Daniel 2
2
Niaifo Nabucodonosor namani cuscan
1Ascan Nabucodonosor Babilonia mai ano fari rafu niaifo ini. Yamu futsa namashon fasi shinanpaini. Nan nama cuscan shinain oshanima. 2Ascan nan tsoa futsan atiroma cuscan huamisifo cunatan shointiafo cunafain inonpacoai cuscan yoimisifori cunafain fishifo oincaquin ahuarafo chipo iishquiai cuscan yoimisifo nanfo niaifo Nabucodonosor ato cunani. Ascatari ato cunani ahuunoari ato yocashquin ahuamain namaquin. Nanfo nanno ahuun ointaifin niafo ini. 3Ascashon ato yoini isca huaquin, —Uhuun namapan ua yoipaiyai cuscacai un tapiama. Uhuun nomuranshon ua fasi fucash huai. Uhuun namahuunoa ua tapimacahuun, —ishon ato yoini.
4Ascan fishifo oianfo ahuara chipo iishquiai cusca yoimisifoan yoini isca huaquin, —Niaifon, min nipapainon. Min nama cuscan noco yoihuu min namapa mia yoipaiyai cuscan non mia tapimanon, —ishon yoinifo.
5Nicaquin niaifo Nabucodonosor ato yoini isca huaquin, —Un mato icon yoi. Un nama cuscan huafain ua yoipaiyai cuscan man ua tapimayamaiton un mato ato rutumashquin mato nopun shatumishti mishti huanonfo. Maton pushufo paon icano nanno mispofo manishquin. 6Ascan un namai cuscan huafain ua cayacaficoin tapimacahuun. Uhuun namapan ua tapimapaiyai cuscan man ua tapimanaiton un mato ahuara ichapa cashman inanfain matohuunoari futsafo un yoiquin shara huashquin. Ascan un namai cuscan ua yoicahuun, —ishon ato yoini.
7Ascaiton cumanifo, —Niaifon, min nama cuscan noco tapimahuu. Ascan non nicaquin min namapan min noco yoiaiton non mia tapimatiroran, —ishon yoinifo.
8Ascaiton niaifoan ato cumani, —¡Ma! Manfin ua fomanpaicain. Man man tapia un nama cuscan man ua yoiyamaiton un mato yoia cuscan un mato huaashquin. Man shinain cuscan mun tapian. Uhuun namahuunoa man ua funa cumatiroma. Ascan man ua manamapai un mato rutumanonma. 9Ascan man ua yoiyamaino manfin nantifi nai futsushquiquin. Ascashon man uhuunoa shinain unmain chipo shinan futsatiroquin mato ato rutumashquima. Ascan manfin ua paranpaicain. Un nama cuscan ua tapimacahuun. Man ua yoiaiton un tapitiro uhuun namapan ua tapimapaiyai cuscan nannori man ua tapimatiroran, —ishon niaifo Nabucodonosor ato yoiaiton.
10Nanscaiton nicacaquin nan fishifo oinquin ahuara chipo iishquiai cuscan tapimisifoan cumanifo isca huaquin, —Niaifon, tsoashtacai min nama cuscan mia tapimatiroma. Ascatari niaifo futsafo fasi curushcoinfiashocai min noco yononi cuscan futsafo yonomisima. Aton yorafoan tsoa futsan atiroma cuscan huamisifo yocayamafain aton shointiafo yocayamafain aton yorafoan fishifo oiainfo ahuara chipo iishquiai cuscan yoimisifo rato niaifoancai anori tsoan yocamisima. 11Niaifon, min noco yocain cuscacai rato yora futsan mia tapimatiroma. Nan diosiforan huafo fustiton mia tapimatiro. Ascafia afocai yorafo muran icafomaran, —ishon yoiaifoan.
12Nicain niaifo fasi sinacoinquin yononi isca huaquin, —Tsoa futsan atiroma cuscan huamisifo non shointiafo non inonpacoai yoimisifo non fishifo oincashon ahuara chipo iishquiai cuscan yoimisifori nantifi ato rutucahuun, —ishon niaifoan ahuun oinmatifo yononi. 13Ascan niaifoan yononi cuscan nocofunufo nichini nantifi tapicoianfo ichanan huani ato rutushcaquin. Ascano Daniel yafi a fu rafuafo funanifo atori rutushcaquin.
Niaifo Nabucodonosor nama cuscan Daniel a tapimani
14Ascan niaifoan Nabucodonosor ahuun ranushumuafo aton niaifo ahuun anu Arioc nichini nantifi Babilonia anoafo nan tapimisifo rutunonfo. Ascano Daniel aqui cashon tsain cayacafi shara yoini isca huaquin, 15—¿Niaifon Arioc, ahuuscai niaifo Nabucodonosor fasi curushcain yonoamun nantifi tapicoianfo rutunonfo? —ishon yocaiton. Arioc shafacaficoin tapimani.
16Nannori yoiaiton nicain Daniel niaifo Nabucodonosor ano cashon yoini isca huaquin, —Niaifon, ua ichapama manayopun min nama cuscan un mia tapimanon, —ishon yoini. 17Ascaino Daniel ahuun pushu ano nasoni afu rafuafo Ananías non Misael non Azarías non afo tapimashquin. 18Ato yoiquin isca huani, —Nocon Ifo Diosi nai muran ica cufincahuun nocohuun ramapainon niaifoan nama cuscan Upa Diosin noco tapimashquin noncai Babilonia anoa tapicoianfo fu naimaran, —ishon Daniel afu rafuafo yoini. 19Ascan cufiainfoan nan yamu niaifoan namaita cuscan nocon Ifo Diosin nan namahuunoa Daniel tapimani. Asca Daniel fasi unimacoinnaiton nocon Ifo Diosi nai muranshon yoisharani isca huaquin,
20—Aicho, nocon Ifo Diosin, minhuunoa yoiquin shara huapacupainonfo.
Mirus fustifin min nantifi tapicoinfain
min curushhuunshon ahuamamishti min huatiro.
21Nan mai ano iishqui ai cuscan min fiananan huai.
Faritifi faritian itiro.
Oipacutian oipacutiro.
Matsitianri matsitiro.
Nanscarifi ai min niaifo fiananan huatiro futsa arifi niaifo inon.
Minhuunoashu futsafori niaifo iqui.
Ascatari min futsafo potatiro afanan niaifo inonma.
Nan yora shinansharaifo min ato tapima sharafain
ahuarafohuunoa tapisharamisifo min ato paratama tapimani.
22Tsoan ahuarafohuunoa nicayomisima min ato tapimatiro.
Ahuara shafacafima tapiafoma cuscan min tapian.
Min icanocai ahuara faquishma.
Nantifi shafacafi sharacoin.
Minfin nantifi tapisharacoianquin.
23Nocon Ifo Diosin minfin uhuun shunifoan aton Diosiquin.
Un mia aicho huai.
Minfin sharacoin fustiquin.
Min ua tapimasharatan min curush ua inan.
Non yocan cuscan min ua tapimana.
Niaifoan nama cuscan mian tapimanaran,
—ishon Daniel nocon Ifo Diosi cufini.
24Cufintan nan Daniel niaifo Arioc ano cani. Nanton niaifo Nabucodonosor Arioc yononi nantifi Babilonia mai anoafo tapicoianfo rutunonfo. Ascan Daniel yoini isca huaquin, —Niaifo Arioc, Babilonia anoa tapiafo ato rutuyamahuu. Ua niaifo Nabucodonosor ano iyoicahuu. Un natian nama cuscahuunoa un yoinon, —ishon Daniel yoiaiton.
25Nicaquin Arioc niaifo ano Daniel iyoquin yoini isca huaquin, —Niaifon, mun nocofunun fuchia Judá mai anoa non ihuuniton min nama cuscan mia tapimatiroran, —ishon yoini. 26Nicaquin niaifoan Daniel (nan ahuun anu futsa Beltsasar) yoini, —¿Iconmun un nama cuscan mian yoitiromun? ¿Nan un nama cusca huafain mian tapimatiromun? —ishon yocaiton.
27—Niaifon, rato tapisharatocai mia yoitiroma. Tsoamain shohuintiaquin ahuunoacai tsoan mia tapimatiroma. Tsoa futsan atiroma cusca huamisifo mia tapimatiroma. Nan inonpacoai cuscan yoimisifohuunoari mia tapimatiroma. 28Ascafia Diosin nai muran icaton yorafoan ahua tapiama cuscan ato tapimatiro. Niaifon Nabucodonosor, nan Diosin mia isma ahuara ishqui ai cuscan. Min nama min oian cuscan natian un mia tapimai. 29Min namapan oian cuscan chipo iishquin. Ascacun nocon Ifo Diosin ahuarafo tapiafoma cuscan ato tapimatiro. Natian ahuara chipo iishqui ai cuscan mia tapimashquin. 30Niaifon, min nama cusca huafain un tapicoianma. Uhuunoacai mia tapimaima. Diosifin mia tapimapaiyai cuscan ua tapimanaquin min nomuran min shinain cuscan un mia tapimanon.
31Uhuun niaifon, min namaquin oian yora ointsa faca facaitsa fasi uhuapacoin cuyamasoa mutsisipacoin min oian. Nan yora oin ratucointirofo. 32Ahuun mapo oro sharashtacoin icaino ahuun shochiqui yafi ahuun poyan rafuqui cuno ahuun anu plata icaino ahuun shaqui yafi ahuun quishi rafuqui cuno ahuun anu bronce icaino 33Ahuun fitash rafuqui cuno hierro icaino ahuun tau rafuquiri hierro yafi mai mapo osia. 34Ascan min oian machi anoashu toquirininhuan tsucua. Tsoa nocofunun acama. Ascan nan toquiri tau rafu hierro yafi mai mapo osia pacui moshi futsua. 35Ascan nan yora ointsa uhuapacoin pacuashu mania hierro non mai mapo osia non cuno bronce non cuno plata non orori moshi futsua. Nan ahuara shacafo fuutan noyantiro. Nanscarifi ai nan yora ointsa fuuhuanun yamarisca huatana. Ascashu toquirininhuan yora ointsaqui pacutanaino fianananriscatana. Ascatan machi uhuapacoin iriscatani. Ascatan nan machiri manifoti pacuqui man ato fupoa.
36Niaifon, nanscarafin min namaquin huaaquin. Natian min nama cuscan un mia yoi min tapinon. 37Niaifon, minfin futsafoan ato niaifocoinquin. Diosin nai muran icaton mia yonoa min ato iquinon. Mia ashoa cuscan min mutsisipacoinquin. Diosin mia yonoa cuscan tsoan mia finontiroma. Nantififain Diosihuunoa yoishquicani min niaifo sharacoin. 38Nan Diosin mia yonoa cuscan min nan manifoannafo nantifi min ato iquinshquin. Yoinafo non puiyafo non manifotiton aton niaifo min iishquin. Nan nocofunu min oianfin mapoqui oro cuscaraquin. Minfin nan mapoqui oro cuscaraquin.
39Niaifon, nan min niaifo unuaitian futsari niaifo icacai mia cuscaran mutsisipa iishquima. Nanrifi niaifo unuaino futsari niaifo iishquin. Nan nocofunu cuyamasoan min oianfin ahuun shaqui broncequin. Nan broncehuunoa Upa Diosin mia niaifo futsahuunoa tapimapai. Nanfin manifotiton aton niaifo iquiquin. 40Nanrifi niaifo unutanaino mai futsa icafo fasi mutsispacoinfo iishquicani. Hierro cuscara curushcoin. Nanscarifi ai nanfori fasi curushcoin iishquicani. Hierro curushcoinfiacun ahuarafoan tsacacaquin tucumishtishquin. Nanscarifi aquin na yora futsafoan icafo futsa chaca huaquin futsashcani. Ascashon nanfoansi ato manifoti iquishcani.
41Niaifon min namapan min oian cuscan na nocofunu cuyamasoa uhuapacoin ahuun tau hierro yafi mai mapo osia. Ascan nan ahuun tauhuunoa non tapitiro na caifo futsafo pashcanan huaiton. 42Atirifi hierro cuscaran mutsisipacoin iishquicani. Atirifi curush iyamaino pachimishti iishquicani mai mapo cuscaran. 43Ascan hierro yafi mai mapocai ositiroma. Nanscarifi ai mani futsafocai aforanan ositiroma. Atirifi curushyamaino atirifi curushcoin ositirofoma. Pashcanantirofo.
44Ascan nan niaifofo mani futsafo fu icaitian Diosin nan nai muran icaton ahuun yorafo ichanan huai. Nanfin ato niaifo iishquin. Tsoancai Diosin yafi ahuun yorafo potayamafain cuyopacunacama. Diosin ahuun yorafo futan nantifi niaifo futsafo ato shatumashqui afanan tsoa nipanonfoma. Ascanfia Diosin yafi ahuun yorafocai unupacunacama. Diosifin nantifiton niaifo ipanacaquin. Nantofi manifoti iquinaquin. 45Nanfohuunoa nama cuscan min oian toquirininhuan nan machi anoashu tsucucai pacua nan nocofunu ointsa camaqui hierro non bronce non mai mapo non cuno ahuun anu plata non cuno oro nanfo pacuaino tucumishtimishtishquin. Niaifon, nan Diosin ahuamamishti huatiro. Nanton mia oinmana ahuara chipo iishqui ai cuscan. Min nama icon mia tapimanai cuscan min icoinra huatiroran, —ishon Daniel niaifo Nabucodonosor yoiaiton.
46Nicain niaifo Nabucodonosor Daniel naman maiqui fuopacucahuani, —Minfin fasi sharacoinquin, —ishon yoini. Ascan ahuun yorafo yononi ahuara sharafo aton diosfo inan cuscari inin sharacoinri Daniel inanshcani. 47Ascashon niaifo Nabucodonosor Daniel yoini isca huaquin,
—Icon, maton Diosin nantifi dios futsafo finoncoian. Nanfin nantifi niaifofoan aton Ifoquin. Uhuun namapan mian tapimana cuscan min yora ahuara tapiamafo Diosin ato tapimatiroran, —ishon Nabucodonosor yoini.
48Asca huatan niaifoan Daniel catonni ahuun yorafoan aton niaifocoin inon. Ahuara sharacapacoin Daniel cashman inanni. Niaifoan yoini isca huaquin, —Daniel, min Babilonia mai anoafo aton niaifo min iishquin. Nan tapisharafori min aton niaifo iishquinran, —ishon niaifo Nabucodonosor yoini.
49Ascan Daniel Nabucodonosor niaifo yocaquin isca huani, —¿Niaifon, u fu rafua Sadrac non Mesac non Abed-nego min yonotiromun nanfoan Babilonia anoafo aton niaifo patasharinoafo inonfo? —ishon yocaiton. —Ai. Min ua yocain cuscan un ato niaifo huairan, —ishon Nabucodonosor niaifoan cumani. Ascaino Daniel Nabucodonosor niaifo pushu muran nituni.
Currently Selected:
Daniel 2: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.