2 S 2
2
Laj David kixaqab'aak cho'q awab'ej aran Hebrón
1Moqon chik laj David kipatz'ok re li Qaawa' ut kixye: “Ma us tinxik sa' junaq tenamit re Judá?”, chan. Li Qaawa' kixsume: “Ayu”, chan. Toja' naq laj David kixpatz' wi' chik re: “B'ar tento tinxik?”, chan. “Aran Hebrón”, chu'uxk re.
2Ut laj David koho aran rochb'een xkab'ichaleb' li rixaqil, a' lix Ajinohán aj Jisrehel ut lix Abigahil, li kiwank cho'q rixaqil laj Nabal aj Karmeel.#2,2 1 S 25,42-43. 3Kixk'ameb' ajwi' li winq li wankeb' rochb'een ut li xjunkab'aleb', ut koxe'xtaw xna'ajeb' sa'eb' li tenamit sa' xteepal Hebrón. 4Chirix chik a'an ke'wulak eb' laj Judá ut aran ke'xyul laj David cho'q awab'ej re Judá.
Naq ke'xye resil re laj David naq eb' laj Yabés re Galahad a'aneb' li ke'muquk re laj Saúl,#2,4 1 S 31,11-13. 5kixtaqlaheb' aj esil re xyeeb'al reheb': “A' taxaq li Qaawa' chi'osob'tesinq eere xb'aan naq xe'ruxtaana ru laj Saúl, laj eechal eere, rik'in xmuqb'al. 6Anaqwan li Qaawa' chi'uxtaananq eeru laa'ex ut chi'usilanq eere. Laa'in ajwi' tinb'aanu usilal eere xb'aan chixjunil li xeb'aanu. 7Kawaq eech'ool anaqwan ut yo'oon wanqex. Yaal ajwi' naq xkamk laj Saúl laj eechal eere, ab'anan eb' laj Judá xine'xxaqab' laa'in cho'q awab'ej reheb'”, chan.
Laj Isbahal kixaqab'aak cho'q awab'ej re Israel
8Ab'an laj Abner, ralal laj Ner, xjolomileb' laj puub' re laj Saúl, kixb'oq laj Isbahal, ralal laj Saúl, ut kixk'am chirix toj Majanáhin. 9Aran kixxaqab' cho'q awab'ej re Galahad, reheb' laj Aser, laj Jisrehel, laj Efraín, laj Benjamín ut re chixjunil Israel. 10Ka'k'aal chihab' wank re laj Isbahal, ralal laj Saúl, naq kixaqab'aak cho'q awab'ej re Israel, ut wiib' chihab' kiwank cho'q awab'ej. Ka'ajwi' li xteepal laj Judá kitaaqenk re laj David. 11Wuqub' chihab' rik'in waqib' po ki'awab'ejink laj David aran Hebrón sa' xb'eeneb' laj Judá.
Eb' laj Judá ut eb' laj Israel ke'yalok aran Gabahón
12Laj Abner, ralal laj Ner, ut eb' laj k'anjel chiru laj Isbahal, ralal laj Saúl, ke'elk Majanáhin ut koheb' Gabahón. 13Ke'elk ajwi' laj Johab, li xyum lix Sarbia, ut eb' laj k'anjel chiru laj David, ut ke'xk'ul rib' chire li ha' re Gabahón. Li wiib' ch'uut ke'xaqliik, li jun junpak'al li ha' ut li jun chik sa' li junpak'al chik. 14Toja' naq laj Abner kixye re laj Johab: “Xaqliiqeb' li saaj al ut yaloqeb' chiqu”. “Us, xaqliiqeb'”, chan laj Johab.
15Ke'xaqliik ut ke'nume'k chi uub'ej li sik'b'ileb' ru: kab'laju sa' xk'ab'a' li xteepal laj Benjamín ut sa' xk'ab'a' laj Isbahal, ralal laj Saúl, ut kab'laju sa' xk'ab'a'eb' laj k'anjel chiru laj David. 16Ke'xchap xjolomeb' chirib'ileb' rib' ut li junjunq kixlap li xjutz' ch'iich' chi xk'atq xsa' li xik' na'ilok re; chi jo'kan jun t'anikeb' chixjunil, ut li na'ajej a'an Jelkat-Hasurim ki'ok chi k'ab'a'iik. Li na'ajej a'an wank sa' xteepal Gabahón. 17Sa' li kutan a'an jwal kaw ke'yalok, ut laj Abner rochb'eeneb' laj Israel ke'q'axe'k ru xb'aaneb' laj k'anjel chiru laj David. 18Aran wankeb' roxichaleb' li xyum lix Sarbia: laj Johab, laj Abisay ut laj Asahel. A'in jwal kaw na'aanilak, chanchan junaq kej, 19ut koho chi raanilasinkil laj Abner chi tiik. 20Naq laj Abner ki'ilok chirix, kixye: “Ma laa'at laj Asahel?”, chan. “Laa'inin”, chan a'an.
21Toja' naq laj Abner kixye re: “Kanab' waanilasinkil. Chap junaq reheb' laj puub' li wankeb' sa' nim uq' malaj sa' tz'e uq', ut maq' li k'aru wank rik'in”. Ab'an laj Asahel ink'a' kiraj xkanab'ankil raanilasinkil. 22Jo'kan naq laj Abner kixye wi' chik re: “Kanab' waanilasinkil re naq ink'a' tatinkamsi. Chanru naq tinruuq chi aatinak rik'in laj Johab laawas wi tatinkamsi?”.
23Ab'an laj Asahel ink'a' kixkanab' raanilasinkil; jo'kan naq laj Abner kixlap li jutz' che' sa' xsa', paynum toj chirix. Kit'ane'k ut aran ajwi' kikamk. Ut jo'k'ihaleb' neke'wulak sa' li na'ajej b'arwi' kit'ane'k ut kikamk laj Asahel, neke'xaqliik. 24Toja' naq laj Johab ut laj Abisay koheb' chi xsik'b'al laj Abner. Ak ewu chik naq ke'wulak wan wi' li tzuul Amá li wank sa' xjayal Jihaj, sa' li b'e naxik sa' li chaqich'och' re Gabahón. 25Aran eb' laj Benjamín ke'xch'utub' rib' rik'in laj Abner re naq te'yaloq rochb'een, ut ke'xtaw xna'ajeb' sa' xb'een li tzuul. 26Toja' naq laj Abner kixb'oq laj Johab ut kixye re: “Toj jo'q'e tqakanab' xkamsinkil qib'? Ma ink'a' nakanaw naq chixjunil a'in rahil ch'oolej toxraqe'q wi'? Jo'q'e taaye reheb' laapoyanam naq xkanab'aqeb' raanilasinkil li ras riitz'ineb'?”.
27Kichaq'ok laj Johab: “Sa' xk'ab'a' li yo'yookil Yos ninye aawe, wi ink'a' ta xat-aatinak, eb' linpoyanam ink'a' raj xe'xkanab' raanilasinkil chixjunqaleb' li ras riitz'in toj re naq taasaqewq”, chan.
28Tikto kixye naq chiyaab'asiiq li xukub'. Jo'kan naq kich'anaak li yalok: xaqaamileb' chixjunileb' laj puub' ut ink'a' chik ke'raanilasiheb' laj Israel. 29Laj Abner ut eb' li rochb'een ke'b'eek chiru chixjunil li q'oqyink aran Arabá, ke'nume'k junpak'al li nima' Jordán ut Bitrón, ut ke'wulak Majanáhin.
30Laj Johab kixkanab' raanilasinkil laj Abner ut kixch'utub' chixjunileb' laj puub'. Ut naq kirajlaheb', kixk'e reetal naq kamenaqeb' chik b'eleelaju aj k'anjel chiru laj David, ut kamenaq ajwi' laj Asahel. 31Ab'anan eb' laj k'anjel chiru laj David ke'xkamsi waqxaqlajuk'aal (360) aj Benjamín ut xkomoneb' li neke'okenk chirix laj Abner.
32Moqon chik ke'xxok laj Asahel ut koxe'xmuq Belén sa' li na'ajej kimuqe'k wi' li xyuwa'. Laj Johab ut eb' li rochb'een ke'b'eek chiru chixjunil li q'oqyink, ut ak yo chi saqewk naq ke'wulak Hebrón.
Currently Selected:
2 S 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.