Isa 66
66
Lhawuk itiyej letes wichi tä iwoye len'okhayaj tä ni'isa
1Lhawuk lhämet yok:
“Pule häpe oniyatyaj,
wet honhat häpe opach'olw'et.
¿Atsi hup tä lefwetaj lhenlhi n'oho?
¿Atsi lew'et chik olhay'up'athi?
2¡Olham t'at tä olhenhay
nilhokej m'ayhaytso wet ichehen t'at!#Ap.Lh 7.48-50
Olham tä Awuk Dios olhämet t'at täjtso.
“Häp hin'o tä olham otetshan
häpe hin'o tä p'elitsaj wet tek lhaichäjlhi,
wet yenhit'a w'et m'ayeka olhämet.
3Ichehen wichi tä ilän w'asetaj
tä yen n'okhayaja n'oyej,
mat äp ilän hin'o.
Ichehen lhamel tä ilän tson'ataj lhäs
tä yen n'okhayaja n'oyej,
mat äp inäk'äs asinäj w'o.
Ichehen iyhäj tä yen otw'ayhata yachuyaj lhay,
mat äp ichäj n'oye kutsi w'oyis.
Ichehen lhamel tä iwunho incienso tä iwujyen n'oyej,
mat äp n'okwiyej dios tä takwey lhenek.
Wet tä lhamel lhaitshupyeneje
m'ayhay tä hich'atej tä ni'isahentso,
wet lhäy'e lhip tä ihumin tä iwoye,
4tä mälhyejtso,
olham otshupyenhiyejela
leteläythayaj häp lhamel,
ochätyenhiyela m'ak tä
lhamel fwetaj wuj tä nowayhlä.
Tsi tä ot'äne lhamel,
niwohit elh chik nichulh n'oho,
wet tä otahuyejen lhamel,
niwohit elh chik tach'ahu n'oye.
Lhamel iwoye t'at m'ak tä oy'ulhan,
wet tatshupiye m'ak tä n'am akäjejlhi.”
N'okalelhthayaj lhäy'e n'ofwayhyaj
5Ch'ahuyaye Lhawuk lhämet,
häp amel tä lewoyaye.
Yok, “Häp iyhäj haw'etfwas
n'äyi amhomche wet ailäkwethä,
häp tä amel lhenn'o Awuka.
Wet yok, ¡Is chik Dios hin'älit lewujyaj!
¡Ot'uhläk ow'en amel tä a'käswethä!
“Mat lhamenlak len'äfwlhi ihi.
6¡Lhek ch'ahuyaye n'opak tä tume hupuy!
¡Tume t'at Ow'et tä Ot'amajchet!
¡Häpe t'at olham tä owoyeje
m'ak tä t'uhawetej otayhfwas!
7“Jerusalén hätehlat iwoye
atsinha tä lhakniläta,
mat iseltej tä iwo lhäsa.
8¿Atsi tä ihanch'oye m'ak chik mälhyejtso,
wok hiw'en m'ak chik tetso?
¿Hä wichi tä ihi honhat
nichätchä ifwala tefwajni?
¿Hä yofwajkwet iche wujpey wichi?
Matkat tä Jerusalén iwo tesa tä lhailät,
yofwajkwet iwo lelesa, pajit'a.
9¿Chiwoyek on'äyejo elh tä nech'e iche,
tä olham t'at tä one'tek iwo lhäsa?
Olham tä Awuk Dios olhämet t'at täjtso.
10“¡Woyay akäjyajayej Jerusalén,
nilhokej amel tä lehumin!
¡Akäsyenejwethä,
nilhokej amel tä pajche let'äyenay!
11Lham hätet iwoyek ako t'at,
ikhajyenla amel yämthilek wuj tä aisej.
12Tsi olham tä Awuk Dios oyok,
Op'ohiyeja'pe letamsek tä wuj Jerusalén,
wet n'okäywet tä tälhe honhates
hätehlat iwoye tewok tä t'ulhpe honhat chik näme.
Jerusalén mälhhiyejat iwoye ako tä aichihelthen,
wet tach'awlawethä amejen tä aichäj,
wet lhehla'pe lakamchetey wet atchaslhi t'at.
13Olham oaikhajyenhihena tä lheyayhi Jerusalén,
hätehlat iwoye atsinha tä ikhajyen lhäs.”
14Wet chik amel lew'en täjtso,
ahusey lakäjyaj ihihila
wet asan hätehlat iwoyek nech'ayek,
mälhhiyejat iwoye hal'ä tälhes.
Lhawuk itäfwnhathiyeja lakawos
häp lham lakhajyhayaj,
mat itihiyeja lewäk häp letayhfwas.
15Tsi Lhawuk ihihila itäj chik näm,
wet laka kaletas tä laka'tshayajchal
hätehlat iwoye yafwthitas,
wet iwohiyela lewäk tä y'uho
wet itasnhiyeja wichi.
16Matche, Lhawuk iwohiyela
lakalelhthayaj tä häpe itäj,
wet iwohla laka'tshayajayej honhat,
wet ilänhiyejena lefwajnhat häp wichi,
wet wujla'pe lhamel tä y'inhen.
17Lhawuk lhämet yok:
“Lewit'äyhyaj ihihila wichi
tä lhailejen wet lhayen t'amajchetesayej
len'okhayaj tä ni'isa tä ihiche n'olafwey,
wet iwoye t'at m'ak tä iyhäj iwoye,
wet tufw kutsi t'isan lhäy'e ama,
wok elh chik häpe itshäwet tä kok'aye.
Otäyhthila lhamel wet nofwiyeja,
18tsi olham ontäfwelej m'ak tä iwoye
lhäy'e m'ak tä yen tichunhayaja.
“Wet onämla, ohutlawek
nilhokej wichi tä ihiche honhates,
nämhihena wet hiw'enla owujyaj.
19Ow'enhihola otetnek
wet otch'anlhahiyelak yikhen iyhäj,
ochenhiyela honhates tä Tarsis, Libia,
lhäy'e Lidia, häp honhat tä wichi
ihanej tä tiyäjej n'och'ähal iyhäj,
lhäy'e Tubal, lhäy'e Grecia,
lhäy'e honhates tä atosehen,
häp wichi tä nhanayej chik iläte
hin'o chik yen lhämetan'o
wet ihanhiyejt'a chik hiw'en owujyaj.
Wet wichi tä okachenhaytso
häpkhilek yen silätyajayej honhates häp owujyaj.
20Ichäjla alhoho nilhokej apuhfwas
tä ihiche honhates wet yenla otw'ayhata.
Ihänhiyela oka chenaj
tä ot'amajchet tä ihi Jerusalén,
ihichela'pe yel'atas, lhäy'e mola lhayis,
lhäy'e camellos,
wet iyhäj ihihila kaletas,
wet iyhäj tilhäjla iyhäj.
Matche, õ'chäjla n'oye lhamel,
hätehlat iwoye otw'ayhtes
tä Israel lhayis ichäje Ow'et
tä ihi lehis tä nikok'ayaye.
21Wet iyhäj lhamel oyenla häpeya
sacerdotes lhäy'e Leví lhayis.
Owoyetso olham tä ohäpe Awuk Dios.”
22Wet Lhawuk äp yok:
“Mälhyej pule lhäy'e honhat
tä onech'aynhihichela nemla tatäyhen,#Isa 65.17; 2~Ped 3.13; Apoc 21.1
häp tä mälhhiyejattso,
ales lhäy'e ey nofwit'ala.
23Wet iwel'apej häp ifwala tä iwel'a nech'ayek,
lhäy'e semanapej, häp ifwala tä n'ot'elakw'et,
nilhokej wichi ihohla n'oye
wet takhosche katsi tä ihi tä ottache.
Olham tä Awuk Dios olhämet t'at täjtso.
24“Wet chik lhamel yikch'oye hupuy,
hiw'enla lep'itseyhay häp lhamel tä tatay n'ohlä.
Wet iwos tä tufw lhamel y'inhihent'ala,
wet itäj tä hip'ohen y'omhit'ala.#Mar 9.47-48
Lhamel häpkhila m'ak tä hich'atej tä ni'isa,
wet nilhokej wichi ikokyene.”
Currently Selected:
Isa 66: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.