', a' li kik'ehe'k chiru krus. Xwakliik chi yo'yo, maa'ani chik arin. Wahi' li na'ajej b'arwi' xjilib'aak. 7Ayuqex anaqwan, yehomaq chaq reheb' li xtzolom jo'wi' re laj Pedro naq k'amolb'e cheru toj Galilea; aran toxeeril ru jo' kixye eere.
8Eb' a'an ke'elk sa' li muqleb'aal sa' aanil, xb'aan naq neke'siksotk ut sachsookeb' xna'leb'; ut maa'ani ke'raatina sa' b'e xb'aan xxiweb'.#16,8 Mare li raqal Mk 16,9-20 moko tz'aqal ta xraqik li Evangelio tz'iib'anb'il xb'aan San Markos. A'an yal xtiqb'al Mk 16,1-8, xb'aan naq toj moqon chik kitz'iib'aak.
Li Jesus kixk'ut rib' chiruheb' li xtzolom
(Mt 28,10, 16-20; Lk 24,13-49; Jn 20,11-23)
9[Li Jesus kiwakliik chi yo'yo toj eq'la, sa' li xb'een kutan re li xamaan, ut kixk'ut rib' xb'enwa chiru lix María aj Magdala li kirisi wi' wuqub' chi maa'us aj musiq'ej. 10A'an koho ut koxye resil reheb' li ke'ochb'eenink re li Jesus: eb' a'an yookeb' chi yaab'ak ut raheb' sa' xch'ool. 11Ab'anan, naq ke'rab'i naq yo'yo ut ki'ile'k xb'aan lix María, ink'a' ke'xpaab'.
12Moqon li Jesus kixk'ut rib' chi jalan chik rilob'aal chiruheb' wiib' li xtzolom, naq yookeb' chi xik sa' k'aleb'aal. 13Eb' a'in koxe'xye resil reheb' li junch'ol chik, ut chi moko eb' a'an ke'paab'aak.
14Sa' roso'jik kixk'ut rib' chiruheb' li Junlaju naq wankeb' sa' meex, ut kixkawilaatinaheb' xb'aan naq ink'a' neke'xpaab' ut kaweb' xjolom: ink'a' ke'xpaab' li ke'ilok ru naq waklijenaq wi' chik chi yo'yo.
15Ut kixye reheb': “Ayuqex sa' chixjunil li ruuchich'och' ut chepuktesi li Chaab'il Esilal junsut junrub'el choxa. 16Ani taapaab'anq ut taakub'eeq xha', a'an taakole'q; a'ut li ink'a' taapaab'anq, taateneb'aaq tojb'amaak sa' xb'een. 17A'aneb' a'in li eetalil li taak'utunq rik'ineb' li te'paab'anq: sa' ink'ab'a' te'isinq maa'us aj musiq'ej, te'aatinaq sa' jalan aatinob'aal, 18te'chapoq k'anti' rik'in ruq'eb' ut, wi te'ruk' k'a'aq re ru nakamsink, maak'a' te'xk'ul; te'xk'e li ruq' sa' xb'eeneb' li yaj ut te'k'iraaq”.
Li xtaqik li Jesus
(Lk 24,50-53; Hch 1,3-14)
19Li Qaawa' Jesus, naq ak xraatinaheb', kitaqsiik sa' choxa ut kik'ojlaak sa' xnim uq' li Yos. 20Ut eb' a'an koheb', ke'xpuktesi li Chaab'il Esilal yalaq b'ar, yo chi k'anjelak li Qaawa' rochb'eeneb' jo'wi' chi xk'eeb'al xwankil li Aatin rik'in li eetalil neke'ochb'eenink re.]
Currently Selected:
Mk 16: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.