Gosota-Kəmkàrje 30
30
Taje lə Agur
1Taje gə́ Agur ŋgolə Jake pa. Ndərtaje gə́ dəw nee pa wɔji ne dɔ Itiel, wɔji ne dɔ Itiel ləm, gə Ukal ləm tɔ.
2Tɔgərɔ ya, ma lé m’gər né el m’unda dəw gə́ rara kara ləm,
M’iŋga gosonégər gə́ ka̰ dəw el ləm tɔ,
3Ma m’ndoo ta kəmkàr el ləm,
Négər lə njemeenda londoŋ lé kara ma m’gər el ləm tɔ.
4See na̰ ɓa ḭ aw dara ɓa tel ree naŋg nee wa.
See na̰ ɓa wa lel meḛ jia’g wa.
See na̰ ɓa tɔ mán gə kubu ləa wa.
See na̰ ɓa ar ŋgaŋ rudu naŋg nee to wa.
See ria ban wa. See ri ŋgonee ban wa.
See i gər ya wa.
5Taje lai gə́ Ala pa lé to taje gə́ àr ŋgad-ŋgad.
Yeḛ to dər lə deḛ gə́ saŋg njo̰loo-kula-dɔ dee rəa’g.
6Taje ləa lé maji kari ila maree dɔ’g el,
Nà banelə yeḛ a ndaŋgi ndá d’a kooi gə́ njetaŋgɔm .
7Ma m’dəjii néje joo ya,
Ɓad ɓa kam m’wəi ɓəi lé maji kari ɔgm el!
8Ta gə́ gə goo rəbee el, gə taŋgɔm lé ɔs dee rəw rɔm’d gə́ raŋg,
Am m’to njendoo el ləm, gə bao el ləm tɔ,
Maji kari am nésɔ gə́ asm béréré ya,
9Nà banelə loo gə́ m’a si dan néje’g bèdèg ndá
M’a mbadi pa ne pana: see Njesigənea̰ ɓa to nawa.
Esé loo gə́ m’a si dan ndòo’g ndá
M’a ɓogo kila ne ndɔl dɔ ri Ala’g lé ləm tɔ.
10Maji kari un dɔ ɓər ar ɓéeje el,
Nà banelə yeḛ a kila ndɔl dɔi’g
Kar dee d’ooi ne gə́ dəw gə́ ta wa dəa.
11Ginkoji dəwje gə́ na̰je d’isi gən
Gə́ to njekila ndɔl dɔ bɔ deeje’g ləm,
D’ila riɓar dɔ ko̰ deeje’g el ləm tɔ.
12Ginkoji dəwje gə́ na̰je d’isi gən
Gə́ d’oo rɔ dee gə́ dəwje gə́ d’àr ŋgad-ŋgad,
Nɛ deḛ togo né gə́ mina̰ gə́ to rɔ dee’g el.
13Ginkoji dəwje gə́ na̰je d’isi gən
Gə́ to njébeeleje ləm,
Né wa kəm dee el ləm tɔ.
14Ginkoji dəwje gə́ na̰je d’isi gən
Gə́ ŋgaŋ dee to gə́ kiambas ləm, mbiri dee to gə́ kiaje ləm tɔ
Gə mba gaŋg ne njénékəmndooje gə́ dɔ naŋg nee sɔ dee ləm,
Gə njéndooje gə́ mbuna dəwje’g ləm tɔ.
Ta kəmkàr gə́ tura néje ɓəd-ɓəd
15Tende lé ŋganeeje gə́ dené joo to gən gə́ ɓaree pana: Am! Am!
Néje munda gə́ né as dee nda̰ el lé to keneŋ’n,
Sɔ kara pana: As ŋga! Bèe el ya saar ləm tɔ.
16Loo-si lə njé gə́ d’wəi ləm, dené gə́ to kawkad ləm,
Naŋg gə́ mán asee el ləma, gə pər gə́ pana: as ŋga! Bèe el ya saar ləm tɔ.
17Dəw gə́ ndaji ndu bɔbeeje kogo ne ləm,
Ŋgonkoji gə́ kəm kila dɔ kea̰je’g kara
Yeḛ ula sul dɔ’g ləm tɔ lé
Ga̰-ga̰je gə́ d’isi mbuna kəm-rəw-manje’g mbuna mbalje’g lé
D’a tɔr guburu kəmee ləm, ŋgan niŋgatə̰dəje d’a səa ləm tɔ.
18Néje munda gə́ dum dɔm to keneŋ ləm,
Deḛ gə́ sɔ lé kara ma m’gər gin dee el ya ləm tɔ:
19Rəw-kaw lə niŋgatə̰də gə́ pə̰ dara’g ləm,
Rəw-kaw lə li gə́ dɔ mbal’g ləm,
Rəw-kaw lə bato gə́ dɔ baa-boo-kad’g ləma,
Gə rəw néra lə ŋgon gə́ basa gə́ par gə́ rɔ ŋgoma̰də’g ləm tɔ.
20Rəw-kaw kaiya-dené ɓa to nee:
Yeḛ sɔ né ndá bɔr təa péd,
Tɔɓəi yeḛ pana: Ma m’ra majel el.
21Néje munda ar naŋg yə,
Yeḛ gə́ sɔ lé al dɔ siŋgá to:
22Ɓər gə́ tel to njeko̰ɓee ləm,
Mbə-dəw gə́ sɔ né ar mée ndan ləm,
23Dené gə́ ndigee el gə́ tel taa ŋgaw ləma,
Gə ŋgonjelookisi gə́ dené gə́ wa nénduba lə ɓéeje gə́ dené lé ləm tɔ.
24Ŋgan néje gə́ lam-lam sɔ to dɔ naŋg nee,
Nɛ lé bèe kara kəmkàr lə dee to yaa̰ unda mar deeje,
25Turje lé siŋga dee as el,
Nɛ d’wa dɔ gɔl nésɔ dee gə́ ɓara,
26Yəg-wurije lé siŋga dee to yaa̰ el,
Nɛ d’ar loo-to dee to mbuna kɔr mbalje’g,
27Beedéje lé mbai lə dee godo,
Nɛ d’unda loo teḛ gə kudu dee kudu dee,
28Jimkil gə́ dəw askəm kwá gə jia ya,
Nɛ yee si kəi-mbaije’g lə mbaije tɔ.
29Néje munda gə́ njaa maji to keneŋ,
Deḛ gə́ sɔ gə́ panjaa dee maji yaa̰ ɓa nee:
30Toboḭ gə́ siŋgamoŋgee ur dɔ daje’g lai lé
Nana kara yee ɔs tel gə gée nea̰’g el ləm,
31Kunda gə́ d’ɔm né rəa’d gə́ gər tila ji riŋga ləm,
Esé bàl bya̰ ləma, gə mbai gə́ aar no̰ njérɔje’g ləa bèe ləm tɔ.
32Ɓó lé beelé ɔsi mba kari ra némbə ləm,
Ɓó lé takə̰jije ləi majel ləm tɔ ndá
Maji kari ila jii tai’g:
33Mbata kunda mbà maŋg yaa̰ ɓa ar ubee gə́ ɓi teḛ ne ləm,
Korè əm dəw yaa̰ ɓa ar məs teḛ ləma,
Kɔs gel oŋg yaa̰ ɓa ar takɔlje teḛ ne ləm tɔ.
Currently Selected:
Gosota-Kəmkàrje 30: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.