Mal 1
1
1Häp täja Lhawuk lhämet tä ifwenho Malaquías#1.1 N'olhey Malaquías yok, Ochenek. tä itayhte Israel lhayis.
Lhawuk lehumnhayaj tä itiyej Israel
2“Oaihumnhen”, Lhawuk iwoyetso. Wet amel lhok, “Ohanhiyejt'a tä lehumin n'ohen.”
“¿Hä Esaú lepuhfwahit'a Jacob? Häpe”, Lhawuk iwoyetso. “Wet ohumin Jacob 3wet Esaú oy'ulhan t'at.#Rom 9.11-13 Otchuma laka honhat wet owasthi laka tachenhas. Leläy lew'etes tä t'ekhawet oyen at itshätäy tä fwitses t'ekhaweta, wet äp ts'anis t'at.”
4Che Edom lhayis tä Esaú leles tä lepes lheley lhamel yok, “Õ'wasthi naji lhaka honhat lhäy'e hupuy. N'anech'aynhila”, wet Lhawuk tä laj letumfwaya yok, “Che lhamel inech'aynhihila, oyachajiholak owasthi. Laka honhat lheyla M'ak tä ni'isa Lew'et, tsi olham owäkw tä otiyej lhamel pajla'tha tiyäj'attsiy.” 5Amel atelhoy hiw'enla t'at, wet lhoyayhlak, “¡Lhawuk lewujyaj tefwaype Israel lakapes!”
Lhawuk ifwone sacerdotes
6Lhawuk tahuyej sacerdotes wet yok:
–N'atfwas tach'ahuye lajchalis, wet n'okawos tek lhainuhatpe lewuhuy. Che ohäpe amel Ajcha, ¿chipte tä katach'ahuya n'oye? Che ohäpe Awuk, ¿chipte tä alenuhat n'o'pe? Amel lewohit'a ohaya. Wet äp kamaj lhoyay, “¿Atsi m'ak tä n'am wo ahayayej?” 7Lehänaye oka altar n'olhäk tä nit'uhawetayej. Wet äp kamaj letay'ätshanej tä lhok, “¿Atsi m'ak tä oailäkwiyejlhi?” Amel leläkwlhi n'oyej tsi lhen w'et m'aka oka altar. 8Tä lhenay otw'ayhata itshäwet tä asnam, ¿hä is täjtso? Kha. Wok lew'en n'oho itshäwet tä tsufwlaj wok t'inhayaj länek,#Deut 15.21 ¿hä is täjtso? Kha, isit'a. ¡Lhek w'enho aka niyat! ¿Hä akäjilhila amejen? Kha. ¿Hä tachumla ahilähen? Kha. 9Athana lhek wo alhyaja n'oye häpkhilek oahip'altsen. Tsi ¿chi iwoyek okäjlhi amejen tä lewoye tähestso?
Lhawuk tä laj letumfwaya äp yok:
10–Ehit che iche elh amel che hip'ohi Owukwe lepelis häpkhilek nemhit w'et lehoye oka altar. Nemhit okäjlhi amejen, oleyej tä otchumlä m'ak tä lefwetaj lhen otw'ayhata.#Isa 1.10-13; Amós 5.21-24 11Wichi tä ihiche nilhokej honhatil iwunthilan'o, tälhe wichi tä tumej tä ifwala tälhche, lhäy'e wichi tä tumej tä ifwala y'uy. Nilhokej t'at wichi tä iwunla incienso wet ihänla n'oye otw'ayhtes tä isen tä newache m'ak che iyej. Matche, nilhokhiyeja wichi tä i'pe honhat tä iwujyenlan'o. 12Matlhat amel lewäkwyhayenn'o tä lekokyene oka altar lhäy'e häp n'olhäk tä leti'pe. 13Amel lhoyay, “¡Oy'elejen tähestso!”, wet lhenayn'o w'et m'aka. Wet äpte lhenayek otchumlahlä awomek tä etanhat, lhäy'e tä tsufwlaj wok t'inhayaj länek. 14Lewit'äy ihi elh tä lakafweynhayaj ihi tä fwetaj hiw'en n'oho lelä tä is wet äp nimattache lhämet, hiw'en at n'oho elh tä ni'isa. Lewit'äy ihi t'at hin'o tä tetso m'ak tä iwoye, tsi ohäpe Niyat tä lewujyaj ihi, Dios tä laj letumfwaya, wet äp olhey lenhoch'ayhyaj y'ajla'pe honhatil.
Currently Selected:
Mal 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.