Hag 2
2
Lhawuk ikhajyenhen wichi tä yenlhi lham Lew'et
1Ihi wel'a tä seis wet fwala tä veintiuno tä Lhawuk yachajo p'ante tä tahuyej profeta Hageo tä yok:
2–Ahuyej Zorobabel tä Judá kaniyat, lhäy'e Josué, Sacerdote tä Lhamya, lhäy'e ilhokej wichi tä imälhnhi, wet ätshane lhamel tä lhok, 3“¿Atsi iyhäj tä ikana tä hiw'enpe p'ante häp Lhawuk Lew'et tä ichun tä lesilatyaj ihi?#Esdras 3.12 Wet athana, ¿atsi m'ak tä mälhyej elh tä nech'ayekna? ¿Hät lew'enay tä tek hätej iwoye elh tä ichun p'ante tä wuj tä lesilatyaj ihi? 4Mat athana Lhawuk yok, ¡Akhajyen, Zorobabel! ¡Hätej am, Josué, tä ahäpe Sacerdote tä Lhamya, akhajyen! ¡Wet ilhokej amel tä wichi tä lheyayhi aka honhat, akhajyenhen! Chumaythä tsi olham oi'amejen. Olham tä ohäpe Awuk Dios tä naj letumfwaya, oyäm kalelhäj olhämet tä ofwen amhohenna, 5mälhyej olhämet tä ofwenhohte häp achätilis tä lhamel inukwephä tä tälho honhat tä Egipto.#Éx 29.45-46 Matche, oka Espíritu i'amejen. ¡Yej nowayhen!
6“Häp pitajiyejt'ala lewhäy tä olham ow'ahhathiyela pule lhäy'e honhat,#Heb 12.26 lhäy'e awalak lhäy'e honhat tä tamchäypa. 7Ow'ahhathiyela ilhokej honhatil, wet wichi ichäjla kana ilhokej m'ayhay tä laha ihi tä hiw'en, yämlek lesilatyaj poyej häp Ow'etna. 8Olham tä Olewuk ilhokej häp plata lhäy'e oro. 9Wet häp tä Ow'etna tä nech'ayekna wujla tä lesilatyaj ihi, inuhla'pe häp Ow'et tä ichunte. Wet ow'enhiholame letamsek wichi tä ihihla Ow'etna. Olham tä ohäpe Awuk tä naj letumfwaya tä olhämet täjtso.”
Lhawuk ifwenhomche wichi tä itihiyeja lhamel häp lakäpfwayaj tä is
10-11Häp ihi wel'a tä nueve wet fwala tä veinticuatro tä ihi häp nekchämtso tä rey Darío ihi p'ante leniyatyaj, tä Lhawuk Dios tä naj letumfwaya tahuyej häp profeta Hageo wet yok:
–Iche m'ak tä owatläk oy'ätshane häp sacerdotes.
Wet häp tä Hageo ihoye sacerdote lhayis wet y'ätshane lhamel tä yok:
12–Chik iche hin'o tä ichäj t'isan lhip tä t'amajchetej Lhawuk, ikäfwnhi lew'uy lhip, wet chik lew'uy lhip isitej pan, wok y'uyhi õpenek wok hat'es wok aceite, wok isitej õlhäk elh chik häpe, ¿hät nech'e häpe õlhäk tä t'amajchet?
Häp sacerdotes lhamel ichulho tä yok:
–Kha, häpkhit'a õlhäk tä t'amajchet.
13Wet Hageo yok:
–Mat chik iche elh tä kok'aye häp tä ichasen'e tseyek,#Núm 19.11-22 wet nech'e ichase õlhäk tä mälhyej tä oyämetso, ¿hät õlhäk nech'e kok'aye p'iya?
Häp sacerdotes lhamel ichulho tä yok:
–Ey'a, häp kok'aye.
14Wet Hageo ifwenho lhamel tä yok:
–Lhawuk lhämet yok, “Mälhyej'attso häp wichina, kok'ayehen t'at lhamel, lhäy'e ilhokej m'ak tä lhamel yenlhi, lhäy'e m'ak tä lhamel yen ow'ayhata tä ihäne Ow'etna. 15Häp tälhiyela fwalana, is chik amel lhenay atichunhayaja täjna. Häp tä kamaj amel kawoya tesa tä lhenaylhi häp Ow'etna, 16¿atsi m'ak tä amälhyejen naji? Tä hin'o ihoye õskonek tä t'ukwe veinte lewaylhahthis tä lhoy ihi, wet ts'ilak diez tä ilhoke. Wet tä elh ihoye lhip tä ihi tä õyenlhi hat'es tä t'uhläk itonphä cincuenta lehis, wet ts'ilak tä hiw'en veinte lehis tä hat'es ihi. 17Olham t'at tä olänejen ilhokej akäs häp tafwojhi tä chayo, lhäy'e kalatu, lhäy'e lewos tä tuj. Mat tej tä mälhyej'attso thayej, tek lewoyay ahusey iyhäja. Olham tä ohäpe Awuk Dios tä olhämet täjtso.
18“Fwalana, häp wel'a tä nueve wet fwala tä veinticuatro, häpe fwala tä õ'tihi lefwetes häp Ow'etna. Enay atichunhayaja täjtso, 19wet tetshanay olhämet tä oyok, Tanej tä kamaj newache yachuyaj wet hal'äy kamaj niwoya lhaya, mat chik ifwalas tä tay alhoho ihichela t'at m'ak chik amel aisej. Tsi otihla amejen okäpfwayaj tä is.”
Häp Lhawuk ifwenho p'ante lhämet Zorobabel
20Ihi fwalatso, häp fwala tä veinticuatro tä ihi wel'atso, tä häp Lhawuk yachajo p'ante tä tahuyej profeta Hageo. Häp Lhawuk ifwenho lhämet tä yok:
21–Ahuyej Zorobabel tä Judá kaniyat, fwenhola tä olham ow'ahhathiyela pule lhäy'e ilhokej honhat. 22Okänchihla hin'ol leniyatyajay, lhäy'e len'ohyajay, wet owasthihichela lakaletas tä laka'tshayajchal, wet othatlahchä sip'älis tä iche'pe yel'atas. Wet y'inhenla yel'atas, wet hin'ol tä iche'pe lhailänhihena yäk y'inhen. 23Fwenhola Zorobabel, olak, “Zorobabel tä oalakawo, chik näm fwalatso, olham ochumla ame, amälhnhiyejat ofwujhi tä otetnek tä ihi okwey, tsi olham tä otshupi ame. Olham tä ohäpe Awuk Dios tä naj letumfwaya tä olhämet täjtso.”
Currently Selected:
Hag 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.