2 R 25
25
Li nimla rahilal li kichalk sa' xb'een Jerusalén ut sa' xb'eeneb' laj Judá
(Jr 39,1-7; 52,3-11)
1Lajeeb' kutan xtiklajik li xlaje po re li xb'ele chihab' rokik chi awab'ejink laj Sedesías, kichalk laj Nabukodonosor, awab'ej re Babilonia,#25,1 Jr 21,1-10; 34,1-5; Ez 24,2. rochb'een chixjunileb' laj puub' re yalok rik'ineb' laj Jerusalén. Ke'xyiib' li xmuheb'aaleb' sa' xka'yab'aal li tenamit ut ke'xsut rix rik'in k'iila t'anleb'aal. 2Sutsu li tenamit xb'aaneb' toj sa' li junlaju chihab' rokik cho'q awab'ej laj Sedesías. 3Sa' xb'ele li kutan re li xka po re li chihab' a'an kinumtaak li we'ej sa' li tenamit ut tik maak'a' chik wa cho'q reheb' li poyanam. 4Toja' naq eb' laj Jerusalén ke'xhop li xsuttz'akul li tenamit#25,4 Ez 33,21. ut, us ta sutsu chi us Jerusalén xb'aaneb' laj Kaldeha, ki'elelik li awab'ej chiru li q'oqyink, rochb'een chixjunileb' laj puub'. Ke'elk sa' li okeb'aal wank sa' xyanqeb' li tz'ak, koheb' sa' li xna'aj rawimq li awab'ej ut ke'xchap xb'e re xik Arabá. 5Ab'anan eb' laj puub' aj Kaldeha ke'xchap raanil chirix laj Sedesías, li awab'ej, ut koxe'xtaw sa' xtaq'ahil Jerikó. Toja' naq chixjunileb' laj puub' ke'elelik ut ke'xkanab' xjunes. 6Eb' laj Kaldeha ke'xchap li awab'ej ut ke'xk'am sa' li tenamit Riblá rik'in li awab'ej re Babilonia ut aran ke'raqok aatin sa' xb'een. 7Chiru ajwi' laj Sedesías ke'kamsiik chi ch'iich' chixjunileb' li ralal, ut a'an ki'isiik xsa'eb' li ru, ke'xb'ak' rik'in wiib' kareen q'anch'iich' ut ke'xk'am toj Babilonia.#25,7 Ez 12,13.
Laj Nebusardán kixsach li rochoch li Yos
(2 Kr 36,17-21; Jr 39,8-10; 52,12-30)
8Wuqub' kutan xtiklajik li ro' po re li b'eleelaju chihab' rokik chi awab'ejink laj Nabukodonosor sa' xb'eeneb' laj Babilonia, laj Nebusardán, xjolomileb' laj puub', aj k'anjel chiru li awab'ej, kik'ulunk Jerusalén. 9Kixk'at li rochoch li Yos,#25,9 1 R 9,8. li rochoch li awab'ej ut chixjunileb' li ochoch wankeb' Jerusalén; kixk'ateb' ajwi' li rochocheb' li xninqaleb' ru winq. 10Chixjunileb' laj puub' aj Kaldeha li ke'ochb'eenink re li xjolomileb', ke'xjuk'i li xsuttz'akil li tenamit Jerusalén. 11Chirix chik a'an laj Nebusardán, xjolomileb' laj puub', kirisi jo'k'ihaleb' chik ke'kanaak sa' li tenamit, eb' li ke'okenk chirix li awab'ej re Babilonia, jo' ajwi' eb' li xkomoneb' li tenamit. 12Ka'ajwi' kixkanab'eb' sa' li tenamit li q'axal neb'a'eb', re te'awoq uub' ut te'k'ale'q sa'eb' li k'aleb'aal.#25,8-12 Dt 4,27-28; 28,36.
13Eb' laj Kaldeha ke'xjuk'eb' li roqechal li rochoch li Qaawa' yiib'anb'ileb' rik'in q'anch'iich', eb' li k'ochleb'aal#25,13 1 R 7,15-22; 2 Kr 3,15-17. ut li nimla xna'aj ha'#25,13 1 R 7,23-26; 2 Kr 4,2-5. li wank sa' rochoch li Yos, ut ke'xk'am chixjunil li q'anch'iich' toj Babilonia. 14Ke'xxok ajwi' eb' li xna'aj li cha, li lekleb', li ch'iich', li xokleb' ut chixjunil li k'a'aq re ru yiib'anb'il rik'in q'anch'iich' li nak'anjelak sa' li loq'onink.#25,14 1 R 7,45; 2 Kr 4,16. 15Li xjolomileb' laj puub' kixxok ajwi' eb' li xanxaar ut eb' li sek' yiib'anb'ileb' rik'in plaat ut oor. 16Ink'a' kiruuk xb'isb'al li raalal li wiib' chi oqech, li nimla xna'aj ha' ut eb' li k'ochleb'aal li kixk'e chi yib'aak laj Salomón cho'q re li rochoch li Yos. 17Oob' moqoj xteram li xb'een oqech; kixkuy raalal jun xsahob' ru yiib'anb'il rik'in q'anch'iich', aj numenaq jun moqoj xteram, wank xkareen ut naab'al chi granaad chi xsutam: yiib'anb'il chixjunil rik'in q'anch'iich'. Jo'kan ajwi' li jun chik oqech.
18Li xjolomileb' laj puub' kixchap ajwi' laj Seraías, xyuwa'il aj tij, ut laj Sofonías, li xkab'il, jo'wi' li oxib' chi aj ilol re rokeb'aal li rochoch li Qaawa'. 19Sa' li tenamit kixchap jun xjolomileb' laj puub' ut oob'eb' aj k'anjel chiru li awab'ej li wankeb' sa' li tenamit; kixchap ajwi' laj tz'iib' li nak'anjelak chiru li xjolomileb' laj puub', a' li natz'iib'ank re li xk'ab'a'eb' li tenamit, ut oxk'aaleb' chik chi winq li ke'tawe'k sa' li tenamit. 20Laj Nebusardán, xjolomileb' laj puub', kixchap chixjunileb' ut kixk'ameb' toj Riblá, rik'in li awab'ej re Babilonia. 21Ut a'in kixtaqla xkamsinkileb' aran Riblá, sa' xteepal Jamat.
Jo'ka'in naq eb' laj Judá ke'k'ame'k sa' jalanil tenamit, najt rik'in li xtenamiteb'.
Wan chik koheb' Ejiipt
(Jr 40,7-10; 41,1-3, 16-18)
22Laj Nabukodonosor, awab'ej re Babilonia, kixxaqab' laj Kedalías, ralal laj Ajikán, ri laj Safán, chi xjolominkileb' li poyanam ke'kanaak Judá. 23Naq eb' li xjolomileb' laj puub' ut eb' laj puub' aj Judá ke'rab'i a'in, ke'wulak toj Mispá rik'in laj Kedalías. A'aneb' laj Ismael, ralal laj Netanías, laj Jwan, ralal laj Karéhaj, laj Seraías, ralal laj Tanjumet, Netofá xtenamit, laj Jasanías, ralal jun li winq aj Mahaká, ut chixjunileb' li wankeb' rochb'een. 24Laj Goldolías kixye reheb' sa' jurament: “Meexiwa ruheb' laj Kaldeha. Kanaaqex sa' li tenamit, k'anjelanqex chiru li awab'ej re Babilonia ut us wanqex”, chan.
25Ab'anan sa' xwuq li po laj Ismael, ralal laj Netanías, ri laj Elisamá, xkomon li awab'ej, kichalk rochb'een lajeeb' chi winq ut kixkamsi laj Kedalías; kixkamsiheb' ajwi' eb' laj Judá ut eb' laj Kaldeha li wankeb' rochb'een aran Mispá. 26Toja' naq chixjunileb' li poyanam, jo' saajeb' ut cheekeb', jo' ajwi' eb' li xjolomileb' laj puub' ke'elk ut koheb' Ejiipt,#25,26 Jr 43,5-7. xb'aan xxiweb' chiruheb' laj Kaldeha.
Li awab'ej Johakín kikuye'k li xmaak
(Jr 52,31-34)
27Waqlaju xka'k'aal chihab' xxikik chi preexil laj Johakín, awab'ej re Judá, sa' li wuqub' xka'k'aal xb'e li kab'laju po, laj Ebil-Merodak, awab'ej re Babilonia, kixtikib' awab'ejink ut kirusila ru Johakín, awab'ej re Judá, ut kirisi sa' tz'alam. 28Q'axal kixb'aanu usilal re ut kixk'e xwankil jwal nim wi' chik chiruheb' chixjunil li awab'ej wankeb' rochb'een aran Babilonia. 29Kixk'e chi jale'k li raq' ut junelik kiwa'ak laj Johakín rochb'een li awab'ej chiru chixjunil li xyu'am. 30Jo'kan ajwi' kich'oolaniik xb'aan li awab'ej rajlal kutan chiru chixjunil li xyu'am.
Currently Selected:
2 R 25: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.