Salmos 16
16
Nocon Ifo Diosi fu non rafupacuaino shara ipanaca
1Nocon Ifo Diosin, ua cushusharahuu. Un miqui oaqui ua mian cushusharanon un ahuara chaca finononma.
2Unfin uhuun Ifo yoia isca huaquin, —Minfin uhuun Ifoquin. Min ua shinansharamayamainocai ahuara shara un shinantiromaran, —ishon un nocon Ifo Diosi yoini.
3Nan mia icoinra huafoti nan mai anoafo un fasi ato fuchipaicoin. Un ato cuscaran ipai. Un atoqui unimai.
4Tsoa dioscoinma fu ipaiyai nanfin fasi omitsiscai finashquiquin. Nanfoan aton dioscoinma nan rami huafo yoina rutushonafo cuscan uncai ato futan ashquima. Nan dioscoinfomahuunoacai un yoisharashquima. Uncai ato anufo yoipacunacama.
5Ifon, un ashquiai cuscan min ua catonshona. Mian shara huashoa. Nantifi uhuuna min ua cushushomisi.
6Min ua amamisi cuscan fasi sharacoin. Min ua inain cuscan mian fasi unimamashquin.
7Uhuun Ifo Diosin ua tapimasharamisi. Nanscacun un mihuunoa yoi sharashquin. Yamuri uhuun nomuran min ua cayacafi tapimashquin.
8Mun tapian uhuun Ifo ufu ipanaca. Ufuri rafupacunaca. Uacai potapacunacama. Ua cushushara. Ascacucai tsoan ua ahuusca huatiroma ua ratupaiquin.
9-10Ascacufin uhuun nomuran un fasi unimacoin. Uhuun Ifoan ua cushuaino un fasi unimai. Uhuun Ifon, mincai namisifo muran min uhuun yoshin potaima. Nan yora sharacai min ahuun caya mai murannoa payocomaima. Ascan uhuun cayari min ua cushusharashomisi.
11Ahuuscashumain un mi fu nipasharatiroquin minfin mian tapimanaquin. Un miqui nocoaitian mian unimamacoinshquin. Mian oinmamisi un niyocun ahuuscashumain un mi fu ipasharatiroquin. Un mi fu rafuaino min uqui fasi unimashquin. Minhuunnoashu un fasi unimai mi fu isharapacunaca.
Currently Selected:
Salmos 16: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.