Salmos 2
2
—Min uhuun facuran, —ishon Upa Diosin ahuun facu yoini
1¿Ahuuscaimun manifoti Diosqui fasi sinacaniquin? Nanscarafofin ipaitsi ichanancaniquin Diosi chaca huapaishcaquin.
2Manifoannati aton niaifofo non niaifo patasharinoafori ichanancani nocon Ifo Diosi yafi Furun Cristo potapaicani.
3Ascashu yoinancaquin isca huacani, —¿Ahuuscashomun Ifo Diosi yafi nan catoan non potatiroquin? Ascan nocofin nan cadenanun munushumua cuscara huaaquin. Non aton cadena shatunon afanan non aton yonomati inonma noco afanan iquinonfoma, —icashu yoinannifo.
4Nanfoan nanscara shinanfiaifoan nan nocon Ifo Diosin nai murannoashu atoqui shuchia. Ascashon nocon Ifoan ato yoiquin isca huai, —¡Cuu! Tsoacai ua ahuusca huatiromaran, —ishon Ifo Diosin ato yoia.
5Ascaifoan nocon Ifo Diosin ato nicain samamashta atoqui sinaquin ato asca huaino fasi aqui ratucoincani.
6Ascacun Ifo Diosin yoia, —Un niaifocoin catonni Jerusalén ano nantifi ato iquinon. Unfin Jerusalén catoanquin nanno iishquin. Nan un Jerusalén machi ano icainofin fasi sharaquin.
7Ascacun nocon Ifo Diosin noco yonoa cuscan un mato yoi. Isca yoini, “Uhuun Ifon Diosin ua yoia isca huaquin, ‘Minfin uhuun facuquin. Na shafatarifin un min upaquin.
8Ascacun ua yocahuun nantifi manifoti un mia inaincai mina inon. Nantifi maitio nan yorafo chai iyacunafori mina iishquin.
9Minfin ato curushcain iiquishquicain. Ascan nan mai cuti non potaino samamashta moshi futsutiro. Nan cuti moshi futsuacai tsoashtan afanan ahuuscashon shara huatiroma. Nanscarifi aquin nan yoitimamisifo min ato onaintimanaitiancai tsoashta ato numatiromaran,’ ” —ishon Ifoan niaifo catonshon yoini.
10Ascan niaifofoan un yoiai cuscan nicasharacahuun. Amaquiri shinanantamarocon cayacafi shinancahuun. Maifoti niaifo patasharinoafoan Ifon Diosi mato musu huai cuscan shinancahuun.
11-12Nocon Ifo Diosi mato musu huaquin mato amapaiyai cuscan nicasharariscacahuun. Ascan ahuunoa man shinansharayamai man aqui ratui taritariqui. Diospan furumun mato yoiai cuscan acahuun matoqui sinanonma. Man yoitimaiton oinquin matoqui samamashta sinaquin. Man chacahuai cuscan man shaturiscayamaino man nai futsushquin.
Asca tsoa Diosi ari caino nanfin unimacain cushusharashquiquin.
Currently Selected:
Salmos 2: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.