1 R 1
1
Xraqik li xyu'am laj David
1Ak tiix chik li awab'ej David ut xikenaq xchihab' chi us. Us ta neke'xk'e naab'al li isb' sa' xb'een, ab'an ink'a' naq'ixno'k.
2Jo'kan naq eb' laj k'anjel chiru ke'xye re: “At awab'ej, chisik'manq junaq tuq'ixq li taa'iloq aawe, tatxch'oolani ut taawarq chak'atq re naq tatq'ixno'q”, chankeb'.
3Ke'xsik' jun ch'ina'usil tuq'ixq sa' chixjunil xsutam Israel, ut ke'xtaw chaq lix Abisag aj Sunam, ut ke'xk'am wan wi' li awab'ej. 4K'ajo' xch'ina'usal li tuq'ixq. A'an na'ilok re ut nak'anjelak chiru, ab'anan li awab'ej ink'a' kiwank rik'in.
5Toja' naq laj Adonías,#1,5 2 S 3,4. xyum lix Jakit, kixq'etq'eti rib' ut kixye: “Laa'in tinkanaaq cho'q awab'ej”, chan. Jo'kan naq kixsik' xb'eleb'aal ch'iich', xkawaay ut lajeeb' roxk'aal chi winq li te'ochb'eeninq re. 6Li xyuwa' maajun wa kixch'i'ch'i'i rik'in xyeeb'al re: “K'a'ut naq jo'kan nakab'aanu?”. Laj Adonías ch'ina'us rilb'al ut toj iitz'inb'ej chiru laj Absalón. 7Kixk'am rib' sa' aatin rik'in laj Johab, ralal lix Sarbia, ut rik'in laj Abiatar laj tij, li neke'okenk chirix. 8Ab'an laj Sadok laj tij, laj Benaías, ralal laj Johadá, laj Natán li propeet, laj Semehí, ramiiw laj David, ut eb' laj puub' ink'a' ke'okenk chirix laj Adonías.
9Sa' jun kutan laj Adonías kixk'uub' jun ninq'e chi xtoon li Saqoonak re Sojélet, chire li ha' Rokel. Aran kixyeechi'iheb' li karneer, li b'ooyx ut wakax li ninq xtib'eleb'. Kixb'oqeb' li ras eb' li riitz'in, ralaleb' li awab'ej, ut chixjunileb' li winq aj Judá aj k'anjeleb' chiru li awab'ej. 10Ab'anan ink'a' kixb'oq laj Natán li propeet, laj Benaías, eb' laj puub' re li awab'ej chi moko laj Salomón li riitz'in.
11Toja' naq laj Natán kixye re lix Betsabé, xna' laj Salomón:#1,11 2 S 12,24. “Ma ink'a' nakanaw naq laj Adonías, xyum lix Jakit, xxaqab' rib' cho'q awab'ej chi ink'a' naxnaw laj David laj eechal qe? 12Anaqwan wi taawaj xkolb'al laayu'am ut li xyu'am laj Salomón laayum, b'aanu li ok we xyeeb'al aawe. 13Ayu ut okan wan wi' li awab'ej ut ye re: «At awab'ej, at inqaawa', ma ink'a' tab'i' kaye we rik'in jurament naq laj Salomón linyum taakanaaq chi awab'ejink sa' laana'aj chirix laakamik? K'a'ut naq laj Adonías xxaqab' rib' cho'q awab'ej?». 14Ut toj yooqat ajwi' chi aatinak rik'in li awab'ej naq tin'ok laa'in re xch'olob'ankil xyaalal laawaatin”.
15Toja' naq lix Betsabé ki'ok sa' xwarib'aal li awab'ej b'arwi' wank a'an. Li awab'ej tiix aj chik chi us ut lix Abisag aj Sunam nach'oolanink re. 16Tikto lix Betsabé kixhupub' rib' chiru ch'och' ut li awab'ej kixpatz' re: “K'a' xaq ru xak'ul?”, chan.
17Kisumeek: “At awab'ej, laa'at kaye we sa' jurament sa' xk'ab'a' li Qaawa' laaYos: «Laj Salomón laayum taa'awab'ejinq chiwix ut taak'ojlaaq sa' link'ojarib'aal». 18Ab'anan laj Adonías xxaqab' rib' cho'q awab'ej, chi ink'a' nakanaw laa'at, at inqaawa'. 19Xkamsiheb' li b'ooyx, li ninqi wakax ut karneer chi yo'oon ut xb'oqeb' chixjunileb' li ralal xk'ajol li awab'ej, jo' ajwi' laj Abiatar laj tij ut laj Johab, xjolomileb' laj puub', ab'anan laj Salomón, laj k'anjel chawu, ink'a' xb'oqe'k. 20At awab'ej, chixjunileb' laj Israel q'es ruheb' aawik'in chi royb'eninkil naq taaye reheb' ani taakanaaq cho'q awab'ej cho'q aaweeqaj, at inqaawa'. 21Wi maak'a' nakab'aanu chirix a'in, relik chi yaal naq tookamsiiq laa'in ut linyum, naq laa'at tatq'ajq tatsutq'iiq”.
22Toj yo ajwi' chi aatinak lix Betsabé rik'in li awab'ej naq kiwulak laj Natán li propeet. 23Ut kiyehe'k resil re li awab'ej: “Xk'ulunk laj Natán li propeet”. Naq a'in ki'ok wan wi' li awab'ej, kixhupub' rib' chiru ch'och' 24ut kixye: “At awab'ej, laa'at tana xatyehok naq laj Adonías taa'awab'ejinq chawix ut a'an taak'ojlaaq sa' laak'ojarib'aal. 25Xb'aan naq sa' li kutan a'in laj Adonías xkub'eek chi xmayejankileb' li b'ooyx, li ninqi wakax ut karneer chi yo'oon, ut xb'oqeb' chixjunileb' li ralal li awab'ej, li xjolomileb' laj puub' ut laj Abiatar laj tij. Anaqwan yookeb' chi wa'ak ut chi uk'ak rochb'een ut japeb' re chi xyeeb'al: «Chinimaaq xloq'al li awab'ej Adonías!». 26Ab'anan laa'in ink'a' xinxb'oq chi moko xb'oq laj Sadok laj tij ut laj Benaías, ralal laj Johadá. Ut ink'a' ajwi' xb'oq laj Salomón laawalal. 27At awab'ej, ma laa'at xaye naq taa'uxmanq chi jo'kan chi ink'a' xaye qe ani taak'ojlaaq sa' laak'ojarib'aal cho'q aaweeqaj?”, chan laj Natán.
Naq laj Salomón kixaqab'aak cho'q awab'ej
28Laj David li awab'ej kixtaqla xb'oqb'al lix Betsabé. Ut a'in koxxaqab' rib' chiru. 29Toja' naq laj David kixye sa' jurament: “Nimanb'ilaq xloq'al li Qaawa' li kinxkol chiru naab'al rahil ch'oolej! 30Laa'in kinye aawe sa' jurament sa' xk'ab'a' li Qaawa', xYos laj Israel, naq laj Salomón laayum taa'awab'ejinq chiwix laa'in. Ut a'an li ok we xb'aanunkil anaqwan!”.
31Toja' naq lix Betsabé kiwiq'laak ut kixhupub' rib' chiru ch'och', ut kixye: “Chinimaaq aaloq'al chi junelik, at awab'ej David, aj eechal we!”, chan. 32Chirix chik a'an laj David li awab'ej kixye: “B'oqomaq chaq laj Sadok laj tij, laj Natán li propeet ut laj Benaías, ralal laj Johadá”. Naq eb' a'an ke'ok wan wi' li awab'ej, 33kiyehe'k reheb': “K'amomaqeb' cherix eb' laj k'anjel chiwu laa'in li awab'ej. Taqsihomaq laj Salomón li walal chirix linmuul ut kub'enqex sa' li na'ajej Kijón xk'ab'a', 34ut aran li walal taayule'q cho'q awab'ej re Israel xb'aan laj Sadok laj tij ut laj Natán li propeet. Toja' naq teeyaab'asi li xukub' ut teeye: «Nimanb'ilaq li awab'ej Salomón!», cha'qex. 35Chirix chik a'an texk'ulunq chirix, ut naq tol'elq arin, taak'ojlaaq sa' link'ojarib'aal cho'q weeqaj, xb'aan naq a'an li sik'b'il ru inb'aan chi awab'ejink sa' xb'een Israel ut Judá”.
36Kichaq'ok laj Benaías, li ralal laj Johadá, ut kixye re li awab'ej: “Jo'kan taxaq! Jo'ka'in naq chiyeemanq xb'aan li Qaawa', xYos li awab'ej laj eechal we! 37Jo' naq li Qaawa' xwank aawik'in, at awab'ej, jo'kan taxaq naq chiwanq rik'in laj Salomón. Ut chixk'e taxaq chi nimank li xwankil chi q'axal yo'oon wi' chik chawu laa'at, at awab'ej!”.
38Toja' naq laj Sadok laj tij, laj Natán li propeet ut laj Benaías, ralal laj Johadá, koheb' rochb'eeneb' laj Keret ut laj Pélet. Koxe'xtaqsi laj Salomón chirix li xmuul laj David li awab'ej ut ke'xk'am toj Kijón. 39Aran laj Sadok laj tij kixxok sa' li Loq'laj Muheb'aal li xukub' re li aseeyt ut kixyul laj Salomón chiru a'an. Chirix chik a'an ke'xk'e chi yaab'asiik li tronpeet ut chixjunil li tenamit chi kaw xyaab'eb' xkux ke'ok chi xyeeb'al: “Nimanb'ilaq taxaq li awab'ej Salomón!”. 40Ut chixjunil li tenamit koheb' chirix, yookeb' chi xyaab'asinkil li xolb'. K'ajo' xsahilaleb' xch'ool: ka'aj chik maa na'uq'e'k li ch'och'!
41Raqe'k re chi wa'ak laj Adonías ut chixjunileb' li rochb'een, naq ke'rab'i li yo chi k'ulmank. Ut naq kirab'i xyaab' li tronpeet, laj Johab kixpatz': “K'aru xk'ulmank sa' li tenamit naq neke'choqoqnak?”, chan.
42Toj yo ajwi' chi aatinak naq kiwulak laj Jonatán, ralal laj Abiatar laj tij: “Okan. Laa'at chaab'ilat ut ch'olch'o naq chaab'il esil xak'am chaq”, chan laj Adonías.
43Kisumeek xb'aan laj Jonatán: “Moko jo'kan ta. Laj David li qaawa' xxaqab' laj Salomón cho'q awab'ej, 44ut xye re laj Sadok laj tij ut laj Natán li propeet, jo' ajwi' re laj Benaías, ralal Johadá, reheb' laj Keret ut eb' laj Pélet naq te'rochb'eeni laj Salomón; ut eb' a'an xe'xtaqsi chirix li xmuul li awab'ej. 45Laj Sadok laj tij ut laj Natán li propeet xe'xyul chaq rik'in aseeyt cho'q awab'ej aran Kijón ut xe'sutq'iik chaq chi q'axal saheb' sa' xch'ool. Jo'kan naq neke'choqoqnak li tenamit: a'an li mululij ib' yookex rab'inkil. 46Jo'kan ajwi', laj Salomón ak xk'ojlaak sa' li xk'ojarib'aal, 47ut eb' laj k'anjel chiru laj David li awab'ej xe'wulak chi xk'eeb'al xsahil xch'ool rik'in xyeeb'al re: «A' taxaq li Yos chixnimob'resi xwankil laj Salomón chi yo'oon chawu laa'at ut chixyu' ru li x'awab'ejihom chiru laawe!». A' ajwi' laj David li awab'ej xchunub' rib' chiru li xch'aat chi xloq'oninkil li Yos 48ut xye: «Chinimaaq xloq'al li Qaawa', xYos laj Israel, naq chiru li kutan a'in xxaqab' cho'q awab'ej jun reheb' li walal, ut laa'in xwil rik'in wu»”.
49Toja' naq jwal ke'xiwak chixjunileb' li b'oqb'ileb' xb'aan laj Adonías, ke'xaqliik ut chi xjunjunqaleb' koheb' sa' rochocheb'. 50Ab'an laj Adonías kixxiwa ru laj Salomón, kixaqliik, koho sa' li Loq'laj Muheb'aal chi xmuqb'al rib' ut koxchap li xxuk li artal. 51Tikto koxe'xye re laj Salomón: “Laj Adonías yo xxiw chiru laj Salomón li awab'ej, ut xo'xmuq rib' ut kixchap li xxuk li artal, yo chi xyeeb'al: «Anaqwan ajwi' xyehaq raatin laj Salomón li awab'ej naq ink'a' tinxkamsi»”.
52Kichaq'ok laj Salomón ut kixye: “Wi taawanq jo' jun li winq chaab'il xch'ool, ink'a' taat'ane'q sa' ch'och' junaq rismal xjolom. Ab'anan wi taatawmanq xlab'alil xch'ool, taakamsiiq”, chan.
53Tikto laj Salomón li awab'ej kixtaqlaheb' winq re xkub'sinkil chaq sa' li artal. Chirix chik a'an laj Adonías kolxwiq'ib' rib' chiru laj Salomón li awab'ej, ut a'in kixye re: “Ayu sa' laawochoch”, chan.
Currently Selected:
1 R 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.