1 Pedro 3
3
Pixab'anik chike ri e k'ulanik
1Ek'u rilal ixoq, e taqej la ri achijil la. 'Ana k'u la wa' ma we rire na ukojom ta Ruch'a'tem ri Dios, tob' na jinta kab'i'ij la che chwi wa', k'o pa saq kukojo ruma ri b'inik silab'ik rilal 2ma karilo lik ub'e ri ka'an la y lik lal nimay tzij. 3Ruchomalil juna ixoq na e ta ruma ri wiqital che rucuerpo; e uwari'che na utz ta k'u ri' we kik'ow uwi' che uyijb'axik ruwi', o kik'ow uwi' ruk' ri uwaaj y usansilo re oro o ri k'ul lik k'i rajil kukojo. 4Ma ruchomalil rixoq e ri k'o chupa ri ranima'; wa' e ri lik utz uk'u'x y na aj ta tzukul ch'a'oj. Yey wa' wa uchomalil na kasach ta k'ana uwach y lik k'o uq'ij chwach ri Dios. 5Rojertan jela' xki'an rixoqib' e jusuk', ri lik xkub'i' kik'u'x ruk' ri Dios. Ma ri kichomalil rike xilitaj che ri kib'inik kisilab'ik ruma xekitaqej ri kachijil. 6Jela' xu'an ri Sara, e lik xukoj utzij ri Abraham y ruch'a'b'exik xu'ano e “lal wajawal”. Ek'u ralaq ku'ana alaq ralk'o'al ri Sara we ka'an alaq ri utz y na jinta k'o kuxi'ij rib' k'u'x alaq che.
7Ek'u rilal achi, jeqela la ruk' ri ixoqil la ruk' saqil na'oj. 'Ana la che janipa ri taqal che rire. K'una k'u chik'u'x la e rire lik na jinta ko ukowil yey junam uwach uk' la, ma junam kak'ul alaq ri unimal rutzil uk'u'x ri Dios che ri k'aslemal alaq. We ka'an k'u la wa', echiri' ka'an la orar, na jinta kalatz'an re ri ch'a'tem la chwach ri Dios.
Pixab'anik puwi ri qab'inik qasilab'ik
8K'isb'al k'u re wa', e chu'ana xa jun k'u'x alaq, k'ola k'axna'b'al k'u'xaj uk' alaq, lik k'ax na'a ib' alaq chiwach alaq ma chaq' ib' alaq chwach ri Qaqaw, k'utu k'u alaq ri rutzil k'u'x alaq y 'ana alaq ch'uti'n che ib' alaq. 9Matzelej alaq uwach ri na utz taj ka'an che alaq. We k'o junoq kub'i'ij itzelilaj ch'a'tem che alaq, matzelej alaq uwach ruk' itzelilaj ch'a'tem; ri 'ana alaq e tz'onoj alaq ri utz puwi ri ka'anaw re wa'. Yey we ka'an alaq wa', ri Dios kuya na ri utz pawi' alaq, ma ruma wa' xusik'ij alaq. 10Ma jewa' tz'ib'ital kan pa Ruch'a'tem ri Dios:
China ri k'ax kuna' ruk'aslem
y karaj karik'owib'ej ri jujun q'ij ruk' ki'kotem,
e chuq'atej k'u ri' ri raq' che ub'i'xikil ri na chom taj
y mu'an chi ri kel lo raq'ub'al puchi'.
11Resaj k'u rib' ri' che u'anik ri na utz taj,
yey e chu'ana ri utz.
Chutzukuj kak'oji' chi utzil chomal kuk' konoje y
e chuya'a rib' che u'anik wa'.
12Ma ri Qanimajawal k'o ruwach pakiwi
ri jusuk' kib'inik kisilab'ik re keb'uchajij,
yey lik kuya uxikin chike
echiri' kech'a't ruk' pa oración.
No'j na chom ta keril
janipa ri kaki'an ri na utz taj Sal. 34:12-16
kacha'.
13¿China k'u ri ka'anaw ri na utz taj che alaq we e lik ya'om ib' alaq che u'anik ri utz?#Ro. 8:31 14Pero we katij alaq k'ax ruma ka'an alaq ri lik jusuk', ri' lik nim q'ij alaxik alaq. E uwari'che, maxi'ij ib' alaq che ri xib'ib'al pa alaq ka'anik yey masach k'u'x alaq che wa'. 15Ri 'ana alaq e loq'oj alaq uq'ij ri Cristo chupa ri anima' alaq, ma Rire e Qajawal. Xaqi yijb'a' ib' alaq che uk'ulik uwach taq ri tz'onob'al ka'an che alaq puwi ri kub'ul pan k'u'x alaq che; yey 'ana alaq wa' ruk' uch'uti'nal k'u'x alaq y xi'in ib' alaq chwach ri Dios. 16B'ina alaq chi jusuk' cha' jela' kuna' k'u'x alaq na jinta mak 'anom alaq. 'Ana k'u alaq wa' cha' e janipa ri kech'a't chirij ri chomilaj b'inik alaq ruk' ri Cristo, kaya'taj kik'ix ruma ri raq'ub'al kaki'an chi'ij alaq. 17Ma we e karaj ri' ri Dios katij alaq k'ax ruma ka'an alaq ri utz, wa' e más utz chwa ri katij alaq k'ax ruma ka'an alaq ri na utz taj. 18K'una chik'u'x alaq, ri Cristo lik xutij k'ax echiri' xa jumul xkam ruma ri qamak. Tob' Rire na jinta umak, xkam quma ri'oj oj aj makib' cha' jela' kojuk'am b'i ruk' ri Dios. Echiri' ri Cristo xkamisax kuma ri winaq, paqatzij wi xkam rucuerpo; pero Rire xk'astajik, ma na xkam ta ri ranima'. 19Jek'ula' xe'ek pa ek'owi ri ekaminaq, wa' e ri tz'apim kichi', y xu'tzijoj chike janipa ri xu'ano. 20Yey xtataj wa' kuma ri na xkikoj ta utzij ri Dios ojertan chupa ruq'ijol ri Noé. Ma ri Dios ruk' unimal uk'u'x xeroy'ej kakitzelej kitzij chupa taq la' la q'ij echiri' ri Noé katajin che u'anik ri nimalaj barco. Yey chupa k'u ri barco xa e ajilam ri xeb'ok b'i, ma e wajxaqib' ri xekolob'etaj che runimal jab'. 21Y wa' e pacha' ri bautismo kaqak'ul ri'oj waq'ij ora re kolob'etajik. Wa bautismo na re ta karesaj ri ch'ul k'o che ri qacuerpo, ma e re karesaj ri mak k'o pa qanima' y ruma k'u wa' kaqajikib'a' chwach ri Dios kojk'oji' chi jusuk'. Yey qeta'am lik jikib'am uwach ri qakolob'etajik ruma ruk'astajib'al ri Qanimajawal Jesucristo, 22ri xe'ek chila' chikaj y tz'ul puwikiq'ab' ri Dios. Konoje k'u ri ángeles, kuk' taq ri k'o kiwach y ri k'o kichuq'ab' e k'o chuxe' rutaqanik Rire.
Currently Selected:
1 Pedro 3: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.