Mal 2
2
Lhawuk äp yachajo tä ifwone sacerdotes
1-2Lhawuk tä laj letumfwaya äp tahuyej sacerdotes wet yok:
–Athana ofwel amhohen olhämet tä otayhat amehen. Lhek ch'ahuye m'ak tä ofwel amhohen. Che katach'ahuyaye wet katiyahi achowhal tä lewujyenn'o, oyok, Ochenla amehen awit'äyhyaj, owit'äynhila akäpfwayajay. Wet pajche owit'äyen t'at, tsi häp tä katiyayahiche achowhal.
3“Ihichet'ala ales che tälh amehen, wet nemla iche m'ak che aisej tsi okänchihla yachuyaj lhay tä wichi fwetaj hiw'en amhohen. Häp itshätäy tä õ'län tä lhenay otw'ayhtesa, otchumhiyela lhäk tä tälho lets'e wet otsäyhla'pe ate'pelis, wet äpte otfwomla amejen. 4Ofwel amhohen täjtso häpkhilek nittäya olhämette owoyeje ates Leví lhäy'e lelespej#Núm 3.11-13 tä häpe sacerdotes tä nekche len'äyij.” Häp tä iwoyetso Lhawuk tä laj letumfwaya.
5“Olhämette owoyeje häp tä lhamel iläyejiche wet äp letamsek. Ot'uhtehläk lhamel iwujyenn'o wet iwoye olhämtes. Wet matche, lhamel iwujyen'atn'o wet iwoye t'at olhämtes.#Núm 25.12-13 6Ichufwenej m'ak tä matche, w'et lhämtesit'a tä iwoye. Yiwetche m'ak tä is alhoho tä hap'ak n'oyej, wet itiyej kanhihlä wujpe wichi m'ak tä ni'isa.
7“Olham tä ohäpe Dios tä laj letumfwaya, pajche oyen oka silätwosa häp sacerdotes. Is che wichi ihoye t'at lhamel tä t'ukwe lehanyhayaj, wet sacerdotes is che ichufwenej olhämtes häp lhamel. 8Mat amel lestakej han'äyij, lenhäphänyenejen wuj lhamel häp achufwenyaj tä ni'isa. Letilhkat olhämette owoyeje ates Leví lhäy'e leles tä häpe ajchalis. 9Wet tä katach'ahuya n'oye, one'tehlak wichi aknitiya lhamhi. Oayenla häpeya iyhäj tä w'et m'ayhay t'at, tsi tä lechufwenhen wichi, wet lehumin iyhäj wet let'ulhan iyhäj.” Häp tä iwoyetso Lhawuk tä laj letumfwaya.
Amaj amej wet yej leyej hach'efwa
10¿Hä nilhokayej n'amel tä Lhajcha Dios? Häpe, tsi n'alhenhay. ¿Wet chipte tä y'atkan n'amejen wet y'akänchi Dios lhämet tä itiyej lhachätilis? 11Judá lheley nemhit hits'ilkat Lhawuk tä n'okwiyej. Iwoye m'ak tä hich'atej tä itihi Jerusalén lhäy'e honhat tä Israel. Ikänchiyej lakeyis Lhawuk Lewukwe tä T'amajchet tä wuj tä ihumin, tsi lhamel imäyejwethä atsinhay tä n'okwiyej dios lhayis tä kamatachehen. 12¡Ehit che Lhawuk tä laj letumfwaya isoyej tä in'amejen elh at che häpe tä iwoye m'akpej tä tetso, tej che fwetaj iwo t'awayhata Lhawuk!
13Wet iche m'ak elh tä amel lewoyaye. Letafwchehchä wet let'änhen, atet'ilis hip'otaj'atpe Lhawuk laka altar, tsi lham nemhit tachumlä awomhay. 14¿Wet äp amel letay'ätshanej m'ak at che te? Eh, häp tä Lhawuk ihanej tä kamattache ämet p'ante lefwenho atsinha tä lefwetaj lhehiyeja. Tä kamaj amamse tä lhewej atsinhatso, wet lefwetaj let'ifwtihiyeja. Mat lewohiyet'a. 15Tä Dios ayenlhi p'ante, t'uhläk alep'ajtej hach'efwa häpkhilek asanis weihalha.#Gén 2.24 M'ak tä tamenej häp tä iwatläk lewo alesa, häpkhilek lhamel häpehen Dios laka wichi. Wet häp tä tetso, yej leche ämet p'ante lewoyeje hach'efwa, ewej t'at pajla'tha athaläkw. 16N'amel tä n'ahäpehen Israel lhayis Lhawuk Dios yok:
–Oy'ulhan hin'o tä iwom lech'efwa wet lhaikokyentej m'ak tä ni'isa tä iwoye. Wet häp tä olham tä ohäpe Dios tä laj letumfwaya oyok, Amaj amej, wet yej leyej hach'efwa.#Prov 5.18-23; Mar 10.2-9; Ef 5.22-33
Atott'a alhoho ifwala tä Dios lakalelhthayaj
17Lhawuk y'elej tä tach'ahu amehen. Wet äp kamaj letay'ätshanaye, lhoyay:
–¿Chin'aj iwoye olhämtes che häp tä y'elej tä tach'ahu n'oyehen?
Tsi häp tä lhoyaypej, “Lhawuk akäjejlhi t'at wichi tä iwoye m'ak tä ni'isa. Yen häpeya iyhäj tä isen.” Amel lhenhiyet'ak Dios häpe Elh tä is alhoho.
Currently Selected:
Mal 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.