1 Jn 2
2
1Ex inkok'al, nintz'iib'a a'in eerik'in re naq mexmaakob'k; ab'an wi wanq junaq taamaakob'q, wank jun aj aatinanel chiqix chiru li Yuwa'b'ej, a' li Jesukriist, li tiik xch'ool. 2A'an li kames-mayej chirix li qamaak,#2,2 Li Jesus a'an li kames-mayej xb'aan naq kixmayeja rib', kixk'e rib' chi kamk sa' qak'ab'a' laa'o aj maak. ut moko ka'aj ta wi' chirix li qamaak, chirix aj b'an wi' xmaakeb' chixjunil li ruuchich'och'.
Chiqapaab' li xchaq'rab' li Yos
3A'an a'in naqanaw wi' naq naqanaw ru li Yos, wi naqapaab' eb' li xchaq'rab'. 4Wi junaq nayehok: “Laa'in ninnaw ru”, ut wi ink'a' naxpaab' li xchaq'rab', a'an aj tik'ti' ut maak'a' li yaal rik'in. 5A'ut li naxpaab' li Raatin, relik chi yaal naq li xraab'al li Yos tz'aqlojenaq re ru rik'in. A'an naqanaw wi' naq wanko rik'in. 6Ani nayehok naq wank rik'in li Yos, tento taawanq jo' naq kiwank li Jesus.
7Ex inrahom, ink'a' nintz'iib'a eerik'in jun ak' chaq'rab', jun b'an najteril chaq'rab' li wank eerik'in chalen chaq sa' xtiklajik. Li najteril chaq'rab' a'an li Aatin li xerab'i. 8Ab'anan ak' ajwi' li chaq'rab' li nintz'iib'a eerik'in (ut a'an tz'aqal yaal rik'in li Jesus ut eerik'in laa'ex), xb'aan naq li aak'ab' yo chi nume'k ut li tz'aqal saqenk ak nalemtz'unk.
9Ani nayehok naq wank sa' li saqenk ut xik' naril li ras riitz'in, toj wank ajwi' sa' li aak'ab'. 10Ani naxra li ras riitz'in, wank sa' li saqenk chi junelik ut ink'a' natichk'ok. 11A'ut li xik' naril li ras riitz'in, wank sa' li aak'ab' ut sa' li aak'ab' yo chi b'eek: ink'a' naxnaw b'ar yo chi xik, xb'aan naq li aak'ab' xmutz'o'b'resink re xsa' li ru.
Chiqakol qib' chiru li ruuchich'och'
12Nintz'iib'ak eerik'in, ex inkok'al, xb'aan naq kuyb'il sachb'il chik leemaak sa' xk'ab'a' li Jesus. 13Nintz'iib'ak eerik'in, ex yuwa'b'ej, xb'aan naq nekenaw ru A'an li wank chalen chaq sa' xtiklajik. Nintz'iib'ak eerik'in, ex saaj al, xb'aan naq xeq'ax ru li maa'us.
14Xintz'iib'ak eerik'in, ex inkok'al, xb'aan naq nekenaw ru li Yuwa'b'ej. Xintz'iib'ak eerik'in, ex yuwa'b'ej, xb'aan naq nekenaw ru A'an li wank chalen chaq sa' xtiklajik. Xintz'iib'ak eerik'in, ex saaj al, xb'aan naq kaw eerib' ut li Raatin li Yos xxe'eni rib' eerik'in ut xeq'ax ru li maa'us.
15Meera li ruuchich'och' chi moko li k'a'aq re ru wank sa' ruuchich'och'. Wi wank junaq naxra li ruuchich'och', moko wank ta li xrahom li Yuwa'b'ej rik'in. 16Xb'aan naq chixjunil li k'a'aq re ru wank sa' ruuchich'och' (li ratawankil li naraj li tz'ejwalej, li ratawankil li naraj li xsa' uhej ut li q'etq'etil xb'aan li b'ihomal) moko rik'in ta li Yuwa'b'ej nachalk, rik'in b'an li ruuchich'och'.
17Li ruuchich'och' ut li na'atawaak xb'aan, yal aj numeleb'; a'ut li nab'aanunk re li rajom li Yos a'an wanq chi junelik.
Chiqakol qib' chiruheb' laj tz'eqtaanahom re li Kriist
18Ex inkok'al, ak xtaw xhonal li roso'jikeb' li kutan. Eerab'ihom resil naq chalk re laj Tz'eqtaanahom re li Kriist. Relik chi yaal naq naab'aleb' laj tz'eqtaanahom re li Kriist xe'waklije'k chaq; jo'kan naq naqataw ru naq anaqwan li roso'jikeb' li kutan. 19Sa' qayanq xe'elk, ab'an moko qakomoneb' ta; wi ta qakomoneb', xe'kanaak raj qik'in. Ab'an xk'ulmank a'an re naq taak'utunq naq moko qakomoneb' ta chixjunileb'.
20A'ut laa'ex yulb'ilex xb'aan li Sant, a' li Kriist,#2,20 Cf. 2,27. Li yulb'ilo wi' a'an li Raatin li Yos chalenaq sa' xk'ab'a' li Kriist (Jn 6,69) ut na'uuchink sa' xk'ab'a' li Musiq'ej. K'eeb'il li Santil Musiq'ej reheb' laj paab'anel (1 Jn 3,24; 4,13; 2 Ko 1,21-22; 1 Ts 4,8) re naq te'xnaw chixjunil li yaal (Jn 16,13; 1 Ko 2,14-15). ut chejunilex neketaw ru. 21Moko xb'aan ta naq ink'a' nekenaw li yaal, naq nintz'iib'ak eerik'in. Laa'ex nekenaw li yaal ut maajun tik'ti' nachalk rik'in li yaal.
22Ani laj tik'ti'? Ma maawa' tab'i' li nayehok naq li Jesus maawa' li Kriist? A'an a'in laj Tz'eqtaanahom re li Kriist: a' li naxtz'eqtaana li Yuwa'b'ej ut li K'ajolb'ej. 23Chixjunil li ink'a' nach'olob'ank chirix li K'ajolb'ej, a'in maak'a' li Yuwa'b'ej rik'in; ab'an li nach'olob'ank chirix li K'ajolb'ej, wank li Yuwa'b'ej rik'in.
24Jo'kan naq chiwanq sa' leech'ool li k'aru eerab'ihom chalen chaq sa' xtiklajik. Wi wank sa' leech'ool li eerab'ihom chalen chaq sa' xtiklajik, texwanq ajwi' chi junelik rik'in li K'ajolb'ej ut li Yuwa'b'ej. 25A'an a'in li kixyeechi'i qe li Kriist, a' li junelik yu'am.
26Xintz'iib'a a'in eerik'in chirixeb' li neke'raj eeb'alaq'inkil. 27Ab'an toj wank eerik'in li Santil Musiq'ej li xexxsantob'resi wi' li Jesus ut ink'a' na'ajmank ru naq ani taatzoloq eere, xb'aan naq li Musiq'ej li santob'resinb'ilex wi', a'an natzolok eere chirix chixjunil,#2,27 Li xMusiq' li Jesus (cf. 2,20) naxk'e naq paab'ajelaq li raatineb' li apóstol (cf. 2,24). ut a'an yaal, maawa' tik'ti'. Jo'kan naq wanqex junelik rik'in li Jesus jo' chanru tzolb'ilex wi' xb'aan.
28Ut anaqwan, ex inkok'al, chexwanq rik'in li Kriist chi junelik re naq, jo'q'e tixk'ut rib', chiwanq xkawub' qach'ool ut ink'a' tooxutaanaq chiru, sa' li xk'ulunik.
29Wi nekenaw chi us naq li Jesus tiik xch'ool, chetawaq ajwi' ru naq chixjunil li nab'aanunk re li tiikilal, a'an yo'lajenaq rik'in li Yos.
Currently Selected:
1 Jn 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.