2 Ko 13
13
1Ak rox wa tinxik eerik'in.#13,1a Chirix li xb'een xwulajik laj Pablo: cf. Hch 18,1-18. Chirix li xka' sut: cf. 2 Ko 1,23-2,1; 12,14. “Rik'in raatineb' wiib' malaj oxib' chi testiiw chich'olaaq ru chixjunil”, chan li Santil Hu.#13,1b Dt 19,15; Mt 18,16; 1 Ti 5,19. 2Ak inyehom chaq sa' xkab' inwulajik, reheb' li xe'maakob'k jo'wi' reheb' chixjunil, ut ninye wi' chik anaqwan naq maa'anihin sa' eeyanq: wi tinwulaq wi' chik sa' eeyanq, ink'a' tinkuyuq maak. 3Ninnaw naq yookex chi xsik'b'al xyaalal ma na'aatinak li Kriist inb'aan laa'in. Ut li Kriist moko maak'a' ta xwankil eerik'in, q'axal nim b'an xwankil sa' eeyanq. 4Yaal ajwi' naq kikamk chiru krus xb'aan xmajelal li xmetz'ew, ab'an yo'yo anaqwan xb'aan li xnimal xwankil li Yos. Jo'kan ajwi' laa'o: yooko chi tz'aqonk sa' xmajelal li xmetz'ew, ab'an yo'yooqo qochb'een a'an sa' xk'ab'a' li xnimal xwankil li Yos re k'anjelak cheru.
5K'ehomaq reetal leeyu'am ma tz'aqal yookex sa' li paab'aal. Yalomaq eerix. Ma ink'a' nekek'e reetal naq li Jesukriist wank eerik'in? Mare anchal ak xk'utunk sa' xyalb'al eerix naq ink'a' us leech'ool. 6K'ojk'o linch'ool naq teek'e reetal naq laa'o us xoo'elk sa' li yalok ix a'an. 7Ut naqatz'aama naqelaji chiru li Yos naq maak'a' taxaq maa'usilal cheb'aanu: moko re ta xk'utb'al naq chaab'il k'anjel xqab'aanu sa' eeyanq, re b'an naq cheb'aanuuq li us, us ta ink'a' nak'eemank xwankil li k'anjel xqab'aanu sa' eeyanq. 8Xb'aan naq maak'a' qawankil chiru li yaal, nokook'anjelak b'an re xk'eeb'al xwankil li yaal, 9ut nasaho'k qach'ool naq laa'o maak'a' qametz'ew ut laa'ex kaw eerib'. A'an a'in li naqatz'aama chiru li Yos: naq tz'aqalaq re ru leepaab'aal. 10Xintz'iib'a a'in naq maa'anihin sa' eeyanq, re naq ink'a' texinkawil'aatina naq wanqin eerik'in, jo' chanru li wankil k'eeb'il we xb'aan li Qaawa' re kab'lak ut ink'a' re juk'uk.
Xraqik li hu
11Ex was wiitz'in, chisaho'q sa' leech'ool, tz'aqalaq eere eeru, chek'e xkawub' leech'ool, junajaq ru leek'a'uxl, wanqex sa' tuqtuukilal, ut li Yos li nak'ehok li rahok ut li tuqtuukilal taawanq eerik'in. 12Chek'ehaq xsahil eech'ool cherib'il eerib' rik'in santil utz'uk u. Chixjunileb' laj santil paab'anel neke'xtaqla xsahil eech'ool.
13Li rusilal li Qaawa' Jesukriist, li xrahom li Yos ut li xjunajihom li Santil Musiq'ej chiwanq taxaq eerik'in chejunilex.
Currently Selected:
2 Ko 13: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.