Daniel 1
1
Babilonia mai ano Israelifo icafo ini
1Ascan taui Joacim fari rafu non fusti Judáfoan aton niaifo ini. Ascan nantian Babiloniafo aton niaifo ahuun anu Nabucodonosor. Ahuun ranushumuafo fu Jerusalén ano noconi Judá ato finoantian aton oinmati iishquin. 2Ascan nocon Ifo Diosin yononi cuscan Nabucodonosor niaifo. Judá finoanno aton niaifo Joacim achinifo. Jerusalén anoshon Babilonia mai ano iyonifo. Nantianri Diospan tsainti pushu murannoa ahuara sharafo fuchishon nanfori Nabucodonosor Jerusalén anoshon Babilonia ano fonifo. Nannoshon Babiloniafoan ahuara rami huashon, “Noco diosiran,” ishon yoinifo. Ascashon pushu muran tsaonnifo. Nan muranri ahuara sharafo huanifo.
3-4Ascan Nabucodonosor niaifoan ahuun oinmati nan niaifo patasharinoaton ahuun anu Aspenaz yononi Israeli niaifofoan aton pushcofo mutsisipa sharafo non fuso sharayafoan ahuara futsa futsatapafo tapisharafain futsan yoiai cuscan samamashta tapicointiro. Nanscarafo ato catonon Israeli mai anoshon ahuun pushu ano ato ihuunon. Nabucodonosor niaifo pushu muran nantifi ahuun yonomisifo Aspenaz aton niaifo. Ascan Aspenaz Israeli pushcofo tapimani. Babilonia tsain non aton yorafoan cunua cuscan Israeli pushcofo tapimashquin. 5Ascan Nabucodonosor niaifo yononi ahuun tushucoin non ahuun ayati nan fimi uva unu ato ayamanon. Fari rafunon fusti Aspenaz ato shafatifi yosifafainni. Ascan yosiqui anaititan Nabucodonosor niaifo ahuun oinmatifo iishcaquin.
Daniel yafi a fu rafuafo futsafoan Nabucodonosor niaifo pushu muran iquimanifo
6Ascan Judá mai anoshon pushcofo Babilonia ano ihuunifo. Pushcofoan aton anu Daniel non Ananías non Misael non Azarías Judá mai anoshon Babilonia anoafoan ato iyonifo. 7Ascashon niaifo Aspenaz ato anu futsa Babilonia tsainman tuqui huani. Daniel anu futsaqui Beltsasar huani. Ananías anu futsaqui Sadrac huani. Misael anu futsaqui Mesac huani. Azarías anu futsaqui Abed-nego huani. 8Ascano Daniel shinanni isca huaquin, —Uncai niaifo ahuun tushu piyamafain ahuun ayati un ayaima. Un ascaran piatofin ua chaca huatiroquin, —ishon ahuun nomuran shinanni. Ascaiton Daniel Aspenaz niaifo yocani isca huaquin, —Niaifon Aspenaz, un mia yocapai. Un niaifo Nabucodonosor ahuun tushu un pipaima. Tau huaquin afin rami hua, “Uhuun diosiran,” ishon tushu inan. Nanscaran tushu un picun ua chaca huamatiro. ¿Ascacun un futsa cuscaran pitiromun? —ishon Daniel niaifo Aspenaz yocani. 9Ascan nocon Ifo Diosin yonoa cuscan Aspenaz niaifo Danielhuunoa shinansharai ahuun ramapaini. 10Ascaiton cumani isca huaquin,
—Unfin niaifo Nabucodonosorqui musuicain. Nantomain ua yonocun min non pushco futsafoanri ahuun tushu pifain ahuun ayati man ayanon. Ascan min ahuun tushu piyamatan ahuun ayati ayashuma mincain atirifi pushcofo cuscara iquima. Minfin iramanashtacoin iishquicain. Ascan mia niaifoan mia iramana oinquin minhuunshon ua tushtushquicaniran, —ishon yoini.
11Daniel nannori nicain yora cushumisi futsa ano cani. Nan cushumisi niaifoan yonoa cuscan Daniel non Ananías non Misael non Azarías aton tushu inanfafainon. Ascaiton Daniel yoini,
12—Mucu rafuti oshatan noco fanafo fusti pimatan noco unu fusti ayamahuu tapishquin nonmain iramanayamarain non shoasharaiquin. 13Ascan mucu rafuti osha anaitiano min ointiro ratomain mutsisipa sharaquin. Un non uhuun caifo futsafo iyamarai nan niaifoan ahuun tushu pimisifomain mutsisipaqui. Ascan min yoitiro nonmain nocon tushu pitiro iyamarai non afanan nocon tushu pitiromaquin, —ishon Daniel yoini.
14Nannori nicatan nan cushumisiton Daniel yoini, —Shara. Mian yocai cuscan man atiro. Osha mucu rafuti piifain man unu fusti ayatiroran, —ishon yoini. 15Ascan nan mucu rafuti osha finoanno Daniel futan a fu rafuafo rafu non fusti pushco fasi sharacoin ini. Nan Daniel futan piafo fasi mutsisipacoinfo. Ascan nan niaifoan ahuun tushu piafocai nan Daniel futan piafo cuscarafoma tsoacai mutsisipama. 16Ascaiton oinquin niaifoan ahuun tushu cushumisiton Daniel fu rafuafo ato pimatama. Nan fanafo fusti ato pimani. Nan niaifoan ahuun ayati nan fimi uva unuri ayamatama unu fusti ato ayamani.
17Ascan nan pushco rafu non rafuriton nocon Ifo Diosihuunshon Babilonia ahuun tsain fasi tapisharanifo. Cunufo yafi ahuara futsafohuunoari tapisharanifo. Daniel arifi nan Dioshuunoa ahuara futsafo nama cuscan tapini. Ahuara futsa cuscarafori nan nama cuscan fasi tapisharacoinni.
18Asca niaifo patasharinoa Aspenaz fari rafu non fusti Daniel fu rafuafo ato tapimani. Fari rafu non fusti ato yosiquin anaititan nan niaifo nantifi finoncoian ahuun anu Nabucodonosor ano ato iyoni. 19Ascan nan niaifo Nabucodonosor ahuarafo ato fu tsainpacuni. Ascan nan niaifoan ato fu tsainquin tapini rato pushco futsacai Daniel futan Ananías non Misael non Azarías afoan tapiafo cuscacai tsoan futsan tapinima. Ascan nan rafu non rafuriton nan niaifo Nabucodonosor yonoshonifo. 20Nan niaifoan ahuara ichapa futsa futsatapafo ato yocaiton nan rafu non rafuriton fasi cayacafi shara cumanifo. Nanfoan cumasharai cuscacai tsoa futsan ahuun mai anoshon ascara cumaquin shara huatiroma. Nan Daniel non nan rafu non fusti pushcopan tapiafo cuscan tsoan futsacai tapinima. Ascan nan shointiafoanricai inonpacoai cuscan yoimisifori tapinifoma. 21Ascan nan Nabucodonosor niaifo ahuun unutani icaino nocofunun Ciro fari fusti niaifo ini. Ascan Danielfin nan niaifo rafutan aton pushu ano ato yonoshoniquin.
Currently Selected:
Daniel 1: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.