Núm 4
4
M'ak tä õyen chumeta häp Leví lhayis tä tälhe letes Coat
1Lhawuk tahuyej Moisés lhäy'e Aarón wet yok:
2–Wo t'ufwahtesa Leví lhayis tä tälhe letes Coat, häp iyhäjpej tä lhalepuhfwas. 3Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe.
4“Wet Coat leles lechumet tä iwoye häpe ot'amajchet, tä häpe täja: 5Chik nichätepej lewhäy tä wichi yikhen, is chik Aarón lhäy'e leles ihochufwi carpa tä owukwe, wet ilanhi sak'al tä tumejlä lech'o tä Lhamya tä N'ot'amajchet, wet ikäfwelej Arca tä Ot'amajchet tä olhämtes ihi. 6Wet is chik hip'oyejpe inätetas t'ähes, wet hich'enpe wesaj tä y'it tä imälhewek, wet itihi hal'äy lew'etes yämthilek õtilhäj.
7“Wet häp mesa tä pan tä ot'amajchet lew'et, is chik lhamel hich'enpe wesaj tä y'it, wet iti'pe n'olhäthis, lhäy'e n'okalnhey tä wustas, lhäy'e lehis tä õ'tsäyho hat'es tä õyen otw'ayhata, häte pan tä wichi yen otw'ayhata nilhokej ifwalas. 8Nilhokej tähestso is chik hich'enpe wesaj tä ichät, wet ikäfwelej inätetas, wet itihi hal'äy lew'etes yämthilek õtilhäj.
9“Wet is chik tachuma wesaj tä y'it wet ikäfwelej n'ochäkwhis, lhäy'e lecha tä õyistejpej n'ochäk lhäk tä y'o, lhäy'e platofwas tä õ'tichechufwi, lhäy'e lehis tä õ'tsäyhomchepej aceite. 10Wet is chik hip'ajtitwek nilhokej, wet ikäfwelej inätetas t'ähes, wet iti'pe hal'äy tä lew'et yämthilek õtilhäj.
11“Häte is chik hich'enpe wesaj tä y'it häp altar tä oro, wet ikäfwelej inätetas t'ähes, wet itihi hal'äy lew'etes yämthilek õtilhäj.
12“Wet is chik ihutwek nilhokej m'ayhay tä õ'chumyenwethä tä ihi owukwech'o tä Lhamya tä Ot'amajchet, wet ithatho wesaj tä y'it, wet ikäfwelej inätetas t'ähes, wet iti'pe hal'äy tä lew'et yämthilek õtilhäj.
13“Wet is chik ilej itshäwet pe tä i'pe altar, lhäy'e mok'otaj, wet ikäfwelej wesaj tä ifwak'an, 14wet iti'pe nilhokej m'ayhay tä õ'chumyenejwethä altar: häp fwiyhol his, tenedores, pala lhayis, n'olhäthis, nilhokej m'ayhay tä õ'chumyenejwethä altar. Wet is chik hip'ajtitwek, wet ikäfwelej inätetas t'ähes, wet itihi hal'äy lew'etes yämthilek õtilhäj.
15“Wet chik wak'alh nilhokej m'ayhay tä ot'amajchetes tä Aarón lhäy'e leles ikäfwnhen, wet wak'alh yämthilek õyikchufwi, is chik nämhen Coat leles yämthilek lhamel talhunej. Mat isit'ak itsok m'ayhay tä ot'amajchetes, häpkhilek n'ilahen. Nilhok m'ayhay tä oyämetso Coat leles t'at tä tilhäjla.
16“Wet sacerdote Aarón lhäs Eleazar, häp tä itetshanhila häp aceite tä õ'tsäyhomchepej n'ochäkwis, lhäy'e incienso tä lenij akäjche, lhäy'e yachuyaj lhay tä is chik wichi yenpej otw'ayhata, lhäy'e aceite tä õ'tsäype m'ak chik õyen t'amajcheta. Häte is chik t'uye t'at owukwe lhäy'e nilhokej m'ayhay tä ichufwi tä õyen t'amajchetesa n'oyej.”
17Lhawuk äp tahuyej Moisés lhäy'e Aarón wet yok:
18–Isit'ak nofwej häp Coat leles 19chik lhaitott'ayne m'ayhay tä ot'amajchetes. Tä mälhyejtso, is chik Aarón lhäy'e leles ifwenho elh weihalhapej lhamel häp m'ak tä is chik iwoye, lhäy'e m'ak tä is chik tilhäj. 20Häpkhilek ihanhiyejt'a chik lhaitott'ayne wet iyahin m'ayhay tä ot'amajchetes, wet tek y'inhihena.
M'ak tä õyen chumeta häp Leví lhayis tä tälhe letes Gersón
21Lhawuk tahuyej Moisés wet yok:
22–Wo t'ufwahtesa Leví lhayis tä tälhe letes Gersón, häp iyhäjpej tä lhalepuhfwas. 23Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe.
24“Wet Gersón leles lechumet tä iwoye häpe täja: 25Is chik tilhäj carpa tä owukwe, lhäy'e lep'ot, lhäy'e laka cortinas, lhäy'e lep'ot tä inätetas t'ähes, lhäy'e n'oyik tä lepe p'ot, 26lhäy'e wesas tä iche laka alho tä ilunejlhi owukwe lhäy'e altar, lhäy'e wesaj tä ihi alho lepe, lhäy'e niyhäy tä õ'chumyenwethä. Is chik Gersón leles yen chumeta nilhokej m'ayhayna, 27wet is chik Aarón lhäy'e leles lhayen lewuka. Is chik ifwenho lhamel m'ak tä is chik iwoye, lhäy'e m'ak tä is chik tilhäj. Amel t'at tä one'tek letetshan. 28Häp täjtso m'ak tä is chik Gersón leles iwoye tä ihi owukwe, wet is chik sacerdote Aarón lhäs tä lhey Itamar tä itetshan lhamel.
M'ak tä õyen chumeta häp Leví lhayis tä tälhe letes Merari
29“Häte wo t'ufwahtesa Leví lhayis tä tälhe letes Merari, häp iyhäjpej tä lhalepuhfwas. 30Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe. 31Häp lhamel lechumet, is chik tilhäj owukwe laka tablas, lhäy'e lemäynhay, lhäy'e lech'utey, lhäy'e t'äsawetes, 32lhäy'e letsutes tä ilunejlhi laka alho, lhäy'e t'äsawetes, lhäy'e chinhas tä t'akw'etes, lhäy'e niyhäy, lhäy'e nilhokej m'ayhay tä iyej tä õ'chumyenwethä. Is chik lefwenho elh weihalhapej hin'o m'ak tä is chik tilhäj. 33Häp täjtso m'ak tä is chik Merari leles iwoye tä ihi owukwe, wet is chik sacerdote Aarón lhäs tä lhey Itamar tä itetshan lhamel.”
Õ'wo t'ufwahtesa häp Leví lhayis
34Moisés lhäy'e Aarón lhäy'e wichi kaniyatey, lhamel iwo t'ufwahtesa häp wichi tä tälhe letes Coat, häp iyhäjpej tä lhalepuhfwas. 35Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe. 36Wet iche dos mil setecientos cincuenta (2.750) lhamel. 37Häp tähestso Coat leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.
38Wet äp lhamel iwo t'ufwahtesa wichi tä tälhe letes Gersón, häp iyhäjpej tä lhalepuhfwas. 39Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe. 40Wet iche dos mil seiscientos treinta (2.630) lhamel. 41Häp tähestso Gersón leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.
42Wet äp lhamel iwo t'ufwahtesa wichi tä tälhe letes Merari, häp iyhäjpej tä lhalepuhfwas. 43Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe. 44Wet iche tres mil doscientos (3.200) lhamel. 45Häp tähestso Merari leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.
46Tä mälhyejtso, Moisés lhäy'e Aarón, lhäy'e Israel lhayis kaniyatey, lhamel iwo t'ufwahtesa Leví lhayis, häp iyhäjpej tä lhalepuhfwas. 47Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe. 48Wet tä nilhok, iche ocho mil quinientos ochenta (8.580) lhamel.
49Lhawuk t'at tä ne'tek Moisés iwo t'ufwahtesa wichi. Wet Moisés ifwenho elh weihalhapej m'ak tä is chik iwoye, lhäy'e m'ak tä is chik tilhäj, mälhyej tä Lhawuk ne'tek iwoye.
Currently Selected:
Núm 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.