1 Pedro 4
4
Chojchakuna chi utz ruk' taq ri uya'om ri Dios paqaq'ab'
1Ri Cristo lik xuya ranima' kutij k'ax quma ri'oj. Jek'ula' ri', lik chirajawaxik che alaq kaya anima' alaq katij alaq k'ax ruma Rire. Ma e janipa ri kakiya kanima' kaki'an ri utz tob' kape k'ax pakiwi', q'alaj k'u ri' na e jinta chi puq'ab' ri mak. 2Ruma k'u la', janipa chi q'ij e k'o che ruwachulew, na kaki'an ta chi janipa ri rayib'al ke ri winaq, ma e kaki'an janipa ri karaj ri Dios. 3Ri u'anom loq e x'an lo alaq pacha' ri kaki'an ri winaq na keta'am ta uwach ri Dios. Ma xya ib' alaq che u'anik taq ri rayib'al re ri ti'jil alaq, yey xya ib' alaq pa q'ab'arik y xmol ib' alaq che u'anik ch'ulilaj mak; xya ib' alaq che ri lik na chom ta uwach yey lik itzel taq uwach ri x'an alaq echiri' xloq'nimaj alaq taq ri tiox.#4:3 Rojertan e k'o winaq kakikamisaj ri kalk'o'al re qasa'n chwach taq ri kitiox. 4E taq k'u ri xkachb'ilaj alaq che u'anik wa' wu'k'iyal uwach mak, xkam kanima' che echiri' xesaj ib' alaq che taq wa'; yey ruma ri' lik k'ax kech'a't chi'ij alaq. 5Pero kopon k'u ri q'ij echiri' konoje rike kakiya na kib' chupa ri kimak chwach ri Jun kuq'at tzij pakiwi ri e k'aslik y ri ekaminaq. 6Ruma ne k'u la', xtzijox ri Utzilaj Tzij chike ri ekaminaq chupa ri kimak cha' kak'oji' kik'aslemal na jinta utaqexik chwach ri Dios, tob' chikiwach taq ri winaq, na utz ta ri xki'an rike ruma xkikoj rub'i' ri Cristo.
7Lik xa naqaj chi k'o wi lo ruq'ijol echiri' kak'is ri na utz ta uwach y kajalk'atisax k'u ronoje ri k'olik. Ruma k'u ri', lik k'ola na'oj alaq puwi' sa' taq ri ka'an alaq y xaqi e ya'a ib' alaq pa oración chwach ri Dios. 8Yey ri más chirajawaxik wi e ruk' ronoje k'u'x alaq k'ax kana' ib' alaq chiwach alaq, ma we lik k'o rutzil k'u'xaj uk' alaq, ri' kakuy alaq taq ruk'iyal mak ke ri nik'aj chik. 9Chek'ulu alaq chi utz ri keb'opon chi ocho alaq y mawunwut ne alaq che u'anik wa'. 10Ek'u chirij ri uya'om ri Dios paq'ab' alaq, cheto'o alaq ri jujun chik, cha' jela' ku'an alaq saqil aj chakib' re ri Dios y kachakun alaq chi utz ruk' ruk'iyal uwach to'b'al uya'om ri Dios che alaq. 11We k'o junoq kak'utun chikiwach ri hermanos, e chuk'utu puwi ri kub'i'ij Ruch'a'tem ri Dios y na xa ta pa re kach'a'tik. We k'o junoq karaj keb'uto' ri tikawex, chu'ana wa' ruk' ri chuq'ab' ya'tal che ruma ri Dios. Ronoje k'u ri ka'an alaq, 'ana alaq re yakb'al uq'ij ri Dios ruma ri Qanimajawal Jesucristo, ri lik taqal che k'o yakb'al uq'ij y kataqan k'u pakiwi konoje waq'ij ora y chiqawach apanoq na jinta utaqexik. Amén.
Chojki'kotoq we kaqatij k'ax ruma oj re ri Cristo
12Hermanos, makam anima' alaq che taq runimal k'axk'ob'ik kape pawi' alaq re kuk'am pa alaq, ma qonoje kojik'ow chupa wa'. 13Ri 'ana alaq e ki'kota alaq, ma alaq b'are jun che taq ri k'axk'ob'ik xik'ow wi ri Cristo, cha' echiri' kuq'alajisaj runimal uchomalil, ralaq lik kaki'kot alaq che. 14We e k'o tzel kech'a't chi'ij alaq ruma kojom alaq rub'i' ri Cristo, ri' lik nim q'ij alaxik alaq ma ri chomilaj Ruxlab'ixel ri Dios k'o uk' alaq. Qatzij wi, e k'o ri tzel kech'a't chirij Rire, no'j ralaq lik kayak alaq uq'ij Rire. 15We k'o junoq che alaq kutij k'ax, lik k'ixb'al uwach we wa' e ruma kamisanel o eleq'om o ruma u'anom ri na utz taj che junoq o ruma uminom rib' chupa ri na jinta re che. 16No'j we k'o junoq kutij k'ax ruma ukojom rub'i' ri Cristo, mak'ix k'u ri' che; ri chu'ana' e chuyaka uq'ij ri Dios ruma wa'. 17Ma e q'ij wa' kajeqer b'i ri q'atb'al tzij pakiwi ri e ralk'o'al ri Dios. Yey we nab'e k'ut kajeqer quk' ri'oj, ¿sa' nawi ke'kik'isa wi ri' ri na kikojom ta ri Utzilaj Tzij re ri Dios? 18Ma jewa' kub'i'ij pa Ruch'a'tem ri Dios:
We ri e jusuk' chwach ri Dios ruk' ne uk'ayewal kekolob'etajik,
¿sa' k'u kakik'ulumaj ri' ri e aj mak, ri kaki'an kititz'itikil che ri Dios?#Pr. 11:31
19E uwari'che, e taq ri e k'o pa k'ax ruma kaki'an janipa ri karaj ri Dios, e ki'ana ri' ri lik usuk' y kiya'a k'u ri kik'aslemal puq'ab' ri Dios, ri x'anaw re ronoje y lik e ku'an janipa rub'i'tisim.
Currently Selected:
1 Pedro 4: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.