2~Ped 2
2
N'ochufwenyajwos tä kamatachehen
(Judas 4-13)
1Mat häte iche p'ante profetas tä kamatachehen tä iyej p'ante Israel lhayis. Wet häp tä mälhyej'attso, ihichela n'ochufwenyajwos tä kamatachehen chik ihla amejen. Lhamel ichäjla amehen lechufwenyajay tä fwetaj is t'at, mat isit'a alhoho, ikänchi amel. Wet äp lhaifwonlahlä häp Lhawuk tä pajche lhayen lahaya lhamel. Oyok, lhamel ikelthila letapehen letäyhyaj.
2Wet wujla'pe wichi tä ihän lhamel lemukwehyajay, wet tamenhiyeja chik iyhäj isitäyen Dios lhämtes tä häpe m'ak tä matche, wet yohlak, “Isit'a.” 3Wet tä alhaknhatses n'ochufwenyajwostso, isiyeja lhämtes tä t'akanyaj wet iwohla kotsayej m'ak tä alewuhuy. Mat pajchey tä n'okalelhthayaj yen tesayej lhamel, wet letäyhyaj tä nimäya nichätla'pe.
4Lhek yahinya, Dios tek itäyhat letes häp ángeles p'ante iwoye m'ak tä ni'isa, mat ithate ahättaj lew'et, wet ihi honataj, yäytej chinhas wet iniwhatejlä Fwala tä N'okalelhthayaj. 5Häte Dios tek itäyhat letes häp wichi tä pajche, mat ichätyenpe pelhay tä wuj häp lhamel tä ni'isahen. Ts'ilak Noé tä ifwayhat, häp hin'o tä yen silätyaja m'ak tä is alhoho, lhäy'e siete lew'et lheley.#Gén 6—7; 8.18 6Häte Dios itiyej p'ante letes hupuy tä Sodoma lhäy'e Gomorra wet itäyhat t'at. Iwunhomche yäk imälhehit mok'otaj, häpkhilek wichi tä iwoye m'ak tä ni'isa tä imälheche len'äyij, lhäy'e fwalasna, häte lhamel hiw'ene m'ak tä häpkhila lhamel lakapes. 7Mat häte ifwayhtej Lot lewit'äyhyaj, häp lham tä häpe hin'o tä is alhoho lhäy'e tä wuj tä yen lhakliya wichitso tä iwoye lakeyes tä hich'atej tä ni'isa.#Gén 19.1-29 8Tsi hin'o tä isna iyej t'at lhamel, wet fwalapej fwalapej hiw'en wet iläte m'ayhay tä ni'isahen tä lhamel iwoye, wet wuj tä ilän letichunhayaj.
9Tä mälhyejtso, y'aw'en tä Lhawuk ihanej tä ifwayhtej leles häp m'ayhay tä ithahyenpej len'äyij, mat wichi tä ni'isahen, t'amajejlä letasnhayaj chik näm Fwala tä N'okalelhthayaj. 10Wet häp lhamel tä iwoye lenech'ethayajay tä kok'aye wet yen w'et m'ayeka Lhawuk Niyatyaj, häp tä lhäy'ehila lhip n'otasnhayaj chik ikatej. Lhamel tektshanwethä wet lhaichäjwethä, wet nowayhiyet'a tä iläkwethä n'okhajyhayajay tä ikaphä. 11Mat ángeles, tej tä lhamel lakhajyhayaj lhäy'e lewujyaj inu'pe n'ochufwenyajwos tä kamatachehentso, tek iläkwethä n'okhajyhayajaytso, tek iwomejphä lhämet chik ni'isache tä ihi tä Lhawuk itayche.
12Mat häp hin'oltso iwoyejepej lhämtes tä ni'isachehen häp m'ayhay tä nitäfwelayej, tsi lehusey ihihit'a, hätet iwoye itshätäy tä iche tayhi. Wet häp tä mälhhiyejattso, letäyhyaj ichowalhiyela wet ilänhen, hätehlat iwoye itshätäy tä õ'länhen, 13wet iyhäj leteläythayaj tä lhamel iwoyeje, tapinla'pe lhamel. Tsi tej tä ifwalayej, mat iwoye m'ak tä lhamel t'akänyajay tä ni'isachehen. Wet hin'äfwlhat amel tä tachufwi amejen, häpehen lech'ohle tä kok'aye tä iwo lakäjyajayej t'akanyajay.
14Lakain'oyaj i'pe tatey, wet y'enhiyejt'a tä iwoye lesukyajay, wet ikanejen iyhäj tä lechayaj niwuja wet itonho m'ak tä ni'isa. Lehusey alhaknhatses wet ihanej iwoyneje yämlek ihut lhamej m'ak tä kalewuhuya. ¡Oyok, lewit'äy ihihila!
15Wetahen t'at, tsi ileyej n'äyij tä is alhoho. Ihän t'at häp Beor lhäs Balaam len'äyij p'ante, tä lham ihumin chik ikatej laha tä tälhe lechumyaj tä ni'isa. 16Mat õ'fwoneje lesukyaj, tä asno tä nitahuya nech'e tahuy, wet häp tä ileyej m'ak tä ni'isa tä iwoye.#Núm 22.1-35
17Häp n'ochufwenyajwostso hätet iwoye inätw'etes tä inät newahiche, tamchäy t'at, wok pules tä yafwthitaj ichäj. Mat Dios t'amajejo lew'et tä ihi honataj lechowej. 18Lhaichäjwethä wet wuj lhämtes tä iwoye, mat m'ak tälhiyet'a. Ikanejen iyhäj yämlek iwoye t'isanis lenech'ethayajay tä ni'isachehen, wet häp tä itonho m'ak tä ni'isa lhamel tä nipajache tä iwo lehusey iyhäja tä lhaistaktej honhat lakeyes. 19Tsi n'ochufwenyajwostso ifwenho lhamel wet yok, “Kamaj t'akay ihi ahusey, mat is t'at, olhamel ohanej owoyneje chik olanche.” ¡Mathichet'a lhämetna, tsi lhamel t'at tä t'akay ihi, häpehen lakeyes lhäytshay, lehusey najuthiche! Tsi m'ak at chik häpe chik ikalhi hin'o, yäyit t'at.#Juan 8.34; Rom 6.6,16
20Chik hin'o nitäfwelej Lhawuk Lhafwayhthi Jesucristo, wet häp tä tafwayej n'okeyes tä kok'aye tä ihonhatena. Mat chik lhayachaje lakokhayajtso wet nahahi, nemla koyhyaj lewit'äy, inuhla'pe tä ichun. 21Chik lhamel nhanhiyej Dios len'äyij tä is alhoho, häpkhin'ek isej. Mat tä lhamel pajche ihanej ihi len'äyijtso, mat ileyej Dios lhämet tä t'amajchet tä õyachaje lhamel, häp tä lewit'äyhyaj. 22Hin'älit tä matche t'at n'olhämtes tä yok, “Asinäj yachaj lhamho lech'uyhat”,#Prov 26.11 wet “Kutsi tä ileyej tä inay, yachajo tä nich'olehi iyhät.”
Currently Selected:
2~Ped 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.