Hag 1
1
Häp Lhawuk inityenej wichi yämlek yachajo tä õyenlhi lham Lew'et
1Häp täkwfwas nekchämis tä rey Darío ihi p'ante leniyatyaj tä ihi Persia, häp wel'a tä seis, fwala tä ichun, tä Lhawuk ifwenho lhämet häp profeta tä lhey Hageo. Wet Lhawuk ne'tek Hageo iwo silätayej Judá kaniyat tä lhey Zorobabel tä Salatiel lhäs, lhäy'e Sacerdote tä Lhamya tä lhey Josué tä Josadac lhäs.#Esdras 4.24—5.2; 6.14
2-3Wet Hageo yok:
–Häp täja lhämet Lhawuk tä naj letumfwaya tä yok, “Häp wichina lhamel yäme tä kamaj ichäthiyet'a lewhäy chik lhamel yachajo tä yenlhi Ow'et. 4¿Hät lefwitajay is alhoho tä amel lheyaychufwi awukwey tä isis, mat häp Ow'etna häm wasi? 5Tä mälhyejtso, olham tä ohäpe Awuk Dios tä naj letumfwaya ofwen amhohen olhämet, oyok, Is chik wuj tä lhenay atichunhayaja häp m'ak tä i'amejen. 6Amel wuj tä letutcheyhen mat wujit'a m'ak tä lelanayhi. Let'ekhen mat kamaj lechuyuhen. Leyähen mat kamaj lechimhen. Lewoyay haw'uya mat kamaj lekofwahen. Wet elh tä ichumlhi ikalhi lakaha, mat w'awulhiyejt'a m'ak tä iwatlä, hätet iwoyek ithatho lakhäyhi tä toy.
7“Wet häp tä mälhyejtso, tä olham tä ohäpe Awuk Dios tä naj letumfwaya olhämet yok, Is chik wuj tä lhenay atichunhayaja häp m'ak tä i'amejen. 8Mäyay tä lehoyaye chenhas wet is chik lechäjay hal'äy wet enaylhi häp Ow'et tä lenech'aynhi, häpkhilek olham okäjejlhi wet on'älthilame owujyaj tä isi.
9“Amel wuj tä let'uyaykwe mat wujit'a m'ak tä lew'enay. Wet m'ayhay tä let'amajej tä ihi haw'etes, olham osekphä, oyäm nofwej yämlek niwohit m'ak chik imälhnhi. ¿Atsi m'ak tä tumenej tä owoynejetso? Häp tä olhak'alejlhi häp Ow'etna tä wasi, mat amel elh weihalhapej ts'ilak lham lew'et tä ilhak'alejlhi. Olham tä ohäpe Awuk Dios tä olhämet täjtso. 10Häp tä tumenej tä niwomahchä wet newache häp yachuyaj tä tälho honhat. 11Olham tä owoynejek tä niwomahchä yämlek honhat tamchäy, wet newache waj tä itsäype honhat, lhäy'e tä itsäype chenhas, lhäy'e alafwey, lhäy'e akäsw'etes, lhäy'e wichi, lhäy'e tshätäy, lhäy'e ilhokej m'ayhay tä lhen achumyaja.”
Wichi hich'ahuye Lhawuk lhämet wet iwo tesa tä yenlhi lham Lew'et
12Wet Zorobabel lhäy'e Josué, Sacerdote tä Lhamya, lhäy'e ilhokej wichi tä imälhnhi, lhamel hich'ahuye Lhawuk tä laka Dios lhämet tä lesilätwo profeta Hageo yen lhämeta. Wet lhamel nowaye Lhawuk. 13Wet Hageo iwo siläta wichi wet ifwenho lhamel Lhawuk lhämet tä yok:
–Häp Lhawuk yok, “Olham oi'amejen.”
14-15Häp mälhyej p'antetso tä Lhawuk ikhajyen Zorobabel tä Judá kaniyat, lhäy'e Josué, Sacerdote tä Lhamya, lhäy'e ilhokej wichi tä imälhnhi. Wet täkwfwas nekchämis tä rey Darío ihi p'ante leniyatyaj, tä ihi wel'a tä seis wet fwala tä veinticuatro, tä lhamel iwo tesa tä yenlhi laka Dios Lew'et, häp Lhawuk tä naj letumfwaya.
Currently Selected:
Hag 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.