Njéga̰g-Rəwtaje 21
21
Tel gə́ deḛ tel gɔl ginkoji lə Bḛjamije gogo lé
1Israɛlje manrɔ dee bər-bər Mispa’g pana: Dəw kára kara mbuna sí’g a kun ŋgonee gə́ dené kar dəw gə́ to Bḛjami təa gə́ dené el. 2Koso-dəwje d’ḭ d’aw Betel d’aw d’isi no̰ Ala’g lé saar kàrkemetag. D’ɔr ndu dee gə́ tar wəl no̰ ne d’ar mán kəm dee wa dee mbəgə-mbəgə. 3Ndá deḛ pana: Ǝi Njesigənea̰, Ala lə Israɛlje, see gelee ban ɓa né gə́ togə́bè teḛ ne dɔ Israɛlje’g ar ginkoji lə Israɛlje kára doŋgɔ ya godo ɓogənè wa.
4Bèlè lookàree ndá koso-dəwje d’ḭta gə ndɔ rad, deḛ ra loo-nékinjaməs lée’g neelé ndá d’inja nékinjanéməsje gə́ ka̰ roo ləm, gə nékinjanéməsje gə́ wɔji dɔ kɔm na̰’d ləm tɔ. 5Israɛlje pana: See na̰ ɓa mbuna ginkoji Israɛlje’g aw loo-mbo̰-dɔ-na̰’d lə koso-dəwje no̰ Njesigənea̰’g lé el wa.
Mbata deḛ manrɔ dee gə rɔkubu d’aree wɔji ne dɔ nana ɓa gə́ aw loo-mbo̰-dɔ-na̰’g no̰ Njesigənea̰’g loo gə́ Mispa’g el ndá: Débee neelé d’a tɔlee gə́ tɔl ya. 6Israɛlje d’ə̰ji ta koo kəmtondoo lə Bḛjamije gə́ to ŋgako̰ deeje ndá deḛ pana: Ɓogənè ginkoji lə Israɛlje kára godo mbuna sí’g. 7See ɗi ɓa j’a ra mba kiŋga ne denéje kar deḛ gə́ nai kəmba lé ɓəi wa. Mbata jeḛ manje rɔ sí j’ar Njesigənea̰ mba kar dee ŋgan síje gə́ dené gə́ denéje lə dee el lé.
8Deḛ tel dəji tɔɓəi pana: See mbuna ginkoji Israɛlje’g lé dəw gə́ ra ɓa lal ree rɔ Njesigənea̰’g loo gə́ Mispa’g wa. Nɛ aa oo, deḛ d’oo to gə́ dəw kára kara mee ɓee gə́ Jabɛs dɔ naŋg’d gə́ Galaad ree loo-si dee’g əsé loo-mbo̰-dɔ-na̰’g lé el. 9Deḛ tura bula lə dəwje ndá d’iŋga dəw gə́ ḭ ɓee gə́ Jabɛs dɔ naŋg’d gə́ Galaad el. 10Togə́bè ɓa koso-dəwje d’ula bao-rɔje tɔl-dɔg-loo dɔg-giree-joo (12.000) mba kar dee d’aw rɔ sə dee ndá d’ula dee togə́bè pana: Awje aw tɔlje dəwje gə́ Jabɛs dɔ naŋg’d gə́ Galaad gə kiambas, tɔlje denéje ləm, gə ŋganje ləm tɔ. 11Aa ooje, né gə́ seḭ a raje ɓa nee: Seḭ a tɔlje diŋgamje lai ləm, gə dené gə́ rara gə́ gər ŋgaw mba̰ lé mburug-mburug ləm tɔ.
12Mbuna dəwje gə́ Jabɛs dɔ naŋg gə́ Galaad lé d’iŋga ŋgama̰dje tɔl-sɔ (400) gə́ gər ŋgaw el keneŋ ndá deḛ ree sə dee loo-si dee’d gə́ Silo gə́ to mee ɓee’d gə́ Kana̰ lé.
13Koso-dəwje d’ula njékaḭkulaje rɔ Bḛjamije’g gə́ d’isi dɔ mbal gə́ ria lə Rimo̰ mba kar dee d’ila mber meekulɔm d’ar dee. 14Mee ndəa gən lé Bḛjamije tel ree ndá d’ar dee denéje gə́ d’ya̰ dee kəmba mbuna denéje gə́ Jabɛs gə́ dɔ naŋg’d gə́ Galaad lé. Nɛ deḛ bula d’as dɔ deḛ lai el.
15Koso-dəwje d’ə̰ji ta koo kəmtondoo lə Bḛjamije mbata Njesigənea̰ ar ginkoji lə Israɛl kára godo mbuna dee’g. 16Ŋgatɔgje lə koso-dəwje lé dəji pana: See ɗi ɓa j’a ra mba kiŋga ne denéje kar dee-deḛ gə́ nai kəmba lé wa. Mbata denéje lə Bḛjamije lé d’udu lai. 17Yen ŋga deḛ pana: Lé riri kara maji kar Bḛjamije gə́ teḛ ta yoo’g lé ŋgəm loo gə́ to gə́ né ka̰ dee-deḛ lé gə mba kar ginkoji kára doŋgɔ mbuna Israɛlje’g godo el. 18Nɛ jeḛ j’askəm kar dee ŋgan síje gə́ dené gə́ denéje lə dee el mbata Israɛlje manrɔ dee pana: Maji kar ndɔl wa dɔ yeḛ gə́ a k’un dené k’ar dəw gə́ Bḛjami.
19Togə́bè deḛ tel pana: Aa ooje, mee ləbje kára-kára lai lé jeḛ n’raje naḭ lə Njesigənea̰ mee ɓee gə́ Silo, gə́ to kel dɔgel lə Betel gə́ to par gə́ bər lə rəw gə́ ḭ Betel aw Sikem ləm, gə dɔkɔl lə Lebona ləm tɔ. 20Bèe ɓa deḛ d’un ndu dee togə́bè d’ar Bḛjamije pana: Awje, aw umje loo mee ndɔ-nduúje’g. 21Seḭ a kaaje loo gərərə ndá aa ooje, loo gə́ ŋgama̰dje gə́ Silo d’a teḛ mba ndam ndá seḭ a kundaje loo mee ndɔ-nduúje’g teḛje, tɔɓəi nana kara a kwa ŋgoma̰də kára mba karee to dené ləa-ləa ndá seḭ a kawje sə dee mee ɓee’g lə Bḛjamije tɔ. 22Ɓó lé bɔ deeje əsé ŋgako̰ deeje ree saŋg sə sí ta ndá jeḛ j’a kula dee pana: Ya̰ deeje ar síje mbata jeḛ j’wa dené mbata lə nana kara gə́ aw loo-rɔ’g el. Bèe ɓa to seḭje ɓa ar deeje denéje lé el, ɓó lé bèe el ndá ta a kwa dɔ sí ya.
23Bḛjamije ra togə́bè: deḛ taa denéje gə goo bula lə dee mbuna njéndamje’d gə́ deḛ twa dee lé tɔɓəi deḛ tel loo’g lə dee gə́ d’iŋga gə́ né ka̰ dee-deḛ lé, deḛ tel ra ɓee-booje ɓəd-ɓəd d’isi keneŋ. 24Ndá mée kàree gə́ kára ba lé ya Israɛlje d’ḭ keneŋ d’aw d’ar nana kara aw iŋga njé gə́ ginkoji’g ləa-ləa ləm, gə gel bɔ’g ləa-ləa ləma, nana kara tel aw mee loo’g ləa gə́ to né kea̰-yeḛ yeḛ ya lé ləm tɔ.
25Mee ndəa gən lé mbai godo Israɛl’g. Nana kara ra né gə́ mée-yeḛ nja ɓa wɔji wɔji tɔ .
Currently Selected:
Njéga̰g-Rəwtaje 21: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.