Jujé 2
2
Juje ula njétənlooje joo mee ɓee’d gə́ Jeriko
1Juje gə́ to ŋgolə Nun lé, loo gə́ naḭ ne mee ɓee gə́ Sitim ɓəi ndá, yeḛ ula njétənlooje joo gə goo ŋgəḭ pana: Awje aw tənje loo mee ɓee’g ooje, nɛ oreeje kəm sí ndəŋ dɔ ɓee-boo gə́ Jeriko ya. Deḛ d’ɔd d’aw ndá teḛ kəi lə kaiya-dené gə́ ria lə Rahab, tɔɓəi deḛ to keneŋ tɔ . 2D’aḭ d’aw d’ula mbai gə́ Jeriko taree pana: Aa oo, mee til’g neelé dəwje gə́ to Israɛlje ree loo gə́ nee’g gə mba tən loo mee ɓee’g nee koo. 3Togə́bè ɓa mbai gə́ Jeriko lé ula dəwje rɔ Rahab’g ar dee d’ulá pana: Dəwje gə́ ree rɔi’g mee kəi’g ləi lé ar dee teḛ gə́ raga nee: mbata ree gə́ deḛ ree lé to mba tən loo mee ɓee’g neelé lai ya koo.
4Dené lé wa dəwje gə́ joo neelé aw iya dee, tɔɓəi yeḛ pana: Tɔgərɔ ya, dəwje neelé ree kəi ləm ya, nɛ m’gər loo gə́ d’ḭ keneŋ el. 5Loondul’g loo gə́ d’a gə kudu tarəwkɔg ndá dəwje neelé d’unda loo teḛ ya nɛ m’gər loo gə́ d’aḭ d’aw keneŋ el, ɔsje rɔ sí ɓad tubaje goo dee ndá a kiŋga deeje ya.
6Nɛ yeḛ ar njétənlooje neelé tuga loo d’aw dɔ kəi’g tar ndá yeḛ iya dee gel kag-palégalje’d gə́ yeḛ naji dɔ kəi’g tar lé. 7Dəwje neelé tuba goo dee gə rəw gə́ aw gə́ baa gə́ Jurdɛ̰ loo gə́ mán ur keneŋ el tɔɓəi loo gə́ deḛ teḛ raga ndá d’udu tarəwkɔg lé goo dee’g tɔ. 8Ɓad ɓa gə mba kar njétənlooje to naŋg ɓəi ndá Rahab tuga loo aw rɔ dee’g dɔ kəi’g tar, 9tɔɓəi yeḛ ula dee pana: Ma m’gər gao, Njesigənea̰ ar sí ɓee neelé ləm, no̰ néra sí ɔm ɓəl dɔ sí’g ləma, dəwje lai gə́ mee ɓee’g neelé d’unda bala tigi-tigi no̰ sí’g ləm tɔ. 10Mbata jeḛ j’oo ta né gə́ Njesigənea̰ ra ar baa-boo-kad gə́ ria lə Baa-Kas lé yi no̰ sí’g tə, loo gə́ seḭ undaje loo mee ɓee gə́ Ejiptə teḛje ləm, j’oo sor né gə́ seḭ raje gə Siho̰ gə Ɔg deḛ joo gə́ to mbaije lə Amɔrje, kel tura-baa gə́ Jurdɛ̰ nu, loo gə́ seḭ tuji deeje ne pugudu lé ləm tɔ . 11Jeḛ j’ooje taree ndá meḛ sí ila kas ləm, ndil síjeḛ lai ya teḛ kág igi mbata lə sí ləm tɔ, mbata Njesigənea̰, Ala lə sí lé to Ala gə́ njesi sém dara gə́ tar ləm, gə dɔ naŋg nee ləm tɔ. 12Ɓasinè lé ma m’ra ndòo rɔ sí’g, maji kar sí manje rɔ sí gə ri Njesigənea̰ amje mba ra gə njémeekəije lə bɔm meemaji to gə́ ma kara m’ra ne sə sí bèe ya tɔ. 13Tɔjimje né kára mba kamje m’gər to gə́ seḭ a raje bèe ya ɓa. Seḭ a kya̰je bɔmje, gə kɔmje, gə ŋgakɔmje gə́ diŋgam gə njé gə́ dené, gə deḛ lai gə́ to gə́ ka̰ dee-deḛ kəmba ɓó kar sí j’wəi el ɓa.
14Dəwje neelé d’ilá keneŋ pana: Ɓó lé i un dɔ sí el ndá kisi kəmba lə síjeḛ lé a to gin kisi kəmba ləi ya, bèe ɓa loo gə́ Njesigənea̰ a kar sí ɓee neelé ndá jeḛ kara j’a ra səi meemaji gə ŋgonkoji ya tɔ.
15Yen ŋga, yeḛ ila kúla kəmbolè’g aree oso raga ar dee risi d’ur ne naŋg mbata yeḛ rɔd kəi ləa ta ndògo-bɔrɔ gə́ gugu dɔ ɓee neelé sub. 16Yeḛ ula dee pana: Maji kar sí awje par gə́ kaar mbal’g, nà njétuba goo síje lé d’a kiŋga sí, aw iyaje rɔ sí keneŋ as ndɔ sí munda saar kar dee tel ree ɓa, gée gə́ gogo seḭ a kḭje kawje ɓəi.
17Dəwje neelé d’ulá pana: Aa oo, rəbee gə́ a kar ta ndukun gə́ i ar sí j’un j’ari lé ɔr ne dɔ sí’g ɓa nee: 18ndɔ gə́ j’a gə kandə mee ɓee’g neelé ndá maji kari tɔ kúla gə́ kas njir-njir kəmbolè-loo gə́ i ar sí n’risi j’ur naŋg keneŋ lé ləm, maji kari ar bɔbije, gə kɔinje, gə ŋgakɔḭje, gə njémeekəije lə bɔbije lai ree d’isi səi na̰’d mee kəi’g ləi ləm tɔ. 19Ɓó lé dəw kára dan dee’g a kunda loo mee kəi’g ləi teḛ raga ndá ta məsee a kwa dəa-yeḛ ya ɓó a kwa dɔ síjeḛ el, nɛ ɓó lé dəw ula jia ɔrɔ ne rɔ dəw gə́ rara ɓa mbuna deḛ gə́ d’isi səi mee kəi’g ləi ndá ta məs debee neelé a nai dɔ síjeḛ’g ya tɔ. 20Nɛ ɓó lé i un dɔ sí ndá ndukun gə́ i ar sí j’un j’ari lé taree a kɔr dɔ síjeḛ’g tɔ.
21Yeḛ tel ila dee keneŋ pana: Maji karee to gə goo taree gə́ seḭ paje lé ya.
Ndá yeḛ ya̰ dee ar dee d’ɔd d’aw. Tɔɓəi yeḛ tɔ kúla gə́ kas njir-njir lé kəmbolè’g lé tɔ. 22Deḛ d’ɔd d’aw teḛ kaar mbal’g ndá d’isi keneŋ ndɔ dee munda saar d’ar njétuba goo deeje lé tel d’aw ɓee. Deḛ gə́ njétuba goo deeje lé saŋg dee gə kila-rəwje lai d’wa loo wɔr-wɔr nɛ d’iŋga dee el. 23Togə́bè ɓa dəwje gə́ joo neelé d’ḭ dɔ mbal’g risi d’ur naŋg ləm, tel gaŋg ne baa gə́ Jurdɛ̰ gogo ləm tɔ. Deḛ ree rɔ Juje’d gə́ to ŋgolə Nun lé ndá deḛ ndaji ta néje lai gə́ teḛ dɔ dee’g lé d’aree oo tɔ.
24Deḛ d’ula Juje pana: Tɔgərɔ, Njesigənea̰ ila ɓee neelé lai ji sí’g ləm, ar njéɓeeje lai kara d’unda bala tigi-tigi no̰ sí’g ləm tɔ.
Currently Selected:
Jujé 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.