Efesios 2
2
Ri Dios kuya k'ak' k'aslemal chiqe
1Ri Dios uya'om k'ak' k'aslemal che alaq, tob' ojertan kaminaq alaq chwach ri Dios ruma xmakun alaq y xpalajij alaq Rutzij. 2Ma rojertan ri b'inik silab'ik alaq e junam ruk' ri kib'inik taq ri winaq re ruwachulew. E xnimaj alaq janipa rutaqanik ri jun kataqan xa pa tew, wa' e ri itzel uxlab'ixel, ri kataqan waq'ij ora kuk' taq ri winaq kakipalajij Rutzij ri Dios. 3Qonoje ri'oj ojertan xqa'an qe'oj kuk' rike, ma e xqataqej janipa taq ri rayib'al re ri qati'jil y taq ri na utz taj kak'un pa qajolom. Lik qalaxib'em chi lo wa' oj aj makib'. Ruma k'u la', lik taqal chiqe we ta xpe ri royowal ri Dios paqawi' jela' pacha' ri ku'an kuk' konoje ri e aj makib'. 4Pero ri Dios ruma lik k'o unimal rutzil uk'u'x, xoj-juch' ka'n che y k'ax xojuna'o. 5Ma echiri' k'a oj kaminaq chwach Rire ruma ri qamak, xuya k'ak' k'aslemal chiqe junam ruk' ri Cristo. Ruma k'u ri unimal rutzil uk'u'x ri Dios k'o qakolob'etajik. 6Y junam ruk' ri Qanimajawal Jesucristo xojuk'astajisaj loq y xuya chiqe kojtaqan ruk' Rire chila' chikaj. 7Ri Dios xu'an wa' chiqe cha' chiqawach apanoq lik kaq'alajin ri unimal rutzil uk'u'x na jinta utaqexik, ri xuya lo ruk' relej uk'u'x paqawi' ruma ri Qanimajawal Jesucristo. 8Ma ruma k'u ri unimal rutzil uk'u'x ri Dios k'o kolob'etajik alaq yey wa' e ruma xkub'i' k'u'x alaq ruk' ri Cristo. Y ri kolob'etajik, na alaq ta xch'akow re, ma e jun sipanik re ri Dios che alaq. 9Ri kolob'etajik na kariqitaj ta k'u ri' ruma ri utz ka'an alaq, cha' jela' na jinta junoq kutak'ab'a' uq'ij. 10Ma e ri Dios xu'an k'ak' chiqe ruma ri Qanimajawal Jesucristo cha' kaqa'an ri utz chwach jela' pacha' ri uch'ob'om chi lo ojertan.
Qonoje ri qakojom rub'i' ri Cristo, xa jun qa'anom chwach ri Dios
11Echiri' xalax alaq, na alaq ta kuk'il ri e aj judi'ab'. Y rike xkib'i'ij k'u che alaq: «Lik na junam ta iwach quk' ri'oj, ma ri'oj kojotal ri retalil re circuncisión chiqe, k'utub'al re oj utinamit ri Dios; no'j ri'ix na jinta wa' chiwe» kecha'. Yey wa' kojotal che ri cuerpo xa kuma tikawex. 12Ek'u rojertan na jinta ri Cristo pa anima' alaq, na alaq ta ne kuk'il raj Israel ri ya'tal chike e utinamit ri Dios, y na jinta ne oye'em alaq che ri b'i'tisinik u'anom ri Dios#2:12 “Ri b'i'tisinik u'anom ri Dios”: Gn. 9:9; 15:18; Éx. 19:1-8; 2 S. 7:11-16,26 echiri' xu'an tzij kuk' rutinamit; lik k'u xa tukel alaq ri' che ruwachulew ma na jinta ri Dios uk' alaq.
13No'j wo'ora k'o chi alaq puq'ab' ri Qanimajawal Jesucristo; yey na naj ta chi k'o wi alaq che ri Dios, ma ruma rukik'el ri Cristo, ya'tal che alaq kopon alaq chwach ri Dios.#Heb. 4:16 14Ek'u ri' ri Cristo xojya'w chi utzil chomal chiqawach ri oj aj judi'ab' uk' ralaq ri na alaq ta aj judi'ab'; xu'an k'u xa jun chiqe y xresaj ri q'atb'al kajachaw qapa. 15Ri Cristo echiri' xuya rib' pa kamik, e xusach uwach ri retzelal k'u'x k'o chiqawach ruma ri tzij pixab' kitaqem raj judi'ab'.#2:15 Ri tzij pixab' ke raj judi'ab' xujach kipa wa keb' tinamit, ma raj judi'ab' e lik kitaqem wa tzij pixab', no'j ri na e ta aj judi'ab' na keb'ok ta il che. Ruma k'u la' lik tzel kakil kib'. Jek'uri'la', che wa keb' tinamit xu'an xa jun tinamit, jun k'ak' tinamit u'anom xa jun ruk' Rire. Xutik k'u ri utzil chomal chiqaxo'l. 16Ma ruk' rukamik chwa ri cruz, xeb'uya wa keb' tinamit chi utzil chomal chwach; xu'an k'u xa jun chike cha' na tzel ta chi kakil kib'. 17Xk'un k'u ri Cristo y xutzijoj chike konoje su'anik kek'oji' chi utzil chomal ruk' ri Dios. Xutzijoj k'u wa Utzilaj Tzij che ralaq echiri' k'a naj k'o wi alaq che ri Dios y chike rutinamit Israel ri xa naqaj e k'o wi che. 18Ruma k'u ri xu'an ri Cristo, qonoje tob' oj aj judi'ab' o na oj ta aj judi'ab' ya'tal chiqe kojopon chwach ri Qaqaw Dios ruma ri Ruxlab'ixel Rire k'o quk'. 19Jek'uri'la', wo'ora na alaq ta chi pacha' ri xa e ik'owel o ri e jeqel pa juna luwar na kitinamit taj; ma alaq chi kuk'il rutinamit ri Dios, alaq chi ralk'o'al ri Dios, junam kuk' konoje ri e re Rire.
Riglesia e pacha' juna ja pa jeqel wi ri Dios
20E ralaq pacha' alaq juna ja katajin ri Dios che uyakik. Alaq pacha' xan katajin utz'aqik chwi ri kowilaj uparaqan ri ja, yey wa' e ri kik'utum kan ri e taqo'n y ri q'alajisanelab' re ri Dios. Ek'u ruk'u'xib'al lo ruparaqan ri ja#2:20 “Ruk'u'xib'al lo ruparaqan ri ja”: Wa' pa kaxtila kab'i'x “piedra maestra” che. E nab'e ab'aj kakoj paskin che ri ja kayakik. e ri Qanimajawal Jesucristo. 21Lik k'u ri' kuchap b'i rib' chi utz ri ja ma ronoje ri kojotal che, tz'aqom b'i chi utz chwi ri ratz'ayaq, cha' jela' ku'ana jun santowilaj rocho ri Dios, ma tikil chi utz ruk' ri Qanimajawal. 22Ruma k'u ri Dios, alaq junam kuk' raj judi'ab' ri kikojom rub'i' ri Cristo; u'anom che alaq, alaq rocho ri Dios, ma Rire jeqel uk' alaq ruma ri Ruxlab'ixel uya'om che alaq.
Currently Selected:
Efesios 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.