Efesios 1
1
Ri Pablo kuya pan rutzil kiwach ri hermanos e k'o Éfeso
1Ri'in in Pablo in taqo'n re ri Qanimajawal Jesucristo; e ri Dios intaqayom re, ma e xraj ri' chwe. Kantz'ib'aj pan wa carta che alaq ri k'o alaq pa ri tinamit Éfeso,#Hch. 18:19-21; 19:1 ri k'o alaq puq'ab' ri Cristo y tikil alaq chi utz chupa rub'i'. 2K'ulu k'u alaq ri unimal rutzil k'u'xaj y ri utzil chomal re ri Qaqaw Dios y re ri Qanimajawal Jesucristo.
Ronoje taq ri utz uch'ob'om lo ri Dios e kuya chiqe ruma ri Cristo
3¡Lik nim uq'ij ri Dios, Ruqaw ri Qanimajawal Jesucristo! Ruma oj chi re ri Cristo, ri Dios uya'om lo chiqe ronoje taq ri to'b'al petinaq chila' chikaj. 4Ma ri Dios k'amaja' ne ku'an ruwachulew echiri' xojucha' loq cha' kojuya puq'ab' ri Cristo, y jela' koju'an jusuk' y na jinta chi ne k'ana qamak chwach. 5Ruma k'u rutzil uk'u'x ri Dios, lik ojertan xujikib'a' lo uwach cha' ku'an ralk'o'al chiqe ruma ri Qanimajawal Jesucristo. Yey lik pa ranima' xalax wi ku'an wa'. 6Kaqayak k'u uq'ij ri Dios ruma ri unimal rutzil uk'u'x paqawi', ri xuya chiqe ruma Ruk'ajol, ri lik k'ax kuna' Rire. 7Ruk' k'u ri' ri Cristo k'o qakolob'etajik y k'o kuyb'al qamak ruma rukik'el xturuwik, yey qariqom wa' ruma ri unimal rutzil uk'u'x ri Dios. 8Na jinta k'u utaqexik wa rutzil uk'u'x uya'om lo paqawi'. Yey xuya ne chi saq ri qana'oj 9cha' kaqeta'maj sa' runa'oj Rire, ri na uya'om ta che reta'maxik ojertan. Ma uch'ob'om chi lo ojertan chirib'il rib' sa' ri karaj ku'an ruma ri Cristo 10echiri' kopon na ruq'ijol kuk'am lo ronoje taq ri k'olik, wa' e taq ri e k'o chila' chikaj y ri e k'o che ruwachulew, yey kuya na ronoje wa' puq'ab' ri Cristo cha' kataqan puwi'.
11Ruma k'u oj re ri Cristo, kaqak'ul na rub'i'tisim lo ri Dios chiqe, ma xojucha' lo ojertan cha' kaqa'an janipa ri uch'ob'om chi lo Rire. Yey Rire lik e ku'ana ronoje ri karaj ku'ano jela' pacha' ri uch'ob'om chi uloq. 12Xojucha' k'u ri' re yakb'al uq'ij Rire cha' kilitaj ruchomalil quma ri'oj, ri nab'e xkub'i' qak'u'x ruk' ri Cristo. 13Ek'uchiri' ralaq xta alaq rutzijoxik ri Q'ijsaq, ri Utzilaj Tzij puwi su'anik kakolob'etaj alaq; xkub'i' k'u'x alaq ruk' ri Cristo y xk'ul k'u alaq ri b'i'tisim kanoq: Wa' e ri Santowilaj Ruxlab'ixel ri Dios pa anima' alaq, k'utub'al re, alaq chi re ri Dios. 14Yey ri Ruxlab'ixel ri Dios pa qanima' e kajikib'an uwach chiqe, chiqawach apanoq kaqak'ul na rutz'aqatib'al janipa ri ub'i'tisim kan ri Dios chiqe cha' jela' kaqayak uq'ij ri Dios ruma ri unimal uchomalil.
Ri Pablo ku'an orar pakiwi ri hermanos
15Ruma k'u nutom lik kub'ul k'u'x alaq ruk' ri Qanimajawal Jesucristo y lik k'utum ri rutzil k'u'x alaq chike konoje ri kikojom rub'i', 16na kinuxlan ta che kintioxin chwach ri Dios uma ralaq echiri' kan'an orar. 17Kan'an orar chwach ri Qaqaw ri lik nim uq'ij, ri Dios re ri Qanimajawal Jesucristo. Kantz'onoj k'u che chuya'a lo na'oj alaq ruma ri Ruxlab'ixel y chuq'alajisaj k'u chiwach alaq runa'oj Rire cha' jela' keta'maj alaq uwach chi utz. 18Yey kantz'onoj che ri Dios kuya chi saq ri na'oj alaq cha' jela' keta'maj alaq chi utz sa' taq ri oye'em alaq, ma alaq sik'im ruma ri Dios. Cheta'maj k'u alaq sa' ri chomilaj b'eyomalil ub'i'tisim chike konoje ri e re Rire. 19Kuaj k'ut lik keta'maj alaq runimal uchuq'ab' ri Dios, ma wa' na jinta kajunumitaj wi. Y wa uchuq'ab' k'o chi quk', ma ruk' wa' ri Dios kachakun chiqaxo'l ri'oj ri lik kub'ul qak'u'x ruk'. 20Wa' wa uchuq'ab' e xuk'utu echiri' xuk'astajisaj lo ri Cristo chikixo'l taq ri ekaminaq y xutz'uyub'a' puwikiq'ab' chila' chikaj. 21Jela' ri Dios xuya puq'ab' ri Cristo kataqan pakiwi konoje ri e taqanelab', ri lik k'o kiwach, ri k'o kichuq'ab' y ri lik yakom kiq'ij. Ma rub'i' ri Cristo e más nim uq'ij chwach ronoje taq b'i'aj, ma na jinta jun chik más k'o uwach chwa Rire; y wa' na xew ta wo'ora ma jela' chiqawach apanoq. 22Ek'u ri Dios xuya ronoje xe'raqan uq'ab' ri Cristo y xukojo cha' ku'an unimal ujolom riglesia 23y riglesia e ucuerpo Rire. Jek'ula' ri Cristo ruk' riglesia junam katz'aqat kiwach, y e ri Cristo ri katz'aqatisan re janipa taq ri k'olik.
Currently Selected:
Efesios 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.