Is 2
2
Li tz'aqal tuqtuukilal
(Mi 4,1-3)
1Laj Isaías, ralal laj Amós kiril li moy u a'in chirix li tixk'ul Judá ut Jerusalén:
2Chiruheb' li kutan chaalel
li tzuul wan wi' li rochoch li Qaawa'
taawakliiq chi nimaq xwankil sa' xb'eeneb' chixjunileb' li b'ool,
ut q'axal nimaq xteram chiruheb' chixjunil li tzuul.
Chixjunileb' li tenamit te'chalq aran;
3k'ajo'aqeb' xk'ihal li poyanam te'chalq ut te'xye:
“Kimqex ut taqe'qo sa' xtzuulul li Qaawa',
sa' rochoch li xYos laj Jakob.
A'an tixk'ut chiqu k'aru li rajom
ut laa'o tqataaqe li b'e sik'b'il ru xb'aan”.#2,3 Is 56,6-7; Zak 8,20-22.
Xb'aan naq aran Sión taa'elq chaq li chaq'rab',
ut Jerusalén taachalq li raatin li Yos.
4Li Qaawa' taaraqoq aatin sa' xb'eeneb' li tenamit
ut a'anaq laj raqol aatin sa' xyanqeb' naab'al chi poyanam.
Te'xsutq'isi eb' li q'esnal ch'iich' cho'q pikleb' ch'och',
ut li xjutz' ch'iich'eb' te'kanaaq cho'q setleb' k'im.#2,4 Jl 3,10.
Eb' li tenamit ink'a' chik te'yaloq chirib'ileb' rib'
chi moko te'xkawresi rib' re yalok.
5Ex ralal xk'ajol laj Jakob,
waklinqex ut b'eeqo sa' xkutan saqenk li Qaawa' Yos.
Xsachikeb' li neke'xnima rib'
6At Qaawa', xatz'eqtaana laatenamit,
a'aneb' li ralal xk'ajol laj Jakob,
xb'aan naq k'ajo'eb' laj q'e#2,6 Lv 20,27; Dt 18,10-11. ut eb' laj nawal sa' xyanqeb';
neke'xb'aanu jo'eb' laj Filistea
ut neke'xk'am rib' sa' usilal rik'ineb' laj ab'l tenamit.
7Xnujak chi oor ut plaat li xtenamiteb'
ut maak'a' xraqb'al li rajlankil li xb'ihomaleb';
xe'tamk li xkawaayeb' ut eb' li b'eleb'aal ch'iich' re yalok.
8Xnujak ajwi' li xna'ajeb' chi jalanil yos,
ut eb' li poyanam neke'xloq'oni ru li jalam u xe'xpak' rik'in ruq'eb'.
9Xe'xkub'si li xwankileb' ut xe'wiq'laak chiruheb' li jalanil yos.
Jo'kan naq maakuyeb' xmaak, at Qaawa'.
10Ch'ikomaq eerib' sa'eb' li ochoch pek,#2,10 Ap 6,15.
muqomaq eerib' sa'eb' li siwan
re xkolb'al eerib' chiru xjosq'il li Qaawa'
jo'wi' chiru li xlemtz'unkil li xloq'al,#2,10 2 Ts 1,9.
naq tolreek'asi li ch'och' sa' xna'aj.
11Taawulaq xkutankil naq eb' li neke'xnima rib' te'xkub'si li rilob'aal
ut eb' li q'etq'et te'kub'siiq xwankil.
Toja' naq ka'aj chik li Qaawa' taanimaaq ru.
12Sa' li kutan a'an li Nimajwal Yos
taachalq re xkub'sinkileb' xwankil li neke'xnima rib',
eb' li q'etq'et ut li ninqeb' xwankil;
13taachalq sa' xb'eeneb' li yaw re Líbano li najt xterameb'
ut sa' xb'eeneb' li ji re Basán,
14sa' xb'een chixjunileb' li xninqal b'ool
jo'wi' eb' li tzuul najteb' xteram,
15sa' xb'eeneb' li kawub'resinb'il ochoch
jo'wi' eb' li tz'ak li ink'a' naru taqe'k chiru,
16sa' xb'eeneb' li jukub' re Tarsis
ut sa' xb'een chixjunileb' li jukub' neke'k'amok chaab'il eechej.
17-18Eb' li neke'xnima rib' te'xkub'si li rilob'aal
ut eb' li q'etq'et te'kub'siiq xwankil;
chixjunileb' li jalanil yos te'juk'manq,
ut ka'aj chik li Qaawa' taanimaaq ru sa' li kutan a'an.
19Naq tol'elq li Qaawa' ut tolxrahob'tesi li ruuchich'och',
eb' li poyanam te'xch'ik rib' sa'eb' li ochoch pek ut sa'eb' li siwan,
re xkolb'al rib' chiru li xjosq'il li Qaawa'
jo'wi' chiru li xlemtz'unkil li xloq'al,
naq tolreek'asi li ch'och' sa' xna'aj.
20Sa' li kutan a'an te'xrumi eb' li jalanil yos
chiruheb' li ch'o ut chiruheb' laj tz'uum xik',
a'eb' li yos xe'xyiib' rik'in oor ut plaat
re xloq'oninkileb' ru.
21Eb' li poyanam te'xch'ik rib' sa'eb' li ochoch pek ut sa' xyanqeb' li saqoonak,
re naq te'kole'q chiru li xjosq'il li Qaawa'
jo'wi' chiru li xlemtz'unkil li xloq'al,
naq tolreek'asi li ch'och' sa' xna'aj.
22Jo'kan naq meek'ojob' chik eech'ool chirix li winq
li yal jun k'amok ajwi' li xmusiq':
k'aru na'ok wi' a'an?
Currently Selected:
Is 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.