Juan 6
6
Jesús hiw'enhomche lhäk wichi tä inu'pe cinco mil
(Mat 14.13-21; Mar 6.30-44; Luc 9.10-17)
1Tä tajyäme täjtso, wet Jesús iho w'echehi häp lewomek tä Galilea, tä äp õyen lheya Tiberias. 2Wet wujpe wichi tä yikche, tsi lhamel pajche hiw'en letetnhay tä iwoyepej tä ichesthen t'inhayaj länhay. 3Wet Jesús iho'pe chenaj, lhäy'e lechufwenkay, wet lhamel tatachephä. 4Häp ifwalatso tott'aye lewhäy Judío lhayis lakäjyaj tä Pascua.
5Tä Jesús iyahinlä wichi tä wuj tä ihoye, tahuyej Felipe wet yok:
–¿Chi y'atälhthi lhäk che y'achäj häpkhilek nilhokej wichina tuj?
6Mat tä iwoyetso, t'uhläk iläte m'ak tä Felipe letichunhayaj, tsi pajche ihanej t'at m'ak tä iwohiyela. 7Felipe nichulho wet yok:
–Tejlak otchumlhi ocho iwel'as, mat okaha w'awulhiyejt'a yämthilek ochäj pan wet ow'enho lhimphaj elhpej.
8Wet Jesús lechufwenkay elh tä lhey Andrés, Simón Pedro lechila, yok:
9–Ikana han'äfwaj tä hiw'en cincofwas pan tä häpe cebada lhäy'e w'ahat täkwfwas. ¡Mat w'awulhiyejt'a wichi tä wujna!
10Jesús ifwenho lechufwenkay wet yok:
–Fwenho wichi, is che nilhokej tatachephä.
Häp honhattso iche p'ante wuj hup tä i'pe, wet häp tä wichi tatachephä'pe. Wet wichi tä wujna, tajlhama hin'ol tä kalelhäj tä ihi cinco mil. 11Jesús tachuma pan wet iwo graciasayej Dios. Tä ileyej, ne'tek õhw'enhomche wichi tä tatachephä. Wet äp iwoynejetso häp w'ahat, wet wichi hiw'en t'at m'ak tä iwatlä. 12Tä lhamel yipsejen, Jesús ifwenhomche lechufwenkay wet yok:
–Hutaywek nilhokej lhipey tä imälhehi häpkhilek niwohit m'ak che tatäy.
13Wet lhamel ihutwek wet ihanchehen doce lehis tuskalis tä õyenlhi häp lhipey tä imälhehi tä tälhe cinco pan tä cebada.
14Tä wichi hiw'en letetnekna tä Jesús yenlhi, wet lhamel yok:
–Matche tä lham häpe t'at Profeta tä toyhlä tä nämla honhatena.
15Matkat tä Jesús ihanej tä wichi t'uhläk itsoklhi yämthilek yen häpeya laka niyat, yachajo tä yik wet iho'pe chenaj tä atojphä yämthilek ts'ilak lham.
Jesús t'äspe inät tä yik
(Mat 14.22-27; Mar 6.45-52)
16Tä nech'e honatsifwaj Jesús lechufwenkay ihoye lewomek 17wet tiyäjo chalana, wet hap'alakpe inät wet ihoye Capernaum. Wet tä nech'e honatsi wuj p'ante, mat kamaj Jesús tapinhiyet'a lhamel. 18Wet iche yafwthitaj tä äytaji wet iwo lhetheya inät. 19Tä lhamel nichäte p'ante cinco wok seis kilómetros, hiw'enlä Jesús tä tott'aye chalana tä lham t'äspe inät tä yik, wet lhamel wuj tä nowayhen. 20Mat Jesús yok:
–¡Olham t'at, yej nowayay!
21Wet lhamel yok:
–¡Lhuu Iwuk, tiyäjo chalana!
Häpet tä mälhyejtso, lhamel nichätho t'at lhip tä ihoye.
Wichi t'ukwe Jesús
22Tä ifwala elh wet wichi tä kamaj ihi lewomek lhip elh, lhamel yok:
–¿Chip ichetso Jesús? Tsi tä lechufwenkay yikhen naji, lham yikhichet'a, wet äp newache elh chalana.
23Wet iyhäj chalanas tä tälhe hupuy tä Tiberias, nämho lhip tä tott'aho honhat tä wichi tujnaj pan tä Lhawuk iwo graciasa'pe. 24Wet tä wichi nem hiw'en Jesús lhäy'e lechufwenkay, lhamel tiyäjo chalanastso wet ihoye Capernaum tä t'ukwe Jesús.
Jesús häpe pan tä iwo n'ow'atshancheyaja
25Tä lhamel nichäte lewomek lhip elh, hiw'en Jesús wet tay'ätshane tä yok:
–Maestro, ¿chip iwoye tä lenäm kana?
26Jesús nichulho wet yok:
–Matche, matche tä ofwel amhohen, M'ak tä tamenej tä let'uyay n'okwe häp tä let'ekhen naji yäk lhipsen. Häpkhit'a chik lehanayej m'ak tä owo otetnhayayej. 27Oyok, yej tachumlhi'pe n'olhäk tä nit'una, mat chumlhi'pe n'olhäk tä nittäya lhäy'e tä hiw'en amhohen haw'atshancheyaj tä t'un. Häp täja n'olhäk tä Hin'o Lhäs hiw'enla amhomche, tsi häp tä Dios Lhajcha yen Lewoyayej häp lham täjtso.
28Wichi tay'ätshane wet yok:
–¿Atsi m'ak tä is chik olhamel owoye yämlek oyenlhi Dios lechumtes tä t'uhläk owoye?
29Jesús nichulho wet yok:
–Dios t'uhläk let'ekhayaye lechenek. Häp täjtso tä lham t'uhläk lewoyaye.
30Wet wichi tay'ätshane wet yok:
–Tä mälhyejtso, ¿atsi atetnek chik lhenhilhila yämlek olhamel ow'en wet ot'ekha ame? Päyen n'oyehen m'ak tä lhenlhi. 31Olhamel ochätilis tuj p'ante lhäk maná tä lhamel ihi honhat tä ts'anis. Mälhyej Dios lhämet tä ihi Lehi tä yok, “Lham hiw'enhomche pan tä tälh puleye yämlek tuj.”#Éx 16.4,15; Sal 78.23-24
32Jesús nichulho lhamel wet yok:
–Matche, matche tä ofwel amhohen, Lhamhit'a Moisés tä hiw'en amhohen pan tä tälh puleye. Mat Ojcha häp tä hiw'en amhohen pan tä tälh puleye, wet äp häpe pan tä matche. 33Tsi pan tä Dios hiw'enho häpe t'at Hin'o tä tälh puleye, wet iwo lew'atshancheyaja häp wichi tä ihonhatena.
34Tä wichi iläte, wet yok:
–Woye tä owoye, w'enpeja n'ohohen häp pantso.
35Jesús yok:
–Olham ohäpe t'at pan tä iwo n'ow'atshancheyaja. Elh chik iho n'oye nemla nichuyu, wet elh chik t'ekha n'oye nemla ichim. 36Mat mälhyej tä ofwel amhohen, amel tej tä lew'enayn'o, mat tek let'ekhayay n'oye. 37Elh chik häpe chik Ojcha hiw'en n'oho, ihohla n'oye, wet elh chik iho n'oye tek otihiyeja kanhi. 38Tsi onek tä otälh puleye häpkhilek owoye m'ak tä lenech'ethayaj häp Ojcha tä lechenekn'o. Häpkhit'ak owoye m'ak tä olham onech'ethayaj. 39Wet Ojcha tä lechenekn'o, lham lenech'ethayaj tä t'uhläk nittäya elh lhamel tä lham hiw'en n'oho. Mat t'uhläk onuhthichephäla tä tälho n'op'itseyhay häp ifwala tä lepese. 40Tsi Ojcha iwatläk elh chik häpe chik hiw'en Dios Lhäs wet t'ekhaye, ikatej lew'atshancheyaj tä t'un. Wet onuhthiphäla tä tälho lep'itsek häp ifwala tä lepese.
41Tä Judío lhayis iläte tä yok, “Ohäpe pan tä tälh puleye”, wet lhamel yämejwethä 42wet yok:
–Häp hin'otsi Jesús, ¿hä kahäpeya José lhäs? N'amel y'antäfwelej hin'o tä lajcha lhäy'e atsinha tä lako. ¿Chipte tä yäm lhame tä tälh puleye?
43Mat Jesús tahuyej lhamel wet yok:
–Leyayej tä w'et lhäm'atwethä. 44Ihit'a katsik ihanej lhaiwoyneje chik iho n'oye, chik Ojcha tä lechenekn'o nihäna n'oye. Mat elh chik Ojcha ihän n'oye, onuhthiphäla tä tälho lep'itsek häp ifwala tä lepese. 45Ihi profetas lesaynhay p'ante yok, “Dios ichufwenla nilhokej wichi.”#Isa 54.13 Tä mälhyejtso, elh chik häpe chik tach'ahuye Ojcha wet lhaichufwenej lhämtes, häp tä iho n'oye.
46“Mat häpkhit'a chik elh hiw'en p'ante Ojcha. Tsi ihichet'a elh tä hiw'enpe, tajlhamat elh tä tälhe Dios, häp tä hiw'enpe. 47Wet oyok, matche, matche tä ofwel amhohen, Elh chik t'ekhahyaj ihi ikatej t'at lew'atshancheyaj tä t'un. 48Ohäpe pan tä iwo n'ow'atshancheyaja. 49Häp amel achätilis tuj p'ante maná tä lhamel ihi ts'anis, mat tej tä mälhyej'attso thayej, y'inhen t'at. 50Mat olham oyäme häp pan tä tälh puleye yämlek elh chik häpe chik tuj y'inhit'ala. 51Olham ohäpe t'at panna tä n'ow'atshancheyaj tä tälh puleye, wet elh chik tuj, lew'atshancheyaj ihihila yämlek tiyäj'attsiy. Häp pan tä olham ow'enhihola häpe t'at olham ot'isan, häpkhilek wichi tä i'pe honhat lew'atshancheyaj ihi.”
52Tä Judío lhayis iläte, yämwethä lhamhomche tä yok:
–¿Chiwoye lhämet hin'otsi? ¿Hä ihanej lhaiwoyneje chik hiw'en n'amhohen lham t'isan yämlek y'atuj?
53Mat Jesús tahuyej lhamel wet yok:
–Matche, matche tä ofwel amhohen, Chik amel katufwaya Hin'o Lhäs t'isan wet kayäyayej lew'oyis, haw'atshancheyaj ihit'ala amejen. 54Mat elh chik tuj ot'isan wet iyäyej ow'oyis, häp tä ikatej lew'atshancheyaj tä t'un, wet onuhthiphäla tä tälho lep'itsek häp ifwala tä lepese. 55Tsi ot'isan häpe t'at n'olhäk tä matche, wet ow'oyis häpe t'at n'olhät tä matche. 56Wet elh chik tuj ot'isan wet iyäyej ow'oyis, lham in'oyej wet olham oihi t'at häp lham. 57Häp Ojcha tä lechenekn'o lew'atshancheyaj ihi, wet häp tä olham oisej tä ow'atshancheyaj ihi. Wet häp tä mälhyej'attso, elh chik häpe chik yen lhäkan'o, isila n'oyej wet lew'atshancheyaj ihi. 58Oyäme t'at häp pan tä tälh puleye. Häp panna tek häte iwoye maná p'ante achätilis tuj, tsi tej tä tuj täjtso, mat y'inhen t'at. Mat elh chik tuj häp pan tä tälh puleye y'inhit'ala yämlek tiyäj'attsiy.
59Häp tä mälhyej p'antetso Jesús lhämet tä iwoye tä ichufwenhen wichi tä ihi p'ante Judío lhayis kan'ohusew'et tä ihi Capernaum.
N'olhämtes tä häpe n'ow'atshancheyaj tä t'un
60Häp wichi tä Jesús lechufwenkay, tä iläte lechufwenyajtso, wet wujpe lhamel tä yok:
–Wuj tä atha lhämtestso. ¿Atsihilak ikalhi yämlek tach'ahuye?
61Matkat Jesús nitäfwelej m'ak tä lhamel yämejwethä lhamhomche, wet yok:
–¿Hä lelätay olhämettso? 62Wet chik mälhyejtso, ¿chihla mälhyej chik lew'enche Hin'o Lhäs chik yäple pule tä pajche lew'et? 63Lhek tetshan, häpe t'at Espíritu tä Dios T'amajchet tä iwo n'ow'atshancheyaja. Häpkhit'a t'isan chik elh isej. Wet olhämtes tä ofwel amhohen häp tä ichäj amehen Espíritu tä iwo haw'atshancheyaja. 64Mat iche iyhäj amel tä nichayaye.
Jesús iwoyetso, tsi tälhe tä nech'e iwo tesa lechumet, nitäfwelej t'at häp lhamel tä nichayaye, lhäy'e elh tä yachajila. 65Wet äp yok:
–Häp tä tamenej tä ofwel amhohen tä oyok, Ihit'a katsik ihanej lhaiwoyneje chik iho n'oye, tajlhamat chik Ojcha iwo len'äyija.
66Tälhe täjtso wujpe lechufwenkay ileche wet nemhit iyej. 67Wet Jesús tay'ätshane lechufwenkay tä ihi doce wet yok:
–¿Chiwoye amel? ¿Häte let'uyayhläk lhekhen?
68Mat Simón Pedro nichulho wet yok:
–Iwuk, ¿atsi elh chik olhamel ohoye? Tsi ämtes häpe n'ow'atshancheyaj tä t'un. 69Olhamel pajche ochaye, wet äp ohanej tä ahäpe t'at Dios T'amajchet.#Mat 16.16
70Jesús yok:
–Olham tä ottshupi amehen häp amel tä lheyayhi doce. Matkat elh amel tä ahät t'at.
71Tä iwoynejetso lhämet, yäme t'at häp Judas tä Simón Iscariote lhäs. Tsi Judas tej tä häpe t'at lhamel tä doce elh, mat häpkhila elh tä yachaj häp Jesús.
Currently Selected:
Juan 6: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.