1 R 2
2
Laj David kixchaq'rab'i laj Salomón
1Naq ak kamk re laj David, kixtaqla xb'oqb'al laj Salomón li ralal, re xchaq'rab'inkil: 2“Chi seeb' tinq'ajq tinsutq'iiq, jo' neke'xk'ul chixjunileb'. Kawaq aach'ool ut wanqat jo' chaab'il winq. 3Chapaab' li xtaqlahom li Qaawa' laaYos. Chapaab' li raatin, li xq'usum, li xtijleb' ut li xchaq'rab' xtz'iib'ahom laj Moisés, re naq us tat-elq sa' chixjunil li taab'aanu yalaq b'ar tatxik. 4Chi jo'kan li Qaawa' tixb'aanu li kixyeechi'i we naq kixye: «Wi eb' laawalal tine'xpaab' anchaleb' xch'ool ut anchaleb' raanm, wi chaab'il te'wanq ut tiikaqeb' xch'ool, junelik eb' laawalal te'wanq sa' li k'ojarib'aal chi rawab'ejinkileb' laj Israel».#2,4 2 S 7,11-16.
5“Ch'olch'o chawu k'aru kixb'aanu we laj Johab, ralal laj Sarbia, naq kixkamsiheb' wiib' xjolomileb' laj puub' re Israel, a' laj Abner,#2,5 2 S 3,27. ralal laj Ner, ut laj Amasá,#2,5 2 S 20,10. ralal laj Jéter: sa' xq'ehil li wank sa' tuqtuukilal kireeqaju li kamsink kiwank sa' li nimla yalok, ut sa' inb'een kixteneb' li maak a'an. 6B'aanu re li k'aru us chawu, ab'an maakanab' chi tixk sa' tuqtuukilal. 7Ab'anan usilal chab'aanu reheb' li ralal laj Barsilay aj Galahad.#2,7 2 S 17,27-29. Taak'eheb' chi tzekank sa' laameex, xb'aan naq a'aneb' tz'aqal ke'tenq'ank we naq kin'elelik chiru laj Absalón laawas. 8Misachk sa' aach'ool laj Semehí, ralal laj Kerá, Bajurín xtenamit sa' xteepal Benjamín. A'an makach'in kimajewank we naq kohin Majanáhin;#2,8 2 S 16,5-13. ab'anan, chirix a'an, kikub'eek chire li nima' Jordán chink'ulb'al, ut laa'in kinye re sa' jurament sa' xk'ab'a' li Qaawa' naq ink'a' tinkamsi.#2,8 2 S 19,16-23. 9Maakanab' chi ink'a' ta tixtoj rix li xmaak. Laa'at wank aana'leb' ut nakanaw chi us k'aru taab'aanu, re naq ra tixk'ul sa' xkamik”.
Xkamik laj David
(1 Kr 29,26-30)
10Laj David kiq'ajk kisutq'iik rik'ineb' li xna' xyuwa' ut kimuqe'k Jerusalén sa' li xtenamit. 11Ka'k'aal chihab' ki'awab'ejink laj David sa' xb'een Israel: wuqub' chihab' ki'awab'ejink aran Hebrón ut oxlaju xka'k'aal chihab' sa' li tenamit Jerusalén.#2,11 2 S 5,4-5; 1 Kr 3,4. 12Chirix a'an, laj Salomón kik'ojlaak sa' xk'ojarib'aal laj David li xyuwa',#2,12 1 Kr 29,23. ut kikawuuk xwankil li x'awab'ejihom.
Xkamik laj Adonías
13Laj Adonías, xyum lix Jakit, koho rik'in lix Betsabé, xna' laj Salomón, ut lix Betsabé kixpatz' re: “Ma re tuqtuukilal xatchalk wi'?”, chan. “Hehe', re tuqtuukilal”, chan naq kichaq'ok a'an. 14Ut tikto kixye: “Xinchalk chi xtz'aamankil jun li usilal chawu”. Kixye lix Betsabé: “Ye k'aru taawaj”.
15Laj Adonías kixsume: “Laa'at nakanaw naq laa'in raj xin'ok chi awab'ejink ut chixjunileb' laj Israel yookeb' chaq chi royb'eninkil naq laa'in xinkanaak cho'q awab'ej. Ab'anan li awab'ejihom xmaq'mank chiwu ut xk'eemank re li wiitz'in, xb'aan naq jo'kan xraj li Qaawa'. 16Anaqwan wank jun li usilal twaj xtz'aamankil aawe, ut maaram chiwu”, chan. “Ye we k'aru taawaj tinb'aanu”, chan lix Betsabé.
17Toja' naq laj Adonías kixye: “Nintz'aama chawu naq tat-aatinaq rik'in laj Salomón li awab'ej, naq xk'ehaq cho'q wixaqil lix Abisag aj Sunam, xb'aan naq ninnaw maak'a' tixram li awab'ej chawu”. 18Kichaq'ok lix Betsabé ut kixye: “Us, tin'aatinaq rik'in li awab'ej”, chan re.
19Toja' naq ki'ok lix Betsabé wan wi' laj Salomón li awab'ej re aatinak chirix laj Adonías. Ut li awab'ej kiwakliik chi xk'ulb'al li xna', kixk'utzub' rib' chi xk'eeb'al xsahil xch'ool ut kik'ojlaak wi' chik sa' li xk'ojarib'aal, ut kixpatz' jun xk'ojarib'aal li xna', ut a'in kik'ojlaak sa' li xnim: 20“Twaj xtz'aamankil jun ch'ina usilal chawu, ut maaram chiwu”, chan lix Betsabé. Kichaq'ok li awab'ej ut kixye: “At inna', tz'aama li k'aru taawaj, ut maak'a' tinram chawu”.
21“K'e lix Abisag, laj Sunam, cho'q rixaqil laj Adonías laawas”, chan lix Betsabé.
22Kichaq'ok li awab'ej ut kixye re li xna': “K'a'ut naq yookat chi xtz'aamankil lix Abisag aj Sunam cho'q rixaqil laj Adonías? Ka'aj chik maa taapatz' we xq'axtesinkil li awab'ejihom, xb'aan naq a'an was ut laj Abiatar laj tij ut laj Johab, ralal lix Sarbia, neke'okenk chirix!”.
23Toja' naq laj Salomón li awab'ej kixye xjurament sa' xk'ab'a' li Qaawa': “A' taxaq li Yos tinxk'e chi xtojb'al linmaak chi q'axal ra, wi ink'a' taakamq laj Adonías xb'aan li k'aru xtz'aama chiwu. 24Sa' xk'ab'a' li Qaawa' li xk'ojob'ank we sa' xna'aj laj David linyuwa' ut xk'e inwankil cho'q awab'ej ut xkawub' linjunkab'al jo' tz'aqal kixyeechi'i, ninye li waatin naq sa' li kutan a'in ajwi' taakamq laj Adonías”, chan.
25Toja' naq laj Salomón li awab'ej kixtaqla laj Benaías, ralal laj Johadá, ut a'an koho ut kixkamsi laj Adonías.
Laj Abiatar ut laj Johab
26Moqon chik laj Salomón li awab'ej kixye re laj Abiatar laj tij: “Ayu Anatot, sa' laatenamit. Aak'ulub' kamk, ab'anan ink'a' nawaj aakamsinkil anaqwan sa' xk'ab'a' naq laa'at katk'amok re li xLoq'laj Kaax li Qaawa' chiru laj David linyuwa',#2,26 2 S 15,24. ut kawotz rochb'een a'an chixjunil li rahilal kixk'ul”.#2,26 1 S 22,20-23. 27Chi jo'kan laj Salomón kirisi laj Abiatar cho'q aj tij chiru li Qaawa', ut rik'in a'an kitz'aqlok ru li xyehom li Qaawa' chirix li xjunkab'lal laj Elí, aran Siló.#2,27 1 S 2,27-36.
28Naq laj Johab kirab'i li esil a'in, ki'elelik ut koxmuq rib' sa' li xLoq'laj Muheb'aal li Qaawa' ut koxchap li xxuk li artal. Kixb'aanu chi jo'kan xb'aan naq ki'okenk chirix laj Adonías (ab'anan ink'a' ki'okenk chirix laj Absalón). 29Kiyehe'k resil a'in re laj Salomón: “Laj Johab xo'xmuq rib' sa' li xLoq'laj Muheb'aal li Qaawa' ut wank chi xk'atq li artal”. Toja' naq laj Salomón kixtaqla xyeeb'al re laj Johab: “K'aru xak'ul naq xamuq aawib' sa' li artal?”. Kichaq'ok laj Johab: “Xinxiwak chawu ut xinmuq wib' rik'in li Qaawa'”, chan. Toja' naq laj Salomón kixtaqla laj Benaías, ralal laj Johadá, ut kixye re: “Ayu ut kamsi”. 30Ki'ok laj Benaías sa' li xLoq'laj Muheb'aal li Qaawa' ut kixye re laj Johab: “Laj Salomón li awab'ej xye chaq naq elen aran”. Kichaq'ok laj Johab: “Ink'a', arin tinkamq”, chan. Koho wi' chik laj Benaías rik'in li awab'ej chi xyeeb'al li xsumehom laj Johab, ut kixye re: “Jo'ka'in x'aatinak laj Johab”. 31Kichaq'ok li awab'ej: “B'aanu re jo' xye a'an. Kamsi ut taamuq. Rik'in a'an taawisi sa' inb'een ut sa' xb'eeneb' li ralal xk'ajol linyuwa' li maak kixb'aanu laj Johab naq kixkamsiheb' li winq li maak'a'eb' xmaak. 32Li Qaawa' chixteneb' sa' xb'een laj Johab li xkamikeb' li wiib' chi winq jwal tiikeb' xch'ool ut q'axal chaab'ileb' chiru a'an. Kixkamsiheb' chi ch'iich' chi ink'a' kixnaw laj David linyuwa': a' laj Abner, ralal laj Ner, xjolomileb' laj puub' re Israel, ut laj Amasá, ralal laj Jéter, xjolomileb' laj puub' re Judá. 33Li xkik'el eb' li wiib' chi winq a'an chikanaaq chi junajwa sa' xb'een ut sa' xb'eeneb' li ralal xk'ajol! A'ut cho'q re laj David, cho'q reheb' li ralal xk'ajol, li xjunkab'lal ut li xk'ojarib'aal, chiwanq chi junelik tuqtuukilal sa' xk'ab'a' li Qaawa'”, chan laj Salomón.
34Toja' naq laj Benaías, ralal laj Johadá, koho ut koxkamsi laj Johab. Chirix chik a'an ke'xmuq sa' li rochoch, sa' li chaqich'och'. 35Ut laj Salomón li awab'ej kixxaqab' laj Benaías, ralal laj Johadá, cho'q xjolomileb' laj puub', reeqaj laj Johab; ut kixkanab' laj Sadok laj tij sa' xna'aj laj Abiatar.
Xkamik laj Semehí
36Chirix chik a'an laj Salomón li awab'ej kixtaqla xb'oqb'al laj Semehí ut kixye re: “Yiib' junaq aawochoch Jerusalén. Aran wanqat ut maab'ar tat-elq. 37Ch'olch'o chawu naq sa' li kutan tatq'axonq wi' junpak'al li nima' Sedrón, tatkamq ut aamaakaq aawib'”. 38Kichaq'ok laj Semehí: “Us li nakaye we. Tinb'aanu jo' xaye, at awab'ej”, chan.
Laj Semehí kiwank Jerusalén chiru naab'al kutan. 39Ab'an oxib' chihab' chik xnumik a'an, wiib' aj k'anjel chiru laj Semehí ke'elelik ut koheb' rik'in laj Akis, ralal laj Mahaká, awab'ej re Kat. Kiyehe'k resil re laj Semehí: “Eb' laj k'anjel chawu wankeb' chaq aran Kat”. 40Toja' naq laj Semehí kiwakliik, kixk'e rix li xb'uur ut koho sa' li tenamit Kat, rik'in laj Akis, re xsik'b'aleb' laj k'anjel chiru. Koho aran Kat ut kixk'ameb' chaq laj k'anjel chiru. 41Naq kiyehe'k resil re laj Salomón: “Laj Semehí x'elk Jerusalén re xik Kat ut xk'ameb' chaq laj k'anjel chiru”, 42li awab'ej kixtaqla xb'oqb'al laj Semehí ut kixye re: “Ma ink'a' tab'i' xatink'e chi xyeeb'al aajurament sa' xk'ab'a' li Qaawa' ut xinch'olob' chawu: «Sa' li kutan tat-elq wi' arin re xik b'ar taawaj xik, ch'olch'ooq chawu naq tatkamq»? Ut laa'at xk'ulub'an aach'ool li xinye aawe. 43K'a'ut naq ink'a' xapaab' li xaye sa' xk'ab'a' li Qaawa' ut xaq'et li chaq'rab' xink'e aawe? 44Laa'at nakanaw chi us ut wank sa' aach'ool chixjunil li rahilal xab'aanu re laj David linyuwa'. Anaqwan li Qaawa' tixteneb' sa' aab'een chixjunil li maa'usilal xab'aanu! 45A'ut osob'tesinb'ilaq laj Salomón li awab'ej xb'aan li Qaawa' ut k'ojk'ooq xwankil li xk'ojarib'aal laj David, chi junajwa chiru li Qaawa'”.
46Toja' naq laj Salomón li awab'ej kixtaqla laj Benaías, ralal laj Johadá, re xkamsinkil laj Semehí, ut a'an ki'elk ut kixkamsi. Chi jo'kan li xwankilal li awab'ejihom kikanaak chi kaw sa' ruq' laj Salomón.
Currently Selected:
1 R 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.