Apocalipsis 2
2
Ri xtz'ib'ax pan che riglesia k'o Éfeso
1»Chatz'ib'aj pan wa' che ri aj k'amal wach#2:1 “Aj k'amal wach”: Pa ri ch'a'tem griego kub'i'ij “ángel”. Pa capítulo 2 y 3, wa' ke'elawi jun ángel re ri Dios o jun tikawex kuq'alajisaj Ruch'a'tem ri Dios chike jujun chik. re riglesia k'o Éfeso:
E ri Jun k'o wuqub' ch'umil puwikiq'ab', ri kab'in chikinik'ajal ri wuqub' utzuk'ulib'al aq' re oro, jewa' kub'i'ij chiwe:
2Ri'in lik weta'am ronoje ri ki'ano, ri k'ayewlaj chak i'anom y runimal ik'u'x chwach taq ri k'ax. Weta'am na keb'ik'ul ta iwuk' ri winaq itzel kik'u'x. Ma lik ik'amom kipa ri kakib'i'ij e taqo'n re ri Cristo tob' na e taj; yey xq'alajin k'u ri' xa e aj raq'ub'al. 3Lik itijom k'u ri k'ax y na kixkos ta k'ana che ri nuchak. Iya'om ik'u'x che utzijoxik ri nub'i' y na paxinaq ta ik'u'x che. 4Pero Ri'in k'o taq ri na kuk'ul ta nuk'u'x che ri ki'ano: E ri rutzil ik'u'x wuk' na e ta chi pacha' ri xijeqeb'ej loq. 5E uwari'che k'una chik'u'x pachawi ix jaljob'inaq wi. Chitzelej k'u itzij chwach ri Dios y chi'ana tanchi ri chak jela' pacha' ri xi'an lo che ri jeqeb'al loq. Ma we na kitzelej ta itzij, Ri'in kink'un lo iwuk' y kanwesaj k'u puluwar ri tzuk'ulib'al aq' re oro iwe'ix. 6No'j k'u ri utz k'a kixtajin che u'anik, e ri tzel kiwil taq ri na utz taj kaki'an ri nicolaítas,#2:6 “Nicolaítas”: Wa' e taq utijo'n jun achi Nicolás rub'i'. Ruk'utunik rire xa sokoso'nik. ma jenela' Ri'in lik tzel kanwil taq ri kaki'ano. 7China k'u ri k'o utanib'al, e chuta ri kub'i'ij ri Ruxlab'ixel ri Dios chike taq riglesias. China k'u ri kach'ijow uchuq'ab' taq ri na utz taj, kanya che kutij re rujiq'ob'alil ri che' re k'aslemal, ri k'o chunik'ajal ri werta re ri Dios, kacha'.
Ri xtz'ib'ax pan che riglesia k'o Esmirna
8»Chatz'ib'aj pan wa' che ri aj k'amal wach re riglesia k'o Esmirna:
E ri Jun kab'i'n re: “Ri'in in ri nab'e yey in ri k'isb'al re, ri xkamik y xk'astaj tanchik”, jewa' kub'i'ij chiwe:
9Ri'in lik weta'am ronoje ri ki'ano, ri k'axk'ob'ik ix k'o wi y ri nib'a'il kiwik'owib'ej, tob' paqatzij wi ri'ix lik k'o ib'eyomal chwach ri Dios. Lik weta'am ronoje ri tzel itzijob'exik kaki'an jujun e aj judi'ab', ri kakib'i'ij e utinamit ri Dios tob' na e ta kuk'il, ma e kuk'il ri e k'o puq'ab' ri Satanás. 10Mixi'ij k'u iwib' che ronoje taq ri kiwik'owib'ej. Chitape': Kak'am ipa, ma ritzel winaq keb'uya jujun chiwe pa cárcel y kixk'oji' pa k'axk'ob'ik lajuj q'ij. Chitikib'a' k'u ri kub'ulib'al ik'u'x, tob' kixkamisaxik; ma Ri'in kanya jun corona chiwe, wa' e ri k'aslemal na jinta utaqexik. 11China k'u ri k'o utanib'al, e chuta ri kub'i'ij ri Ruxlab'ixel ri Dios chike taq riglesias. China k'u ri kach'ijow uchuq'ab' taq ri na utz taj, ri' na kik'ow ta chupa ruka'm kamik, kacha'.#Ap. 20:6, 14; 21:8
Ri xtz'ib'ax pan che riglesia k'o Pérgamo
12»Chatz'ib'aj pan wa' che ri aj k'amal wach re riglesia k'o Pérgamo:
E ri Jun ruk'a'am ri espada lik t'isi's utza'm yey ka'ib' ruwi re', jewa' kub'i'ij chiwe:
13Ri'in lik weta'am ronoje ri ki'ano; yey weta'am e pa ri tinamit pa ix k'o wi, kataqan ri Satanás. Na ruk' ta k'u ri', k'a ikojom ri nub'i' y na iwesam ta iwib' chwij ma lik kub'ul ik'u'x wuk', tob' ne echiri' chupa la' la tinamit xkamisax ri Antipas, ri lik jusuk' tzijonel we. 14Pero Ri'in k'o taq ri na kuk'ul ta nuk'u'x che ri ki'ano: E ri eb'ik'ulum chiri' ri kitaqem ruk'utunik ri jun aj q'ij re ojertan Balaam rub'i'. Ma ri Balaam xuk'ut che ri Balac su'anik kukoj tzaqib'al pa kib'e raj Israel cha' kakitij ri ik'owisam chi chikiwach ri tiox y kaketz'ab'ej uwa kiq'ij kuk' jujun chik na kik'ulel taj.#Nm. 25:1-3; 31:16 15Yey ri'ix eb'ik'ulum chiri' ri kitaqem ri kik'utunik ri nicolaítas, wa' wa k'utunik lik tzel kanwil Ri'in. 16E uwari'che chitzelej itzij chwach ri Dios; ma we na ki'an taj, Ri'in kinopon tan iwuk' y kinch'o'jin k'u ri' kuk' ri nicolaítas ruk' ri nu espada kel lo pa nuchi'.#2:16 Wa espada ke'elawi e Ruch'a'tem ri Cristo yey wa' lik k'o uchuq'ab' ma ronoje ri kub'i'ij e ku'ana'. Heb. 4:12 17China k'u ri k'o utanib'al, e chuta ri kub'i'ij ri Ruxlab'ixel ri Dios chike taq riglesias. China k'u ri kach'ijow uchuq'ab' taq ri na utz taj, Ri'in kanya che kutij re ri wa'im ewatalik, wa' e ri maná#Éx. 16:31-33 y kanya k'u jun ralko ab'aj lik saq che y chwach ri ralko ab'aj tz'ib'ital jun k'ak' b'i'aj na jinta junoq eta'mayom re, xew keta'man ri kak'uluw re, kacha'.
Ri xtz'ib'ax pan che riglesia k'o Tiatira
18»Chatz'ib'aj pan wa' che ri aj k'amal wach re riglesia k'o Tiatira:
Ruk'ajol ri Dios, ri Jun k'o taq uwach pacha' aq' kareprotik y ri raqan lik kawolq'inik pacha' ri ch'ich' bronce echiri' kesax lo pa ri orna, jewa' kub'i'ij chiwe:
19Ri'in lik weta'am ronoje ri ki'ano. Weta'am ri rutzil ik'u'x, ri kub'ulib'al ik'u'x, ri nimanik ki'ano y runimal ik'u'x. Yey lik weta'am e taq ri chak kixtajin che u'anik waq'ij ora, más k'i chwach taq ri i'anom lo nab'e. 20Pero Ri'in k'o taq ri na kuk'ul ta nuk'u'x che ri ki'ano: E ri ik'ulum chixo'lib'al ri'ix ri jun ixoq Jezabel rub'i'.#2:20 Pa wa iglesia xk'oji' jun ixoq aj wach yey rire xeb'umin jujun chupa ri na utz taj pacha' xu'an ri reina Jezabel re ojertan. 1 R. 16:31; 2 R. 9:22,30 Wa' wi'xoq u'anom q'alajisanel che rib'; pero ruk' taq ruk'utunik, e keb'usok ri waj chakib' cha' kaketz'ab'ej uwa kiq'ij kuk' jujun chik na kik'ulel taj y kakitij ri ik'owisam chi chikiwach ri tiox. 21Ek'u Ri'in lik naj woye'em cha' kutzelej utzij chinuwach, pero na karaj taj karoq'otaj kan ri na utz taj, wa' e ri makunik kuk' rachijab'. 22Chitape': Ri'in kanya wi'xoq pa yab'il cha' katzaq chwa uwarab'al, y jek'ula' keb'enuya pa unimal k'axk'ob'ik konoje ri kemakun ruk' we e la' na kakitzelej ta kitzij che taq ri na utz taj ki'anom ruk'. 23Keb'enukamisaj na konoje ri ralk'o'al wi'xoq, cha' jela' konoje riglesia kaketa'maj e Ri'in kanwilo sa' ri k'o chupa ri kina'oj ri winaq y ri k'o chupa ri kanima', we utz o na utz taj. E Ri'in kanya chijujunal ri'ix ri taqal chiwe e chirij taq ri i'anom. 24No'j kamb'i'ij k'u chiwe ri'ix ri nik'aj chik re riglesia k'o Tiatira, ri na itaqem ta wa k'utunik#Ap. 2:20 yey na iya'om tane iwib' che u'anik ri kakib'i'ij rike “e xew ke ri lik k'o kimajom puwi ri ewatalik chikiwach ri jujun chik” yey wa' ruk' ri Satanás petinaq wi, kamb'i'ij k'u chiwe: Na jinta jun chik eqa'n kanya chiqul. 25Xew e lik miwesaj iwib' che ronoje ri uya'om ri Dios chiwe k'a echiri' kinopon tanchi iwuk'. 26Ma e chike ri kech'ijow uchuq'ab' ronoje taq ri na utz taj y kaki'an wo'ora sa' ri kuaj Ri'in y jela' ketajin che u'anik k'a echiri' kinopon tanchi iwuk', ri' kanya pakiq'ab' ketaqan pakiwi taq ri tinamit che ruwachulew, 27jela' pacha' ri uya'om ri Nuqaw chwe Ri'in. Y jek'ula' ketaqan pakiwi taq ri tinamit ruk' jun vara ch'ich' pakiq'ab' y kaki'an k'u chike pacha' echiri' ka'an uk'aj che juna xun re ulew. 28Jek'ula' chike ri ketaqanik, kan'an chike kewonik pacha' ruchomal ri nimalaj ch'umil re ri saqrib'al. 29China k'u ri k'o utanib'al, e chuta ri kub'i'ij ri Ruxlab'ixel ri Dios chike taq riglesias, kacha'.
Currently Selected:
Apocalipsis 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.