Apocalipsis 1
1
Ri Juan kutz'ib'aj taq ri xuk'ut ri ángel chwach
1E q'alajisanik wa' xuya ri Dios che ri Qanimajawal Jesucristo cha' Rire kuk'ut chike ri raj chakib' sa' taq ri katajin loq. Ruq'alajisaxik xu'an ri Jesús e xutaq lo ru ángel cha' kolu'b'i'ij wa' che ri raj chak Juan. 2Ek'u ri Juan xuq'alajisaj kan ri tzij re ri Dios, ri q'alajisanik re ri Qanimajawal Jesucristo ruk' taq ri xk'ut chwach rire. 3Nim uq'ij ralaxik ri kajilan wa ch'a'tem re wa q'alajisanik yey nim kiq'ij kalaxik konoje ri ketaw re wa' yey kakitaqej ronoje taq ri tz'ib'ital chupa, ma xa naqaj chi k'o wi lo ruq'ijol echiri' ku'ana taq wa'.
Ri Juan kuya pan rutzil kiwach ri wuqub' iglesias
4Ri'in in Juan kintz'ib'an pan chike ri wuqub' iglesias e k'o chupa taq ri tinamit re Asia.
K'ulu alaq ri unimal rutzil k'u'xaj y ri utzil chomal, ri kape ruk' ri Jun k'o waq'ij ora, ri xex chi k'o lo wi y ri k'o chiqawach apanoq, ri kape ruk' ri wuqub' uwach Uxlab'ixel k'o chwach rutz'ulib'al pa kataqan wi, 5yey ri kape ruk' ri Qanimajawal Jesucristo, ri kuq'alajisaj chi utz ri Q'ijsaq. Rire e ri nab'e xk'astaj lo chikixo'l ri ekaminaq y e ri k'o pakiwi konoje ri e taqanelab' che ruwachulew. Rire lik k'ax xojuna'o y xojuch'aj che taq ri qamak ruk' rukik'el xturuw chwa ri cruz. 6Xu'an k'u xa jun tinamit chiqe y xu'an chiqe oj taqanel y oj chakunel chwach ri Dios, Ruqaw Rire. Ek'u Rire lik taqal che kayak uq'ij waq'ij ora y chiqawach apanoq ma lik sa'chi ruchomal y ruchuq'ab'. 7Tape alaq, ri Qanimajawal Jesucristo pa sutz' kak'un wi. Konoje k'u ri' kakilo, kakil ne ri xekamisan re. Y konoje ruk'iyal kiwach taq ri tikawex che ruwachulew lik keb'oq'ik ruma ruk'unib'al.#Mt. 24:30 Paqatzij wi jela' ku'ano.
8«Ri'in in ri jeqeb'al re yey in ri k'isb'al re, jela' pacha' ri ka'ib' letra A y Z»#1:8 “A y Z”: Kil “Alfa y Omega” pa vocabulario. kacha ri Qanimajawal, ri Jun k'o waq'ij ora, ri xex chi k'o lo wi y ri k'o chiqawach apanoq yey ri k'o ronoje unimal chuq'ab' puq'ab'.
Ri xk'ut che ri Juan pa ri isla Patmos
9Ri'in in Juan in b'are jun uk' alaq hermanos, junam oj k'o chupa rutaqanik ri Qanimajawal Jesucristo y junam kaqach'ij uchuq'ab' taq ri k'axk'ob'ik ruk' unimal qak'u'x. E ri'in xine'yo'q pa ri isla Patmos ruma xintzijoj ri Tzij re ri Dios y ri Q'ijsaq re ri Qanimajawal Jesucristo. 10Pa k'u jun q'ij domingo#1:10 Pa ri ch'a'tem griego kub'i'ij “ri q'ij re ri Qanimajawal Jesucristo”. in k'o puq'ab' ri Ruxlab'ixel ri Dios echiri' xinto xch'aw lo Jun chwij, wa' lik ko kach'awik pacha' uch'awib'al trompeta. 11Jewa' xub'i'ij:
«Ri'in in ri jeqeb'al re yey in ri k'isb'al re, jela' pacha' ri ka'ib' letra A y Z. Chatz'ib'aj k'u chupa juna libro ronoje taq ri kawilo y chataqa b'i chike ri wuqub' iglesias e k'o chupa taq ri tinamit re Asia: ri k'o Éfeso, ri k'o Esmirna, ri k'o Pérgamo, ri k'o Tiatira, ri k'o Sardis, ri k'o Filadelfia y ri k'o Laodicea» xcha'.
12Xintzu'n k'u pan chwij cha' kanwilo china ri kach'a't lo wuk'; y echiri' xintzu'n apanoq, xinwil pan wuqub' utzuk'ulib'al aq' re oro. 13Chikinik'ajal k'u ri wuqub' utzuk'ulib'al aq' re oro, xinwil pan Jun lik e katzu'n Ralaxel Chikixo'l Tikawex. Ukojom jun uq'u' kopon k'a chuqul raqan y kojotal jun pas re oro chwa uk'u'x. 14Rujolom y ruwi' lik saq jela' pacha' ri mit saq y pacha' ri nieve;#1:14 Ri nieve jela' rusaqil pacha' katzu'n ri saqb'ach. y ukab'ichal ruwach pacha' aq' kareprotik. 15Ri raqan kawolq'inik pacha' ri ch'ich' bronce echiri' kesax lo pa ri orna; ruqul katatajik jela' pacha' utza'm ya' e ri' xk'unik. 16Puwikiq'ab' e k'o wuqub' ch'umil; puchi' kel lo jun espada lik t'isi's utza'm y ka'ib' ruwi re'.#1:16 Wa espada e ke'elawi Ruch'a'tem ri Cristo yey wa' lik k'o uchuq'ab' ma ronoje ri kub'i'ij e ku'ana'. Heb. 4:12 Rupalaj jela' pacha' ri q'ij echiri' lik kareprotik. 17Ek'uchiri' xintzu' uwach, xintzaq xe'raqan uq'ab' y xinkanaj kanoq pacha' in kaminaq chik. Ek'u Rire xuya ruwikiq'ab' panuwi' y jewa' xub'i'ij chwe:
«Maxi'ij awib', ma Ri'in in ri nab'e yey in ri k'isb'al re. 18In ri xex in k'o wi, In ri xinkamik, pero wo'ora na jinta chi utaqexik ri nuk'aslemal. Panuq'ab' Ri'in k'o wi ri kamik y panuq'ab' k'o wi keb'enuk'astajisaj lo ri ekaminaq.#1:18 Pa ri ch'a'tem griego kub'i'ij “Panuq'ab' k'o wi ri lawe re ri kamik y re ri luwar pa kek'oji' wi ri ekaminaq.”
19»Chatz'ib'aj janipa ri xk'ut chawach, ruk' taq ri kat-tajin che rilik y ri katajin lo chiqawach apanoq. 20Ri ke'elawi ri wuqub' ch'umil awilom pa nuwikiq'ab' y taq ri wuqub' utzuk'ulib'al aq' re oro e wa': Ri wuqub' ch'umil e ri wuqub' ángeles e chajinel ke ri wuqub' iglesias; yey ri wuqub' utzuk'ulib'al aq' re oro e ri wuqub' iglesias.
Currently Selected:
Apocalipsis 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.