1 Ko 2
2
1Ex was wiitz'in, naq xinwulak sa' eeyanq, ink'a' xinwulak chi xpuktesinkil eere li xChaab'il Esil li Yos rik'in xninqal ru aatin malaj rik'in xninqal ru na'leb', 2xb'aan naq maak'a' xwaj xnawb'al sa' eeyanq, ka'ajwi' li Jesukriist, ut a'in k'eeb'il chiru krus. 3Xinwulak sa' eeyanq chi maak'a' inmetz'ew, chi yook inxiw ut ninsiksotk. 4Xin'aatinak ut xinch'olob' xyaalal moko rik'in ta xchaq'alil ru aatin neke'q'unb'esink ch'oolej, rik'in b'an li xk'utb'esinkil rib' xwankil li Musiq'ej, 5re naq ink'a' k'ojk'ooq leepaab'aal sa' xb'een xna'leb'eb' li winq, sa' xb'eenaq b'an xwankil li Yos.
6Yaal ajwi' naq sa' xyanqeb' li ak kaweb' sa' li paab'ank nokooch'olob'ank xninqal ru na'leb', ab'an maawa' xna'leb' li ruuchich'och' a'in chi moko xna'leb'eb' li neke'taqlank sa' ruuchich'och',#2,6 Eb' li neke'taqlank sa' ruuchich'och' mare a'aneb' li maa'us aj musiq'ej li wankeb' xwankil sa' xb'een li ruuchich'och' (cf. 1 Ko 15,24-25; Ef 6,12). li ak yo chi sachk xwankileb'. 7Nokoo'aatinak chirix xna'leb' li Yos, muqmuukil na'leb' li ink'a' natawmank ru ut kawresinb'il chaq xb'aan li Yos rub'elaj xtiklajik li ruuchich'och' re naq twanq xnimal qaloq'al. 8Maajun sa' xyanqeb' li neke'taqlank sa' li ruuchich'och' a'in ke'xtaw ru li na'leb' a'in, xb'aan naq wi ta ke'xtaw ru, ink'a' raj ke'xk'e chiru krus li Qaawa', laj Eechal re li loq'al. 9Ab'anan, jo' naxye li Santil Hu:
“Li ink'a' ilb'il ru, li ink'a' ki'ab'iik,
chi moko kik'oxlaak sa' xch'ool li winq,
a'an li kixkawresi li Yos cho'q reheb' li neke'rahok re”.#2,9 Is 64,4; Jr 3,16.
10Chixjunil a'an kik'utb'esiik chiqu xb'aan li Yos sa' xk'ab'a' li Musiq'ej, ut li Musiq'ej chixjunil nalajxtz'ili rix, a' ajwi' li xchamal xk'a'uxl li Yos.
11Ani tab'i' sa' xyanqeb' li winq nanawok chi us li xch'ool li winq? Ma ink'a' ka'ajwi' li xmusiq' li winq li wank rik'in a'an? Jo'kan ajwi' maa'ani nanawok xchamal xk'a'uxl li Yos, ka'ajwi' li xMusiq' li Yos. 12Ut laa'o ink'a' xqak'ul xmusiq' li ruuchich'och', xqak'ul b'an li Musiq'ej li nachalk rik'in li Yos, re naq tqataw ru chixjunil li xqamaatani rik'in li Yos. 13A'in tz'aqal li nokoo'aatinak wi', ink'a' rik'in aatin tzolb'il rik'in xna'leb' li ruuchich'och', rik'in b'an li aatin xqatzol rik'in li Musiq'ej: yooko chi xch'olob'ankil li k'a' re ru re li Musiq'ej, rik'in li aatin k'utb'il xb'aan li Musiq'ej.
14Li winq li maak'a' xMusiq' li Yos rik'in moko naxk'ulub'an ta li k'aru nachalk rik'in xMusiq' li Yos; memil na'leb' b'an cho'q re. Ut ink'a' naruhank chi xnawb'al a'an, xb'aan naq ka'ajwi' rik'in li Musiq'ej naru xtawb'al xyaalal. 15A'ut li winq li wank xMusiq' li Yos rik'in, chixjunil naxtaw ru ut maa'ani naraqok aatin sa' xb'een. 16Naxye li Santil Hu: “Ani xnawok ru xk'a'uxl li Qaawa'? Ani taaruhanq chi xk'eeb'al xna'leb' A'an?”.#2,16 Is 40,13. Ab'anan laa'o wank xk'a'uxl li Kriist qik'in.
Currently Selected:
1 Ko 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.