1 Jn 5
5
Li qapaab'aal
1Chixjunil li napaab'ank re naq li Jesus a'an li Kriist, a'an yo'lajenaq rik'in li Yos; ut chixjunil li narahok re junaq yuwa'b'ej naxra ajwi' li yo'lajenaq chaq rik'in. 2Rik'in a'in naqanaw naq naqaraheb' li ralal xk'ajol li Yos: wi naqara li Yos ut naqapaab'eb' li xchaq'rab'. 3Xb'aan naq a'an a'in li xraab'al li Yos: naq chiqapaab' eb' li xchaq'rab'. Ut eb' li xchaq'rab' moko aaleb' ta, 4xb'aan naq chixjunil li yo'lajenaq rik'in li Yos naxq'ax ru li ruuchich'och'. Ut a'an a'in li xq'axmank wi' ru li ruuchich'och': a' li qapaab'aal. 5Ani naq'axok ru li ruuchich'och'? Ma ink'a' tab'i' li naxpaab' naq li Jesus a'an li Ralal li Yos?
6A'an a'in li kik'ulunk rik'in ha' ut rik'in kik': a' li Jesukriist. Moko ka'aj ta wi' rik'in ha', rik'in b'an ha' ut kik'. Ut li nayehok naq yaal, a'an li Musiq'ej, xb'aan naq li Musiq'ej a'an li yaal. 7Xb'aan naq oxib'eb' li testiiw: 8li Musiq'ej, li ha' ut li kik', ut li oxib' a'in junaj ru neke'xye. 9Laa'o naqak'ulub'a li yaal ch'olob'anb'il xb'aaneb' li winq, ab'an q'axal wi' chik wank xwankil li xyehom li Yos li naxch'olob' li yaal chirix li Ralal.
10Ani napaab'ank re li Ralal li Yos, ch'olch'o ru li yaal rik'in; a'ut li ink'a' napaab'ank re li Yos, naxk'e li Yos cho'q aj tik'ti', xb'aan naq ink'a' naxpaab' li xyehom li Yos chirix li Ralal. 11Ut a'an a'in li xch'olob'ahom li Yos: naq xk'e qe li junelik yu'am ut li yu'am a'in wank rik'in li Ralal. 12Ani aj ik'in wank li K'ajolb'ej, wank li yu'am rik'in; ani aj ik'in maak'a' li K'ajolb'ej, maak'a' ajwi' li yu'am rik'in.
Xraqik li hu
13Xintz'iib'a a'in eerik'in laa'ex li nekexpaab'ank sa' xk'ab'a' li Ralal li Yos, re naq ch'olch'ooq cheru naq wank eejunelik yu'am.
14A'in wan wi' xkawub' qach'ool rik'in li Yos: naq A'an nokoorab'i wi wank k'aru tqatz'aama chiru jo' chanru naraj A'an. 15Ut wi ch'olch'o chiqu naq nokoorab'i rik'in chixjunil li tqatz'aama, naqanaw ajwi' naq ak wank qik'in li k'aru xqatz'aama chiru.
16Wi ani taaril li ras riitz'in chi xb'aanunkil junaq maak li maawa' re kamk, chitijoq chiru li Yos ut taak'ehe'q xyu'am laj maak: yookin chi aatinak chirix li naxb'aanu junaq maak maawa' re kamk, xb'aan naq wank jun li maak re kamk,#5,16 Ch'a'aj xyeeb'al k'aru tz'aqal li maak a'in. Li apóstol yo chi aatinak chirixeb' li neke'xram li junelik yu'am: tik ink'a' neke'raj xq'axtesinkil rib'eb' re li Qaawa'. Cf. 1 Jn 2,18-29; 4,3; Mt 12,31-32; Heb 10,26-31. ut maak'a' rajb'al li tijok chirix a'an. 17Chixjunil li maa'usilal a'an maak, ab'an wank maak maawa' re kamk.
18Naqanaw naq chixjunil ani yo'lajenaq rik'in li Yos, ink'a' chik namaakob'k, nak'aak'aleek b'an xb'aan li Ralal li Yos, ut li maa'us ink'a' naru tixch'e'. 19Naqanaw naq reho li Yos ut chixjunil li ruuchich'och' wank rub'el xwankil li maa'us. 20Ab'an naqanaw ajwi' naq li Ralal li Yos kik'ulunk ut kixk'e qana'leb' re naq chiqanaw ru li tz'aqal Yos.#5,20 A'an li jun chi Yos, yo'yo ut wank chi junelik. Ka'ajwi' a'an tento xloq'oninkil (cf. 1 Jn 5,21). Ut laa'o wanko rik'in li tz'aqal Yos, rik'in li Ralal, a' li Jesukriist. A'an a'in li tz'aqal Yos ut li junelik yu'am.
21Ex inkok'al, chekolaq eerib' chiruheb' li yal k'oxlanb'il yos!#5,21 1 Ko 10,14; Gal 5,20.
Currently Selected:
1 Jn 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.