Jude 1
1
Lapia gə́ ra dee
1Ma Jude, kura lə Jeju Kristi ləm, gə ŋgoko̰ Jak ləm tɔ lé m’ndaŋg maktub nee m’ar dee-deḛ gə́ Ala Bɔ-dəwje ɓar dee ləm, unda dee dan kəmee’g ləma, aḭ bada dɔ dee’g mba kar Jeju Kristi lé ləm tɔ .
2Maji kar meekɔrjol ləm gə meelɔm ləma, gə meenoji ləm tɔ, uru na̰ gə gɔlee gə́ dɔ sí’g.
Néndoo gə́ ŋgɔm
3Seḭ gə́ m’unda sí dan kəm’g lé məəm ɔsm ɓɔḭ-ɓɔḭ gə mba karm m’ndaŋg maktub m’ar sí m’wɔji ne dɔ kaji lə sí gə́ jeḛ j’ɔm na̰ keneŋ sad lé. Bèe ɓa m’isi dɔ gɔlm’g kəgəgə gə mba ndəji sí kar sí badara ne rɔ sí dɔ ta meekun gə́ d’ula ji deḛ gə́ to gə kəmee gɔl kára ba kiao gə́ ŋgaŋgee lé tɔ. 4Mbata dəwje gə́ na̰je d’andə mbuna sí’g wai-wai, nɛ ta gə́ a gə kwa dɔ dee lé deḛ ndaŋg ləw ba. Deḛ neelé deḛ to njéndɔl-Alaje ɓa deḛ d’un noji lə Ala lə sí telee gə́ né lɔm dɔ néra gə́ kori-kori lə dee ləm, Mbaidɔmbaije Jeju Kristi gə́ to ɓée síje kára ba kiao lé deḛ mbadee saar ləm tɔ.
5Taje neelé lai seḭ gərje mba̰ ya nɛ ma m’ndigi kolé meḛ sí dɔ’g ɓəi. Loo gə́ Mbaidɔmbaije ɔr dəwje ləa Ejiptə’g aji dee lé mba̰ ndá gée gə́ gogo yeḛ tel tuji dee-deḛ gə́ njékɔs kankəmta rəwje lé tɔ . 6Tɔɓəi kuraje gə́ dara gə́ d’ar néra dee wa bua kula lə dee el nɛ d’uba loo-si dee d’ya̰ lé yeḛ unda dee kul ŋgina ne ndɔ gaŋg rəwta gə́ to ndɔ gə́ boo gə́ yeḛ a tɔ dee gə kúla lar jo̰dɔrɔ kɔm dee dan loo gə́ ndul njudu-njudu’g gə no̰ lé tɔ. 7Tɔɓəi Sɔdɔm gə Gɔmɔr gə ɓeeje gə́ gugu dɔ deḛ gə́ d’ula rɔ dee dan kaiya’g d’ar mal néje gə́ mina̰ ula pər meḛ dee’g lé deḛje neelé bo̰ néra dee ɔs ta dee’g dan pər gə́ o̰ bilim-bilim gə́ to gə no̰. Ala unda dee no̰ sí’g unda rɔ dee ar sí j’oo, wɔji ne pia gə́ a gə ra sə sí lé ya tɔ kən .
8Nɛ lé bèe kara dəwje neelé deḛ ni niée ta-ta d’ar rɔ dee mina̰ ne jɔmri-jɔmri ləm, deḛ d’ila ndɔl dɔ dəw dɔ deeje’g ləma, deḛ taji njérɔndubaje ləm tɔ. 9Nɛ Misel, mbai dɔ kuraje lə Ala gə́ dara lé loo gə́ yeḛ oma̰ gə njekurai maḭ ne səa ta dɔ darɔ Moyis’g lé yeḛ oo loo kila ta tajikil dəa’g el, nɛ ɓai ta gə́ pa ɓa nee: Maji kar Mbaidɔmbaije ila ta dɔi’g ya . 10Dəwje neelé né gə́ deḛ d’oo gəd el kara d’ila ndɔl dɔ’g ləm, d’aw gə́ sin asəna gə daje gə́ d’aw gə́ kaw ɓó d’ə̰ji ta meḛ dee’g el ɓa deḛ tuji ne bèe. 11Maji kar meeko̰ ra dee! Mbata deḛ tuga rəw goo Kaḭ’g ləm, deḛ d’al d’uru loo-kwəi-yoo-lar’g ndəm ne ndəm lə Balaam ləma, d’al ta kal lə Koré ləm tɔ . 12Dəwje neelé rɔ dee tila ɓal mbuna sí’g loo-nésɔ-noji’g lə sí ləm, né gə́ rii ta’g ɓa deḛ d’ə̰ji gée gə mba mbula meḛ dee’g ləm tɔ. Deḛ to ndi gə́ lel biree aree unda-dɔ ləm, deḛ to kagje gə́ rɔ dee ndòlé naḭ kàrá gə́ kandə dee godo keneŋ gə́ d’wəi gɔl joo ɓa lel ɔr dee gə ŋgira dee bura moŋgoŋgo̰ ila dee naŋg ɓəi ləm tɔ. 13Deḛje neelé néra gə́ mina̰ lə dee lé uba ndugu-ndugu asəna gə paŋgəm mán baa-boo-kad gə́ tuga ar əmee ḭ bèe. Deḛ to d’asəna gə niŋga-ndɔ gə́ teḛ igi kág gə́ loo gə́ ndul njudu-njudu ɓa wɔji dɔ dee gə no̰.
14Enɔk, yeḛ gə́ to ŋgokadɔg Adam gə́ njekɔm’g siri lé yeḛ tegginta gə́ wɔji dɔ dəwje neelé pana: Aa ooje, Mbaidɔmbaije a ree gə njémeendaje ləa gə́ dum tura gə́ dɔ dee a kwa mèŋgèŋgḛ̀ 15gə mba gaŋg rəwta dɔ dəwje’g lai ya ləm, mba kar bo̰ néra gə́ yèr lai gə tapa gə́ yèr lai gə́ njékaiyaje gə́ to njéndɔl-Alaje gə́ d’isi mbuna dee’g d’ila dəa’g lé ɔs ne ta dee’g ləm tɔ. 16Deḛje neelé deḛ to njémeekadje gə́ d’unda ndu d’im ne rɔ dee jim-jim ləm, d’ar mal néje gə́ ra dee ula pər meḛ dee’g ləm, kəsta ɓa ubu na̰ ta dee’g pur-pur ləma, deḛ to njélèbè kəm mar deeje gə nojimeekas ləm tɔ.
Ta ndəjije
17Nɛ seḭ gə́ m’unda sí dan kəm’g lé arje meḛ sí olé dɔ néje gə́ njékaḭkulaje lə Mbaidɔmbaije Jeju Kristi pa taree d’ula sí kédé lé. 18Deḛ d’ula sí pana: ndɔ gə́ rudu lé njédəjinduje d’a si keneŋ ya, d’a ra gə goo mal néje gə́ yèr gə́ ra dee lé . 19Deḛ nja ɓa d’ula sí na̰’d d’ar ta tḭ-na̰ oso ne ləm, deḛ ndolè goo néra gə́ ka̰ darɔ ɓó Ndil godo meḛ dee’g ləm tɔ. 20Seḭ gə́ m’unda sí dan kəm’g lé undaje siŋga sí dɔ maree’g dɔ meekun’g lə sí gə́ to né gə́ to gə kəmee doi ləm, raje ne tamaji gə goo Ndilmeenda gə́ taa meḛ sí lé ləma, 21meenoji lə Ala gə́ seḭ sije keneŋ lé rḛ́je keneŋ rḛ́-rḛ́ ŋginaje ne kəmə gə́ gə no̰ gə́ Mbaidɔmbaije Jeju Kristi a kar sí sije ne gə goo meekɔrjol ləa lé ləm tɔ.
22Ndaŋje njé gə́ na̰je gə́ d’isi maḭ gə rɔ dee ɓəi ləm, 23njé gə́ raŋg lé wa deeje dan pər’g wɔgədɔ aji deeje ləma, deḛ gə́ raŋg ya ɓəi kara maji koo kəmtondoo lə dee ya ləm tɔ nɛ arje meḛ sí aar dɔ dee’g kərm ɓəi, won kaiya gə́ nai kubu’g lə dee lé kara ə̰jije bəḭ-bəḭ ya.
Rudu ta pidi
24Yeḛ gə́ askəm lam sí loo-koso gə́ rara kara ləm, gə́ askəm teḛ sə sí gə rɔ sí gə́ àr ŋgad-ŋgad kar sí aarje ne gə rɔlel dan rɔnduba’g ləa ləm tɔ lé 25yeḛ nja ɓa gə́ Ala kára ba kiao, gə́ j’aji ne gin Jeju Kristi Mbaidɔmbaije lə sí lé maji kula rɔnduba dəa’g ləm, gə maji karee ur dɔ dəwje’g lai ləm, maji karee dum dɔ loo gə siŋgamoŋ ləa kédé par-par gə ɓasinè ləma, gə saar-saar gə no̰ ləm tɔ. Amen!
Currently Selected:
Jude 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.